Ol Gutpela Rip i Gat Kala Kala

WANPELA MAN LONG PAPUA NIUGINI I RAITIM DISPELA STORI BILONG KIRAP!

KLOSTU olgeta nambis bilong Papua Niugini i gat rip. Bipo, boskru bilong ol sip i ting ol rip i samting nogut tasol bilong kisim bagarap long en. Tasol ol man i bin go daun insait long solwara i gat rip, ol i ting rip i olsem dua bilong ples i gat ol naispela samting i gat kala kala na ples bilong ol samting i stap isi tru.

I hatwok tru long kisim piksa bilong ol samting i stap insait long solwara, long wanem, i olsem ol samting insait long solwara i stap klostu, tasol nogat; ol i stap longwe. Olsem na i hatwok long kisim gutpela piksa long ol samting, long wanem, wara i save mekim kain kain samting long lait, olsem pulim lait, tromoi nabaut, na mekim i go krungut nabaut. Na kala bilong ol samting insait long solwara inap senis sapos i gat san, o ren, o san i stap antap o i no antap tumas, o ol liklik samting i gat laip na i olsem gras ol i wokabaut insait long wara, o wara i daun tru o i no daun tumas, o as bilong solwara i wesan o ston o kala bilong en i save senis senis. I gat narapela samting tu i mekim na i hatwok long kisim piksa insait long solwara, olsem: Solwara, na samting man i laik kisim piksa long en, na man yet​—⁠olgeta i no save stap isi liklik!

Tasol maski i gat ol dispela hevi, sampela man bilong kisim piksa ol i bin kisim ol gutpela piksa. Ol piksa yu lukim hia, mipela bin kisim taim mipela raun insait long solwara. Mipela i laik bai yu save long 4-pela gutpela samting mipela bin kisim piksa long en insait long solwara.

Poto 1 i kamapim piksa bilong wanpela naispela gam bilong solwara i gat nem taiga kauri (Cypraea tigris) o girigiri. Dispela nem taiga kauri i narapela kain, long wanem, naispela skin bilong en i no gat ol longpela makmak olsem taiga, nogat; skin i gat ol raunpela makmak long en. Rip i ples tru bilong painim ol gam girigiri, long wanem, ol i save kaikai nupela rip na ol kain samting olsem mosong. Ol Saina bilong bipo ol i bin laikim tru ol girigiri, olsem na ol i bin mekim wok long en olsem mani. Hia long Papua Niugini long sampela maket, ol asples i save mekim wok yet long ol girigiri olsem mani. Tasol planti man long hia i save bungim ol girigiri, long wanem, naispela skin bilong en i save lait.

Poto 2 em wanpela kain liklik snek i gat ol naispela kala (Spirobranchus giganteus). Em i save stap long rip i dai pinis o em i wokim hul i go insait long rip i stap laip. Taim em i malolo, em i luk olsem wanpela plaua. Tasol taim em i hangre, em i save tanim tanim ol longpela longpela samting bilong en olsem gras na i kamap olsem wanpela “umben” bilong kalabusim kwik abus bilong en. Taim liklik snek i meknaisim ol longpela longpela samting bilong en olsem gras, em i luk olsem wanpela liklik lain i holim fen na ol i danis. Dispela snek i liklik tru​—⁠bikpela bilong en i olsem 10 milimita tasol. Tasol man bilong kisim piksa long en i mas was gut, nogut em i meknais hariap. Taim liklik snek i save birua i stap, wantu tasol em bai sut i go bek insait long rip.

Poto 3 em wanpela mosong bilong solwara. Em i no wankain olsem dispela mosong ol man yet i wokim na sampela man i save mekim wok long en taim ol i waswas, nogat. Mosong bilong solwara em samting i gat laip, em i no wanpela purpur samting. Mosong bilong solwara i gat planti planti sel olsem ol liklik hul na ol dispela sel i wok wantaim long narapela kain pasin tru. Buk The Undersea i tok, ol sel bilong mosong i no save wok wantaim, na narapela i no save helpim narapela. Olsem na sapos yumi brukim mosong taim em i stap laip, bihain ol wan wan hap bilong en i bruk bai kamap wanpela nupela mosong. Na maski wan wan sel yet i bruk na ol i no wok moa wantaim, bai ol i wokabaut i go inap long ol i bung gen na ol bai wok long kamap wanpela mosong gen.

Mosong i no olsem purpur samting i save kamapim kaikai bilong en yet, nogat; mosong i save raun painim kaikai bilong en. Em i save pulim wara klostu long en na sipim bilong painim ol liklik samting i stap laip. Olsem ol animal, bel bilong mosong i save mekim wok long kaikai na bihain em i rausim pipia bilong en olsem pekpek. Yu inap painim mosong i pas long ol ston o long skin bilong gam samting long as bilong solwara.

Laspela em poto namba 4, na em i piksa bilong wanpela kramsel. Kramsel i save stap tasol, olsem na yu inap painim ol namel long rip o long as bilong solwara. Bilong kisim kaikai, planti kramsel i save pulim ol liklik samting i stap laip na i olsem gras. Kramsel i gat tupela hap skin. Wanpela strongpela skin i malumalum na i save pasim tupela hap wantaim, na tupela strongpela masol i save opim na pasim dispela tupela hap bilong kramsel. Taim kramsel i laik wokabaut, em i save opim tupela hap skin bilong en na lek bilong en i save kam ausait liklik. Tasol sapos birua i kam klostu, lek bai go bek insait na tupela hap bilong en i pas.

Ol dispela piksa i kamapim wan wan samting tasol bilong planti gutpela samting i stap insait long ol solwara i gat rip​—⁠em narapela hap i save kamapim long ples klia gutpela tingting na save bilong Jehova long wokim ol samting.​—⁠Rom 1:⁠20.

[Ol Piksa long pes 16, 17]

1. Ol i mekim wok yet long girigiri olsem mani

2. Ol dispela “plaua” i no plaua tru, em ol liklik snek

3. Mosong em samting i gat laip; em i no wanpela purpur samting

4. Kramsel i save kaikai liklik samting i stap laip na i olsem gras (em maus bilong en)