Skelim Gut Ol Amamas

Ol amamas i save mekim wanem long ol pikinini? Alvin Poussaint, em i wanpela tisa na dokta i bin wok wantaim ol pikinini inap 30 yia, na em i bilip strong olsem ol piksa wokabaut i stori long ol samting bilong maritpasin na pasin bilong pait na bagarapim man, ol i lainim ol pikinini long ting kain pasin olsem i stret. Em i stori tu long narapela samting nogut olsem: “Mi bin lukim sampela pikinini i kam bek long haus bihain long ol i bin lukim kain piksa wokabaut olsem, na ol i gat pasin bilong pret pret​—⁠o ol i gat pasin bilong pait. Mi bin lukim sampela narapela pikinini i pas strong long skin bilong papa o mama olsem ol i bin mekim taim ol i liklik yet o ol i putim bikpela pinga long maus bilong ol na pulim olsem susu o ol i pispis long bet taim ol i slip.” Dispela dokta i tok, ol saveman i bin raitim ol buk i stori long ol narapela samting i as bilong ol dispela kain pasin, olsem: Pasin bilong paitim nogut pikinini o mekim pasin sem long pikinini o pikinini i sindaun long wanpela hap i gat pait long en, o kain samting olsem. Alvin Poussaint i tok: “I no gat wanpela bilong yumi i laik bai kain samting olsem i painim wanpela pikinini, tasol yumi no save mekim wanpela samting bilong pasim ol long lukim ol piksa wokabaut i stori long ol samting nogut yumi no laik ol i lukim tru long haus o long rot samting.”

I gat gutpela as na ol Kristen i skelim gut ol amamas, nogut ol i laikim wanpela amamas i save kalapim ol lo bilong Baibel. Buk Song 11:5 i tok: “Bikpela i save skelim ol stretpela man na ol man nogut. Em i no laikim tru ol man i sakim lo bilong em.” Na Kristen aposel Pol i tok: “Olsem na yupela i mas kilim i dai olgeta pasin bilong dispela graun i stap long bel bilong yupela. Mi tok long olkain pasin olsem, pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal long ol samting bilong narapela man. . . . Yupela i mas rausim olgeta kain pasin nogut, em pasin bilong kros na belhat na bel nogut, na pasin bilong tok nogut long ol arapela na pasin bilong mekim toktok i doti.”​—⁠Kolosi 3:​5, 8.

Olsem na ol papamama i mas was gut long ol samting bilong amamas ol i makim bilong ol pikinini​—⁠na ol yet​—⁠i ken lukim, nogut dispela samting i kamapim “pasin bilong olpela bel.” (Galesia 5:​19-21) Ol i mas skelim gut ol samting ol i lukim, na hamas aua ol i lusim long amamas.​—⁠Efesus 5:​15-17.