Baibel i Tok Wanem?

Olsem Wanem Yumi Ken Lusim Rong na No Ken Tingim Moa?

“BAI MI LUSIM SIN BILONG OL NA MI NO KEN TINGIM MOA.”​—⁠JEREMAIA 31:34.

DISPELA tok em profet Jeremaia i bin raitim i kamapim narapela kain pasin marimari bilong Jehova olsem: Taim Jehova i lusim rong bilong man, em i no tingim moa. (Aisaia 43:25) Na Baibel i tok moa olsem: “Bikpela [Jehova] em i lusim pinis sin bilong yupela, na olsem tasol yupela tu i mas lusim sin bilong ol arapela.” (Kolosi 3:13) Olsem na yumi Kristen i mas bihainim pasin bilong Jehova long lusim rong.

Tasol sampela bikpela askim i save kamap. Olsem wanem? Taim Jehova i lusim rong bilong yumi, em i lusim tingting olgeta long en? Na taim yumi lusim rong bilong narapela, yumi no ken tingim gen long wanpela taim bihain? Olsem wanem? Sapos yumi no lusim rong olsem, i olsem yumi no lusim tru rong bilong man?

Pasin Bilong Jehova Long Lusim Rong

Lusim rong bilong narapela i olsem yumi no ken bel nogut long em. Taim Jehova i lusim rong bilong man, em i lusim tingting olgeta long en.a Devit i tok: “[Jehova] i no save kros nating long yumi. Na belhat bilong en i no save stap longpela taim. Hap bilong sankamap em i no klostu long hap bilong san i go daun. Em i longwe tru. Olsem tasol God i save tekewe sin bilong yumi na sin i stap longwe tumas. Papa i save sori long ol pikinini bilong en. Olsem tasol Bikpela i save sori long ol manmeri i pret long em.”​—⁠Song 103:​9, 12, 13.

Na Aposel 3:19 i stori moa long pasin bilong Jehova long lusim tingting olgeta long rong bilong man. Em i tok: “Olsem na yupela i mas senisim tingting nogut bilong yupela, na tanim bel, na bai God i rausim ol sin bilong yupela.” Dispela tok “rausim,” long tok Grik ol i raitim olsem e·xa·leiʹpho, na insait bilong dispela tok Grik i olsem “klinim o rausim olgeta.” (Lukim Kamapim Tok Hait 7:17; 21:​4, NW.) Wanpela buk i tok: ‘Dispela hap tok Grik i olsem taim wanpela man i klinim o rausim rait long wanpela samting olsem blakbot bambai em i ken mekim wok gen long en.’ (The New International Dictionary of New Testament Theology) Taim yumi tanim bel, Jehova i save lusim tingting long rong yumi bin mekim. Olsem wanem? Em i no save tingim moa ol rong bilong yumi? Yumi ken tingim wanpela samting Baibel i stori long en.

King Devit i pamuk wantaim Batseba na bilong haitim rong bilong em, em i tingim rot bambai man bilong Batseba i ken i dai. Jehova i salim profet Natan bilong stretim Devit. (2 Samuel 11:​1-17; 12:​1-12) Wanem samting i kamap? Devit i hevi long rong em i bin mekim na em i tanim bel tru, na Jehova i lusim rong bilong em. (2 Samuel 12:13; Song 32:​1-5) Olsem wanem? Jehova i lusim tingting olgeta long ol rong bilong Devit? Nogat! Tupela man bilong raitim Baibel, em Gat na Natan, ol i stori long dispela rong bilong Devit long namba 2 buk bilong Samuel. Tupela i pinis long raitim dispela buk long yia 1040 samting paslain long Krais na klostu long taim Devit i laik i dai.

Olsem na ol rong bilong Devit, na pasin bilong em long tanim bel, na Jehova i lusim rong bilong em​—⁠olgeta i stap long Baibel inap long nau bilong skulim ol man i save kaunim Baibel. (Rom 15:4; 1 Korin 10:11) Na yumi mas save, “tok bilong Bikpela [olsem em i stap long Baibel] i save stap oltaim oltaim,” olsem na ol man bai tingim ol sin bilong Devit inap oltaim!​—⁠1 Pita 1:25.

Orait, olsem wanem yumi ken tok, Jehova i save klinim o rausim olgeta sin bilong yumi taim yumi tanim bel tru na hevi long rong yumi bin mekim? Olsem wanem yumi ken save long tok bilong Jehova olsem: “Bai mi lusim sin bilong ol na mi no ken tingim moa”?​—⁠Jeremaia 31:34.

Pasin Bilong Jehova Long Lusim Tingting

Dispela tok “tingim” long tok Hibru, ol i raitim olsem za·kharʹ, na insait bilong dispela tok Hibru i no olsem tingim tasol ol samting i bin kamap bipo. Buk Theological Wordbook of the Old Testament i tok, dispela tok i ken makim pasin bilong ‘tok, tokaut, kolim kolim ol samting i stap pinis long tingting, tingim bek, kotim man, autim rong.’ Na buk Theological Dictionary of the Old Testament i tok: ‘Planti taim insait bilong dispela tok za·kharʹ i makim wanpela samting man i mekim, o dispela tok i stap wantaim ol narapela tok i makim wanpela samting man i mekim.’ Olsem na taim Jehova i stori long bikhetlain bilong em Israel olsem em bai “tingim pasin nogut bilong ol,” i olsem em bai mekim wanpela samting long ol, long wanem, ol i no tanim bel. (Jeremaia 14:10) Olsem na taim Jehova i tok, “bai mi lusim sin bilong ol na mi no ken tingim moa,” em i mekim dispela tok bilong yumi ken save, taim em i lusim rong bilong yumi, bai em i no ken kamapim gen bilong kotim yumi, o tok yumi man nogut, o givim strafe long yumi.

Long maus bilong profet Esekiel Jehova i bin tok olsem wanem em i save lusim rong bilong man na em i no ken tingim moa: “Sapos wanpela man nogut i lusim sin bilong en, na em i bihainim ol lo bilong mi na mekim stretpela pasin tasol, orait bai em i no inap i dai. Nogat. Em bai i stap gut. Mi no ken tingim moa ol sin em i bin mekim bipo. Nau em i mekim stretpela pasin, olsem na em bai i stap gut.” (Esekiel 18:​21, 22; 33:​14-16) Tru tumas, taim Jehova i lusim rong bilong man i tanim bel, em i klinim o rausim sin bilong em​—⁠em i no tingim moa, olsem bihain bai em i no ken tingim gen ol sin bilong dispela man na mekim kot long em.​—⁠Rom 4:​7, 8.

Yumi gat sin, olsem na yumi no inap lusim tingting olgeta long rong bilong narapela olsem Jehova i save mekim; tingting na pasin bilong em i antap tru long tingting na pasin bilong yumi. (Aisaia 55:​8, 9) Orait, sapos narapela i rongim yumi, yumi mas lusim rong bilong em i go inap long wanem mak na no ken tingim moa?

Olsem Wanem Yumi Ken Lusim Rong na No Ken Tingim Moa

Baibel i tok, yumi mas “lusim sin bilong ol.” (Efesus 4:32) Saveman W. E. Vine i tok, wanpela tok Grik ol i raitim olsem kha·riʹzo·mai, em yumi kolim olsem “lusim sin,” insait bilong en i olsem ‘mekim gut long man maski em i no mekim gut long yu.’ Sapos wanpela i mekim liklik pasin kranki long yumi, ating i no hatwok long lusim tingting long en, a? Na sapos olgeta taim yumi tingim olsem yumi tu i gat sin, dispela bai helpim yumi long lusim tingting long pasin kranki bilong narapela. (Kolosi 3:13) Taim yumi lusim tingting long pasin kranki bilong narapela, yumi no bel nogut moa long em, na ating pasin pren bilong yumi wantaim dispela man i no ken bagarap. Na ating bihain yumi no tingim moa dispela liklik rong i bin kamap.

Tasol olsem wanem sapos wanpela i mekim bikpela rong tumas long yumi na bagarapim tru bel bilong yumi? Sampela i mekim bikpela rong tumas olsem pasin sem long wanblut, o reipim narapela, o traim long kilim i dai narapela. Sapos wanpela i mekim kain rong olsem long yumi, ating yumi mas tingim sampela samting pastaim na bai yumi inap lusim rong bilong em o nogat. Na dispela i stret moa yet sapos em i tok em i no bin mekim dispela rong, o em i no tanim bel, o em i no tok sori.b (Sindaun 28:13) Jehova i no save lusim rong bilong man nogut tru i no tanim bel. (Hibru 6:​4-6; 10:26) Sapos bel bilong yumi i bagarap stret, ating yumi hatwok tru long lusim tingting olgeta long samting i bin painim yumi. Tasol wanpela samting i ken strongim bel bilong yumi em nupela taim bihain God bai kamapim, long wanem, long dispela taim “ol man bai i no inap tingim moa ol samting i bin kamap bipo.” (Aisaia 65:17; KTH 21:⁠4) Ol samting yumi bai tingim long dispela nupela taim, i no ken bagarapim bel bilong yumi o givim hevi long yumi olsem nau em i save mekim.

Ating sampela taim yumi yet i mas kirap long mekim samting, olsem toktok wantaim man i bin rongim yumi na bihain yumi ken lusim rong bilong em. (Efesus 4:26) Sapos yumi bihainim dispela pasin, yumi inap stretim hevi; em i ken tok sori, na yumi inap lusim rong bilong em. Olsem wanem? Yumi no ken tingim moa dispela rong? Ating yumi hatwok long lusim tingting olgeta long en, tasol yumi no ken bel nogut moa long dispela man o stori long dispela samting bihain long wanpela taim. Long dispela rot i olsem yumi lusim tingting olgeta long rong. Yumi no ken stori nabaut long rong o givim baksait olgeta long man i bin rongim yumi. Tasol ating hap taim i mas lus pastaim na pasin pren bilong yumi wantaim dispela man i ken kamap gutpela gen, tasol ating yumi no inap pas long em olsem bipo.

Tingim wanpela tok piksa: Yu toktok wantaim wanpela gutpela pren yu save bilip long en long wanpela hevi bilong yu, na bihain yu harim olsem em i kamapim dispela tok long narapela man, na dispela i semim yu na bagarapim bel bilong yu. Orait, yu go long em bilong toktok long dispela samting, na em i bel hevi tru long samting em i bin mekim; em i tok sori na askim yu long lusim rong bilong em. Taim em i tok sori long yu, em nau, bel bilong yu i kirap long lusim rong bilong em. Olsem wanem? Yu lusim tingting hariap long dispela rong? Ating nogat, na narapela taim bai yu tingting gut pastaim​—⁠bai yu tokim em long wanpela samting o nogat. Tasol yu lusim rong bilong em; yu no save kamapim ol samting bipo yutupela i bin kros long en. Yu no bel nogut long em o tok baksait long dispela hevi wantaim ol narapela. Tru, ating yu no pas gut wantaim em olsem bipo, tasol yu save laikim em yet olsem brata Kristen bilong yu.​—⁠Skelim wantaim Sindaun 20:19.

Tasol olsem wanem sapos yu hatwok long stretim hevi wantaim man i bin rongim yu, tasol em i no laik tok em i bin rongim yu o em i no laik tok sori long yu? Yu inap lusim rong bilong em olsem yu no ken bel nogut long em? Sapos yumi lusim rong bilong man, i no olsem yumi orait long rong em i bin mekim o ting rong bilong em i olsem samting nating, nogat. Tasol pasin bilong bel nogut long narapela i putim hevi long yumi​—⁠yumi bai tingting olgeta taim long dispela rong, na bel bilong yumi i no inap stap isi. Yumi wet wet long man i rongim yumi i kam na tok sori long yumi na em i no kam, dispela inap mekim na bel hevi bilong yumi i go bikpela moa. Dispela i olsem yumi larim man i bin rongim yumi i bosim tingting na bel bilong yumi. Olsem na yumi mas lusim rong bilong narapela o no ken bel nogut long em. Dispela bai helpim em na yumi yet, na nau yumi inap tingim i stap bilong yumi.

Sampela taim i hatwok long lusim rong bilong narapela. Tasol sapos man i bel hevi tru long rong bilong em na tanim bel, yumi mas wok long bihainim pasin bilong Jehova long lusim rong. Taim Jehova i lusim rong bilong ol man em i no save bel nogut long ol​—⁠em i klinim o rausim sin bilong ol na em i no tingim moa, olsem bihain em i no ken kotim ol long ol rong ol i bin mekim. Yumi tu i ken wok long no ken bel nogut long man i mekim rong na em i tanim bel. Tasol long sampela samting ating yumi no gat wok long lusim rong bilong man. Sapos wanpela i mekim bikpela rong tumas long narapela na em i no tanim bel, i no stret yumi strong long em i mas lusim rong bilong man i bin rongim em. (Skelim wantaim Song 139:​21, 22.) Tasol ating yumi ken lusim planti rong narapela i mekim long yumi, olsem yumi no bel nogut long em, na tingim gen long wanpela taim bihain dispela rong brata i mekim long yumi.

[Ol Futnot]

[Piksa long pes 24]

Josep na ol brata bilong em