Ol Gutpela Samting Insait Long Solwara Retsi

I gat wanpela tok ol man i save mekim olsem, “naispela samting i stap long skin tasol.” Tasol planti gutpela samting i stap insait long man o wanpela samting, i no long skin tasol. Mi kisim save long dispela samting taim mi go long solwara Retsi. Taim mi lukim nambis bilong Retsi em ples wesan tasol, mi no inap save long ol gutpela samting mi bai painim taim mi go insait long solwara.

SOLWARA Retsi i gat nem, long wanem, i gat planti pis i gat kain kain kala na i gat ol gutpela rip​—wan wan ples tasol long dispela graun i gutpela olsem solwara Retsi. Olsem na mi gat bikpela laik long save​—tru em nambawan ples o nogat.

Taim mi go insait long solwara na glasim ol samting, mi laik kisim sampela save moa long ol samting insait long solwara. Wanpela saveman bilong ol samting insait long solwara Retsi (Aaron Miroz) i bekim ol askim bilong mi.

Bilong wanem i gat planti pis insait long solwara Retsi?

‘Solwara Retsi i olsem traipela pasis i no op tumas, olsem na em i save pasim planti pis i kam long solwara Indian. Na solwara Retsi i gat planti planti rip. Planti taim long ol hap bilong rip yu inap painim 20 kain rip ol i kamap long wanpela skwea mita ston. Samting i mekim na rip i kamap bikpela em solwara yet​—hat o kol bilong en i save senis liklik tasol long yia. Na long dispela hap liklik ren tasol i pundaun, olsem na i no gat bikpela hap graun i save go insait long solwara. Dispela i mekim na planti samting bilong bagarapim solwara i no go insait long en. Tasol sori tru, 15 yia i go pinis i kam inap nau, sampela hevi olsem i kamap.’

Wanem sampela hevi bilong lukautim dispela gutpela ples?

‘I no gat planti samting yet i bagarapim dispela solwara, tasol ol marasin nogut na pipia samting i wanpela bikpela hevi. I gat 3-pela samting i save bagarapim solwara Retsi​—em marasin fosfets, ol liklik raunwara o tais ol man i save kamapim pis long en, toilet bilong ol taun long nambis. Na planti man i laik glas long dispela solwara. Rip i no strong, olsem na sapos ol i no was gut, ol inap brukim na bagarapim.’

Inap planti yia nau yu save glasim ol rip bilong solwara Retsi. Wanem sampela samting yu bin kisim save long en?

‘Mipela kisim save olsem, ol pis i save kaikai long taim stret. Sampela i kaikai long 7 klok moningtaim na kaikai inap 3-pela aua. Bihain ol i malolo liklik na long apinun ol i kaikai 3-pela aua moa. Sampela pis i save kaikai long nait tasol. Ol dispela rot bilong pis long kaikai i bikpela samting. Sapos birua bilong ol liklik pis i wok long kisim ol long san, ol liklik pis bai hatwok long painim kaikai. Na pis i wankain long yumi, ol i no save kaikai olgeta samting. Wanpela kain pis i gat blupela mak mak na ol i kolim gropa, em i save laikim wanpela kain pis ol i kolim feri baslet, na i gat planti feri baslet long solwara Retsi. Na sampela pis mipela yet i save lukautim hia, i gat sampela kaikai ol i save laikim tumas​—sampela i laik kaikai pis atun na sampela i laik kaikai pis talai.

‘Ating yu ting, long ai bilong pis yumi man i wankain, tasol nogat. Ol pis na sampela liklik animal bilong solwara i luksave long man. Mi tingim wanpela wanwok bilong mi i pilai na paitim wanpela urita. Urita i no amamas dispela man i bin paitim em maski em i pilai tasol. Olsem na taim dispela man i laik givim kaikai long urita, i no gat wanpela taim urita i kisim gen kaikai long em. Na mipela i kisim save olsem, sapos man i gat pasin isi, em i gutpela man bilong wok wantaim pis. Man bilong kros o les kwik em i save mekim na pis i pret.’

Man i nupela long glas long solwara i kirap nogut tru taim em i lukim ol kain kain gutpela samting i gat kain kain kala.

‘Tru tumas, ol pis i gat kain kain kala, i naispela samting tru. Tasol planti man i no save, pis i save mekim wok long kala bilong en olsem wanpela toksave, olsem yumi save mekim wok long ol trafik-lait. Olsem: Taim retpela pis gropa i was long hap bilong em yet, kala bilong en i no senis, tasol taim em i raun painim kaikai, kala bilong em i senis na kamap retpela tru. Na wanpela pis ol gropa i laikim, em pis klaun. Tasol taim pis klaun i lukim kala bilong gropa, em i save gropa i raun nating, em i no painim kaikai. Long dispela taim pis klaun i no pret long gropa na taim gropa i kam klostu long hap bilong pis klaun, pis klaun bai raunim em.’

Yes, yumi ken save, maski yumi ting wanpela hap i no gat ol gutpela gutpela samting God i bin wokim, i gat. Mi lukim wanpela liklik hap tasol bilong ol dispela gutpela samting na dispela i mekim na mi amamas tru. Mi no stap longpela taim insait long solwara, tasol samting mi bin lukim i kirapim mi long laikim moa yet ol gutpela gutpela samting i stap long dispela graun.​—Wanpela man i salim dispela stori i kam.

[Piksa long pes 26]

Wanpela pis laion i raun olsem em i malolo. Em i no pret long ol birua. Ol birua i no kam klostu, long wanem, ol pul bilong en i sap na i gat gip

[Piksa long pes 26]

Pis klaun i save stap klostu long hap bilong en, em i no raun planti. Ples tru bilong en, em wanpela kain gras bilong solwara ol i kolim anemone. Dispela gras i no bagarapim em, long wanem, pis i save klinim gras

[Piksa long pes 26]

Pis bataplai i gat kain kain kala. Skin bilong em i save meknais na taim mi lukim mi tingim bataplai

[Piksa long pes 26]

Pis Pikaso i gat ol braitpela longpela mak na maus bilong en i olsem em i bin penim long yelopela pen. Mi lukim dispela na mi tingim man bilong malenim ol narapela kain piksa

[Piksa long pes 26]

Pis empra ensel i gat planti kala.Taim em i go bikpela ol kala na mak bilong en i save senis