Kot Bilong Rasia i Stretim Bek Nem Bilong Ol Witnes Bilong Jehova

OL WITNES BILONG JEHOVA i amamas long ol nius samting i stori long ol sapos stori bilong ol i stret. Na tu, ol Witnes Bilong Jehova i gat laik long tokaut stret long ol yet na long ol bilip na wok bilong ol. Tasol taim sampela lain i prinim ol stori i no stret o i bagarapim nem bilong ol, sampela taim ol Witnes i go long kot bilong helpim bilip bilong ol na bai ol inap mekim ol samting i stret ol i mekim. Tingim wanpela samting nau tasol i kamap.

Long Ogas 1, 1997, niuspepa Komsomolskaya pravda, em planti man long Rasia ol i save kaunim, em i gat wanpela hap pepa i kam wantaim, em bilong Sen Pitasbek, na stori bilong en i bagarapim tru nem bilong ol Witnes Bilong Jehova. Het-tok bilong stori i olsem: “Liklik Lotu Nating Bilong Pitasbek. Bai i Gat Wanpela Biktaun-Haus Lotu Long Hia.” Man bilong raitim dispela stori em Oleg Zasorin, na em i tok ol bilip bilong ol Witnes i save mekim nogut long ol man, na wok bilong ol i save brukim Konstitusen Bilong Rasia. Planti tok bilong dispela man em ol tok kranki long sampela bilip bilong ol Witnes em Baibel i as bilong en, olsem bilip bilong ol long blut na i stap bilong ol wantaim famili. Na tu, dispela stori i tok ol Witnes Bilong Jehova i olsem wanpela “liklik lain nating bilong lotu,” na em i tok, long tingting bilong sampela man, lotu bilong ol em “lotu nogut bilong bagarapim man, winim ol narapela liklik lotu nating.”

Nambawan ofis bilong ol Witnes Bilong Jehova long Rasia, ol i askim kot (Russian Federation Presidential Judicial Chamber for Media Disputes) long skelim gen ol dispela tok long niuspepa, em ol Witnes Bilong Jehova i bilip olsem em i giamanim ol man. Kot i kamap long Februeri 12, 1998, na ol mausman bilong ol Witnes ol i stap na ol i bekim planti askim ol lain bilong harim kot na ol niusman na ol loya ol i bin kamapim. Bilong save tru long ol samting ol Witnes i bilip long en na skulim ol man long en, lain bilong harim kot ol i skelim gut sampela buk ol Witnes i save wokim, na ol i skelim moa yet buk The Secret of Family Happiness.

Wanpela bikman bilong State Duma of the Russian Federation, nem bilong em V. V. Borshchyov, em i tok taim ol man i save tingim “ol liklik lain nating bilong lotu,” ol i save tingting kranki long ol. Mista Borshchyov i tok: ‘Pasin bilong paulim tok olsem, na pasin bilong kolim wanpela lain olsem liklik lain nating bilong lotu, em i samting nogut tru. Kot i orait long ol Witnes Bilong Jehova i askim ol long tingim dispela samting, na dispela i bikpela samting. Yumi mas pasim ol planti tok bilas na tok nogut ol man i save mekim long ol lotu em gavman i orait long ol.’

Taim kot i harim pinis ol tok, kot i tok dispela stori i bin kamap long niuspepa Komsomolskaya pravda, em i brukim lo bilong gavman na i no stret. Na tu, kot i tok planti tok giaman i stap long dispela stori na ol tok i no gat as. Kot i tok: ‘Man bilong raitim dispela stori em i no bin kamapim sampela as tru bilong ol tok em i bin raitim. Em i bin kamapim ol tok win olsem dispela ol tok em i tru, na em i mekim wok nogut long ol samting i stret ol niusman i ken mekim.’ Kot i kisim save olsem ol Witnes Bilong Jehova ol i narapela kain long tok dispela niuspepa i bin kamapim; ol i save bihainim lo na ol i save skulim lain bilong ol long stap isi wantaim famili na ol narapela, maski ol i no gat wankain bilip.

Kot i harim pinis ol tok na wanpela aua bihain, kot i tokaut olsem:

“1. Ol i mas save dispela stori ‘Liklik Lotu Nating Bilong Pitasbek. Bai i Gat Wanpela Biktaun-Haus Lotu Long Hia,’ em i brukim Lo Namba 4, 49, na 51 bilong Lo Bilong Federesen Bilong Rasia long ‘Ol Nius na Televisen Samting.’

“2. Ol bai tokim wanpela komiti (State Committee of the Russian Federation Responsible for Printed Matter) long tingim gen olsem ol i mas givim tok lukaut long lain edita bilong niuspepa Komsomolskaya pravda.

“3. Long givim strongpela tok long niusman O. Zasorin.

“4. Ol bai tokim lain edita bilong niuspepa Komsomolskaya pravda long tokaut olsem ol i sori long ol i bin kamapim wanpela stori kranki i no gat as na i daunim oganaisesen bilong lotu bilong ol Witnes Bilong Jehova.”

Dispela tok bilong kot i wankain olsem tok bilong wanpela saveman bilong lotu, em Sergei Ivanenko. Mista Ivanenko, em i no wanpela Witnes Bilong Jehova, na taim em i skelim gut ol bilip bilong ol Witnes na em i bung wantaim ol, em i raitim wanpela stori i bin kamap long niuspepa Moscow News bilong Februeri 20-26, 1997.a Mista Ivanenko i tok: “Ol Witnes Bilong Jehova i gat nem olsem ol man i gat strongpela bilip long bihainim ol tok bilong Baibel. . . . Long ol Witnes Bilong Jehova, Baibel i olsem mama lo, na lo bilong olgeta man, na nambawan tok i tru. Ol Witnes Bilong Jehova i stap olsem gutpela piksa long ol narapela man, long wanem, ol i save givim bel tru long tok i tru bilong Baibel, na ol i strong long holimpas bilip bilong ol, maski ol i kisim nogut long dispela.”

Tok bilong kot na toktok bilong Mista Ivanenko i strongim gen tok, olsem lotu Kristen bilong ol Witnes Bilong Jehova i no save bagarapim ol manmeri, nogat; lotu bilong ol i save helpim ol manmeri i gat stretpela bel. Sapos sampela i askim ol Witnes long as bilong ol gutpela samting ol i wetim i stap, orait ol i redi oltaim long bekim tok long ol. Tasol ol i save bekim tok bilong ol long tok isi na long gutpela pasin.​—⁠1 Pita 3:⁠15.

[Futnot]