Bilong Wanem Yumi Gat Planti Aiwara?

OLSEM WANEM? Wanpela taim yu bin krai strong? Wanem as na yu bin krai olsem? Ating yu bin amamas long wanpela samting, o ating yu bin hevi long wanpela samting, a? O ating yu bin winim wanpela samting, o yu lus long wanpela samting. O wanpela hevi bilong yu i pinis, o yu bel hevi long wanpela samting. O yu amamas long nupela pikinini i kamap, o yu bel hevi long poroman bilong yu i dai pinis. O yu tingim wanpela gutpela samting, o yu bungim gutpela pren bilong yu, o yu tok gutbai long em. Ol kain samting olsem i save kirapim yumi long krai.

Sapos bel bilong yumi i pilim tru wanpela samting, olsem wanem dispela i kirapim yumi long krai? Krai i save helpim yumi liklik o nogat? O sapos i no gat aiwara, em gutpela o nogat?

Bilong Wanem Yumi Save Krai?

Ol i no save tru bilong wanem yumi save krai. Ol man na animal i gat tupela kain aiwara. Wanpela kain ol i kolim basal, na i bilong wasim ai long olgeta taim na bai ai i ken wok gut na i no ken drai, na sapos pipia i go insait long ai, dispela kain aiwara i save kamap. Tasol i gat narapela kain aiwara i save kamap long taim bel i pilim strong wanpela samting, na ol manmeri tasol i gat dispela kain aiwara, na ol animal nogat.

Wanpela saveman, em Wiliam Frei, em i tok, taim yumi krai, dispela i save rausim sampela pipia long skin bilong yumi, kain olsem kidni i save rausim pispis o bel i rausim pekpek. Long buk bilong em (Crying​—The Mystery of Tears) em i stori long dispela tupela kain aiwara. Em i tok, aiwara i save kamap taim wanpela pipia samting i go insait long ai, o wara bilong anian i go long ai, dispela aiwara i gat planti protin i stap long en, tasol narapela kain aiwara i kamap taim yumi bel hevi, i gat planti protin moa long en. Taim yumi bel hevi na krai, dispela i narapela kain long aiwara i kamap taim wanpela samting i go insait long ai.

Jeremaia i tok: “Dispela i mekim aiwara bilong mi i kapsait na i ran i go daun. Na i no gat man bilong sori wantaim mi na strongim mi gen. Ol birua i winim mi pinis na ol pikinini bilong mi i stap nogut tru.” (Krai 1:16) Olsem wanem? Ol meri i save krai planti, tasol ol man i no tumas? Frei i tok, pikinini man i krai wankain olsem pikinini meri, tasol taim mama i karim em, sampela de o wik i mas lus pastaim na bai aiwara bilong krai inap kamap. Ol manki na pikinini meri, tupela wantaim i gat wanpela kain homon long skin bilong ol, em homon prolaktin, em homon bilong kirapim susu. Tasol taim ol i gat 13 inap 16 krismas samting, ol meri i gat planti bilong dispela homon, winim ol manki.

Homon prolaktin i stap long ol aiwara, na sapos yumi gat bikpela hevi, o pret, o tingting planti long wanpela samting, prolaktin i kamap strong long skin bilong yumi. Planti homon prolaktin i stap long skin bilong ol meri, olsem na ol i save krai hariap sapos ol i gat hevi samting. Dokta Frei i ting, krai i gutpela bilong stretim sampela samting long skin bilong yumi. Em i tok, ating ol homon long skin bilong yumi i kirapim yumi long krai, na taim yumi krai pinis dispela i mekim gut skin bilong yumi.

Na wanpela savemeri, em Magaret Kreipo, em i tok long wanpela nius (Seventeen, Me 1990), sapos man o meri i laik krai, tasol em i pasim na em i no krai, dispela inap givim sik long em, na bel bilong em i no stap isi, na em bai kisim sik olsem sua long bel samting. Tasol narapela savemeri, em Dokta Susan Labot, wantaim Dokta Randal Matin, ol i gat narapela tingting. Tupela i bin skelim pasin bilong ol manmeri i save krai planti, na ol manmeri i no save krai tumas, na tupela i tok, krai i no save helpim man o meri long i stap bel isi o long pinisim bel hevi bilong em. Na ol i tok, man o meri i save krai planti, em i man o meri bilong tingting planti long ol samting. Tasol sapos bikpela hevi i painim yumi, olsem wanpela long famili i dai, na yumi krai, krai bai helpim yumi long karim dispela hevi.

Olsem na yumi ken tok, i no gat wanpela man i save tru wanem wok bilong aiwara bilong krai.

Narapela Aiwara

Tasol yumi save long wok bilong dispela narapela kain aiwara, em aiwara bilong welim ai bilong yumi. Tasol em i no mekim dispela wok tasol, nogat. Em i mekim planti narapela samting tu.

I gat liklik rop i kam long arere bilong ai bilong yumi na i givim aiwara long ai, na i gat 60 liklik rop moa i save kam long sampela hap moa bilong ai na i mekim olsem, na dispela aiwara i gat 3-pela hap bilong en, olsem hap glu, na hap wara, na hap wel.

Hap aiwara i gat glu long en i stap klostu long ai na bai skin bilong ai i ken pas gut na op gut. Na hap aiwara i gat wara long en i gat oksijen na planti samting moa insait long en bilong helpim ai. Na i gat ol marasin ensaim long en, wanpela em laisosaim, na em i gutpela bilong kilim ol sik i kam long ai na bilong klinim ai.

Na i gat 30 liklik rop moa i bringim aiwara i kam long ai, em ol dispela liklik yelopela samting i stap arere long skin bilong ai, na dispela aiwara i gat wel long en. Taim yumi pasim na opim ai, dispela i wasim ai na putim liklik wel i go long en na bai em i no ken drai. Sapos ai i no gat dispela wel long en, ai bai drai na i pen.

Bilong Pasim na Opim Ai

Taim yumi pasim ai, skin bilong antap em i kam daun, na skin bilong daunbilo i kam antap, na tupela hap skin i pas na karamapim olgeta hap bilong ai. Taim tupela hap skin bilong ai i kam daun na i go antap olsem, tupela i putim liklik aiwara i go long olgeta hap bilong ai, olsem wasim gut na bai em i klin, na dispela aiwara i gat dispela 3-pela samting insait long en bilong welim gut ai.

Na ol dispela aiwara i save go we? Taim em i mekim pinis wok bilong en, olsem wanem long en? Em i save kam long arere bilong ai klostu long nus, na i gat liklik hul i stap long dispela hap, na aiwara i go insait long dispela, na i go baksait long nus, na i go daun insait long nek, na i go lus daunbilo. Taim yumi wok long pasim opim pasim opim ai, dispela liklik hul samting long arere bilong ai i wok olsem pam bilong pamim na rausim olpela aiwara i go.

Taim yumi kirap long krai, ai i wok hariap long pas na op, pas na op, na dispela i kirapim “pam” long rausim ol aiwara i wok long kamap. Tasol sapos bikpela aiwara tumas i pundaun, pam i no inap rausim hariap tumas, olsem na aiwara i kapsait i go insait long nus, na ating yu mas rausim long nus, na planti moa i kapsait long ai na i pundaun i kam daun long pes bilong yu.

Olsem na i gat planti aiwara i stap na i redi long kapsait bilong kamapim bel bilong yu, olsem yu amamas na yu lap na yu bel gut long wanpela samting, o yu bel hevi long wanpela samting.

[Blok long pes 26]

Samting i Ken Helpim Retpela Ai

Yu kisim pinis dispela kain skrap olsem paia long ai bilong yu. Wanem as bilong dispela samting? Ai i kamap retpela taim skin i karamapim waitpela bilong ai i opim ol sel na larim sampela blut i kam insait.

Ating wara bilong ai i sot, na dispela hevi i kamap. Ol manmeri i wok long rit o lukluk long televisen samting i no save opim na pasim ai planti taim. Yumi save opim pasim ai 15 taim long wanpela minit. Taim yumi rit, draivim ka, o lukluk strong, yumi save opim pasim ai 3-pela i go inap 6-pela taim tasol, na dispela i mekim ai i drai na i skrap. Ol dokta i tok gutpela yumi malolo liklik bilong opim pasim ai, o putim marasin bilong helpim ai.

Taim yu kirap long moning yu lukim ai i ret liklik, long wanem, long taim bilong slip na tudak ai i no kamapim planti aiwara.

Taim man i go lapun, o sampela marasin tu inap mekim na liklik rop bilong kamapim aiwara i no wok gut moa. Sapos skin bilong pasim ai i solap o i pen long wanem, liklik pipia i go long ai, dispela inap mekim ai i ret.

Sapos rop bilong kamapim aiwara i pas o i bagarap liklik taim pikinini i stap yet long bel, o bagarap i painim ai, dispela inap mekim na aiwara i no wasim gut ai, o ol marasin i stap insait long wara bilong ai i no stret.

Sampela milion manmeri i gat sampela kain sik olsem segrens, em i bagarapim ol samting i kamapim aiwara na spet na wel, na i mekim ai, maus na skin i drai.

Yumi ken mekim wanem sapos ai i save drai long olgeta taim? Yu ken baim giaman aiwara olsem marasin bilong putim insait long ai o yu ken baim wanpela kain aiglas i pasim win na bai aiwara i no ken drai kwik. Tru dispela sik bilong ai i no gutpela, tasol em i no save mekim man i aipas. Tasol sapos yu no kisim marasin na ai i drai long olgeta taim, dispela em inap bagarapim skin i karamapim waitpela bilong ai, olsem na yu mas go lukim dokta.

[Blok long pes 27]

‘Mi Pilim Nogut Tru na Mi Krai i Stap’

Devit, em man bilong raitim Song, i tok olsem taim em i singaut long God long tingim bikpela hevi bilong em. (Song 56:8) Yes, taim bikpela hevi i painim ol gutpela wokboi bilong God ol tu i krai na aiwara i kapsait.

Tingim King David taim em i krai long tupela pikinini man bilong em Amnon na Apsalom na gutpela pren bilong em Jonatan na King Sol long taim ol i dai. (2 Samuel 1:​11, 12; 13:​29, 36; 18:33) Taim ol Amalek i bagarapim taun Siklak na holimpas ol meri pikinini bilong Devit na ol soldia bilong em, ol i “krai nogut tru i go i go inap strong bilong ol i pinis.”​—1 Samuel 30:4.

Bikpela bel hevi i bin kamap taim Jekop na Moses i dai​—olgeta Israel na Isip i krai inap planti de. (Stat 50:3; Lo 34:8) Long taim sampela i kalabus o i karim hevi ol i krai na singaut long Jehova. (Jop 3:24; Song 137:1; Saveman 4:1) Dispela hap long Baibel ol i kolim Krai em i wanpela krai sori Jeremaia i bin raitim taim em i krai i stap.​—Krai 1:16; 2:​11, 18.

Krai i rot bilong bodi long kamapim bikpela sori o hevi i stap long bel bilong man​—em i no mak bilong man i no gat strong. Jisas tu i bin krai na aiwara bilong em i kapsait. Wanpela taim em i krai long taun Jerusalem na narapela taim em i krai taim em i lukim ol wanblut na pren bilong Lasarus i bel hevi long taim Lasarus i dai. (Luk 19:41; Jon 11:​33-35) Dispela aiwara i kapsait long bikpela hevi bilong ol famili na pren bilong Lasarus, tasol em i kamap aiwara bilong amamas taim Jisas i singautim pren bilong em long lusim matmat.​—Jon 11:​41-44.