Pasin Bilas Bilong Kain Kain Amamas
HOLIWUT! Maski yu stap long wanem hap bilong graun, ating taim yu harim dispela nem yu tingim ol piksa wokabaut samting. Planti man i tok em i nambawan taun bilong kamapim ol piksa wokabaut samting long graun. I no gat wanpela taun long graun i winim dispela taun long Los Enjeles, Kalifonia, long pasin bilong mekim piksa wokabaut samting. I olsem em nambawan hap bilong kain kain bilaspasin. Nau ol man i save tingim dispela taun Holiwut olsem ples bilong wokim kain kain piksa wokabaut.
Kain Kain Amamas—Em Bikpela Wok Bisnis
Tasol ol man i no stori tasol long Holiwut, nogat. Holiwut em i olsem wanpela bikpela bisnis i stap long olgeta hap bilong graun. Wanpela nius (Time) i tok, long Amerika, mani ol i kisim taim ol i salim ol piksa wokabaut samting long ol narapela kantri i wankain olsem mani ol i save kisim taim ol i salim ol hap masin samting bilong ol roket na satelait. Olgeta wan wan yia ol lain bisnis bilong kamapim amamas i save pulim planti handet bilion kina, na bikpela hap bilong mani ol i kisim i kam long ol narapela kantri.
Mani em ol kantri i save kisim taim ol i salim ol buk, o ol singsing ol i putim long kaset samting, o piksa wokabaut o piksa bilong televisen i go long ol narapela narapela hap, bikpela hap tru bilong dispela mani i save go long Amerika.
Na bilong bekim dispela bikpela mani ol i kisim, lain bilong Holiwut i save amamasim ol man long rot bilong ol piksa wokabaut samting. Tasol i no olsem olgeta man long graun i amamas long lukim ol dispela piksa samting, nogat. Planti kantri i kros long pasin bilong lain Amerika, long wanem, ol yangpela bilong ol i lusim gutpela pasin bilong ol na bihainim pasin bilong ol lain Amerika. Tasol ol piksa wokabaut samting i no kam long hap bilong Amerika tasol, nogat. Planti ol kantri i save kamapim ol piksa long televisen, na singsing long kaset, na ol buk, na spot, na planti narapela samting bilong amamasim ol man.
Kain Kain Amamas i Stap Long Olgeta Hap
Planti kain kain samting bilong amamas i stap long olgeta hap bilong graun na i no hatwok long kisim. Olsem na nau bikpela senis i kamap. Olsem: Sapos yu bin stap 100 yia bipo, hamas taim bai yu go long wanpela singsing o danis bilong ples samting? Ating wan wan taim tasol, a? Na maski sapos yu bin stap long ol kantri i gat planti wok bisnis samting, ating i no gat planti kain kain samting bilong amamas olsem long nau, a? Long nau yumi inap harim kain kain musik long redio, o yumi ken sindaun tasol long haus na lukim televisen samting.
Planti famili long ol kantri i gat planti wok bisnis samting, ol i gat televisen, o video, o kaset redio, na ol narapela samting bilong amamas. Na sampela haus i gat wan wan televisen long olgeta rum. Tasol long sampela kantri i no gat planti bisnis, long ol dispela kantri tu, planti ples na taun i gat haus piksa o ples ol man inap bung na lukim televisen samting. Televisen i save pulim tingting bilong ol man. Taim ol man i malolo ol i save mekim wok long kain kain samting bilong painim amamas.
Olsem wanem? I gat rong long mekim olsem? I gat sampela samting yumi mas was gut long en? O ol dispela samting i kamap long wanem i gat planti kain kain samting bilong amamas? Nau yumi ken skelim gut ol kain kain amamas bilong graun.