Baibel i Tok Wanem?

Yumi Mas i Gat Ol Pris?

LONG olgeta yia John Paul Namba 2 i save salim pas i go long ol pris. Pas bilong 1992 i tok: ‘Yumi mas tok tenkyu long God i givim lain pris long yumi.’ Planti Katolik na ol narapela man tu i pilim tru olsem sampela pasin bilong ol i no stret. Ol i ting i mas i gat wanpela man God i orait long em, na em i ken kamapim laik bilong God long ol, o givim ofa long God, o beten askim God long helpim ol. Ol i kolim kain man olsem pris. Olsem wanem? Yumi mas i gat wanpela pris bilong helpim yumi na God i ken lusim tingting long ol rong bilong yumi?

God yet i bin kamapim wok pris na pasin bilong wokim ofa. Sapos yumi no gat sin, pris i no gat wok. Taim Adam i stap gutpela olgeta long Iden, no gat wok long wanpela pris; Adam i no gat sin.​—Stat 2:​7, 8; Saveman 7:29.

Husat Ol i Namba Wan Pris?

Laik bilong Adam na em i mekim sin na nau sin i pas long yumi olgeta, long wanem, yumi olgeta i pikinini bilong Adam. (Rom 3:23) Pikinini bilong Adam, em Abel, em i save long dispela. Baibel i tok: “Abel i bilip long God, na i mekim ofa long em.” (Hibru 11:4) Abel na ol narapela bilipman olsem Noa, Abraham, Jop, ol i no pris, tasol ol i bin wokim ofa long God bilong helpim ol yet o famili bilong ol. Baibel i stori long Jop na ol pikinini man bilong em olsem: “Em [Jop] i save mekim ol ofa inap long namba bilong ol pikinini bilong en. . . . Em i ting olsem, ‘Nogut ol pikinini bilong mi i bin . . . mekim sin long ai bilong God.’ ” (Jop 1:5) Tasol olsem wanem planti lain man i kisim ol pris na kirap wokim ofa?

Tingim ol samting i bin kamap long Noa, em wantaim famili bilong em tasol i winim Bikpela Tait. Taim ol i lusim sip, Noa i wokim alta na mekim ofa long God bilong tenkyu long em, long wanem, God i marimari long ol na helpim ol na ol i no lus long Bikpela Tait. Olgeta lain i kamap long Noa, olsem na ating ol i bihainim ol pasin bilong Noa long wokim ofa. Na taim planti yia i lus ating ol man i kamapim kain kain bilip na pasin long beten na long wokim ofa na God i ken lusim tingting long sin bilong ol.​—Stat 10:32.

Winim wan handet yia bihain na pasin bikhet i kamap long biktaun Babel. God i paulim tok ples bilong ol na ol i longlong nabaut, olsem na ol i lusim Babel. (Stat 11:​1-9) Taim ol i go long ol narapela narapela hap, sampela pris i kamapim ol tingting nogut na bilip giaman na dispela i kirapim ol man long mekim pasin nogut tru. Tasol God i save em i mas putim wanpela lain pris tru bilong helpim ol man i save lotuim em. Na em i save dispela lain pris i mas i gat wanpela hetpris, na ol nambatu pris, na ol ofa Jehova i save laikim.

As na God i Makim Ol Pris

Bihain Jehova i givim ol pris long ol Israel na ol i mas mekim tupela bikpela samting. Namba wan: Ol i olsem maus bilong God long mekim wok jas na wok bilong skulim ol Israel long Lo Bilong God. (Lo 17:​8, 9; Malakai 2:7) Namba tu: Ol i olsem maus bilong ol manmeri long wokim ofa long God. Pol i tok: “Pasin bilong makim olgeta hetpris em i olsem. God i save kisim wanpela man na em i save putim dispela man long mekim wok bilong em olsem helpim bilong ol manmeri. Hetpris i gat wok bilong givim ol kain kain presen long God na bilong mekim ol kain kain ofa bilong tekewe sin. . . . I no gat wanpela man i save kisim dispela wok long laik bilong em yet. Nogat. God i save singautim em pastaim na em i kisim dispela wok.”​—Hibru 5:​1, 4.

Na Pol i tok, lain pris bilong Israel, em i no rot tru bilong God i kisim bek ol man. Wok bilong ol pris i olsem piksa na i makim ol gutpela samting bai kamap bihain “long heven.” (Hibru 8:5) Taim ol i kamap pinis, ol samting i olsem piksa bilong en i no gat wok moa. Yumi ken tok piksa olsem: Sapos yu holim wanpela pepa i toksave long wanpela samting yu gat bikpela laik tru long baim, orait taim yu baim pinis ating yu no ken holim moa dispela pepa, a?

Taim lain Israel i no kamap yet, God i laik kamapim wanpela lain pris i gat wok long helpim olgeta man​—i no ol Israel tasol. Bipo rot i op na ol Israel inap kamapim ol dispela pris. Jehova i tokim ol Israel: “Sapos nau yupela i . . . bihainim tok bilong mi, . . . bai yupela i stap lain manmeri i save mekim wok bilong mi olsem ol pris.” (Kisim Bek 19:​5, 6; Stat 22:18) Sori tru, wan wan taim tasol lain Israel i bihainim tok bilong God. Olsem na Jisas i tokim ol pris na Farisi olsem: “God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” Orait, husat bai mekim wok pris na helpim ol man long kisim ol blesing?​—Matyu 21:43.

Ol Kristen i Mas i Gat Wanem Lain Pris?

Yumi olgeta i kisim sin long Adam, olsem na i gat wanpela rot tasol bilong kisim laip oltaim​—em Jisas. Jisas i nambawan olgeta na ofa bilong em i gat strong. (1 Jon 2:2) Jisas i Hetpris na em i save helpim yumi olsem lain pris bilong Israel i makim. Hibru 9:24 i tok: “Krais i no bin i go insait long haus lotu . . . i piksa tasol bilong haus lotu tru bilong God. Nogat. Em i go insait long heven stret. Na nau em i stap klostu tru long God, na em i wok long helpim yumi.” Wok pris bilong Krais i nambawan, olsem na wanpela pris long dispela graun i no gat wok moa long helpim ol man. Tasol ol nambatu pris i gat wok yet. Ol i gat wanem wok?

“Long nem bilong Jisas Krais” ol pris i mas givim “laip bilong [ol] long God olsem ofa em i laikim tru.” (1 Pita 2:5) Pol i stori long dispela ofa olsem: “Oltaim yumi mas givim biknem long God . . . olsem ofa yumi save givim long God. Yes, oltaim maus bilong yumi i mas litimapim nem bilong en.” (Hibru 13:15) Dispela lain em ol bai kisim wok king na wok pris long heven, taim ol i stap yet long graun ol i olsem maus bilong God bilong bringim tok bilong God long ol man. Ol i no stap olsem namelman long God na ol man bilong beten samting, nogat; ol i Witnes bilong God. Bihain, taim ol i stap long heven wantaim Krais Jisas, ol bai kamap maus bilong ol man bilong mekim wok long ofa bilong Krais bilong helpim ol man, olsem pinisim sik na hevi bilong ol.​—Skelim wantaim Mak 2:​9-12.

Olgeta bilipman i mas autim tok i tru bilong Kingdom, tasol sampela tasol bai mekim wok long heven olsem “king” long “kingdom.” Jisas i tok: “Yupela liklik lain sipsip, . . . Papa bilong yupela em i tok pinis long em bai . . . givim kingdom bilong en long yupela.” (Luk 12:32; KTH 14:1) Dispela lain bai kirap bek na go long heven na “ol bai i stap pris bilong God na bilong Krais. Na ol bai i stap king wantaim Krais long dispela 1,000 yia.”​—KTH 20:6.

God i stretim rot pinis na dispela lain pris long heven bai helpim gut ol man long samting bilong spirit na bilong skin. I no gat wanpela lain pris i bin mekim olsem. Klostu nau ol bai mekim wok long ofa bilong Jisas na ol bai insait long wok bilong helpim ol bilipman long kamap gutpela olgeta. Long dispela taim Aisaia 33:24 bai kamap tru. Em i tok: “I no gat man i stap . . . bai i tok olsem, ‘Mi gat sik.’ Na Bikpela bai i lusim sin bilong ol manmeri.”

[Piksa Kredit Lain long pes 26]

“Benediction of the Wheat at Artois” 1857, by Jules Breton: France / Giraudon/Art Resource, N.Y.