Ol Marit Inap Kamap Wanbel Gen?

Wanpela buk (Couples in Crisis) i tok: “I no hatwok long kirap hariap long mekim ol samting bilong katim marit, tasol ating i gat planti marit em ol inap i stap gut wantaim sapos ol i stretim hevi bilong ol.”

DISPELA tok i wankain olsem tok Krais Jisas i mekim long bipo yet long pasin bilong katim marit. Tru, em i tok poroman marit i no gat asua, em i ken katim marit sapos poroman bilong em i no bin stap gut long em, tasol Jisas i no tok em i mas mekim olsem. (Matyu 19:​3-9) Ating i gat as na poroman marit i no gat asua, em i laik marit bilong ol i no bruk. Man i bagarapim marit, ating em i laikim yet meri bilong em.a Ating em i save tingim tru meri bilong em na em i wanpela gutpela papa i givim bel long lukautim ol pikinini long ol samting bilong skin. Taim poroman marit i no gat asua i skelim ol samting em yet na ol pikinini bilong em i mas kisim, ating em i laik kamap wanbel gen wantaim man bilong em na em i no laik katim marit. Sapos em i laik mekim olsem, i gat wanem ol samting em i ken tingim, na em i ken mekim wanem bambai wok bilong em long stretim bek marit em inap kamap gutpela?

Pastaim yumi mas tok olsem em i hatwok long katim marit na em i hatwok tu long kamap wanbel gen. Na tu, meri i lusim rong bilong man i bin bagarapim marit, ating dispela tasol i no stretim as bilong ol hevi bilong marit. Ol i mas skelim gut bel bilong ol, na toktok gut wantaim, na wok strong bambai marit bilong ol i no ken bagarap. Planti marit i no ting olsem ol i mas tromoi bikpela hap taim na wok strong bilong stretim bek marit i gat ol bikpela hevi. Tasol planti marit i no bin les long mekim olsem, na nau marit bilong ol i stap gut.

Ol Askim Yu Mas Bekim

Bilong poroman marit i no gat asua em i laik pasim tok long bel long ol samting em bai mekim, em i mas skelim gut bel bilong em na ol samting em inap mekim. Em inap skelim ol askim olsem: Man i laik kam bek na i stap wantaim mi? Em i lusim tru dispela meri em i bin pamuk wantaim em, o em i no laik mekim olsem hariap? Em i bin tok sori? Sapos em i bin tok olsem, em i tanim bel tru na bel hevi long pasin em i bin mekim? O em i tok, em asua bilong mi na em i mekim dispela rong? Em i bel hevi tru long bikpela hevi pasin bilong em i bin kamapim? O em i no amamas liklik, long wanem, pasin nogut bilong em i kamap long ples klia na nau i hatwok long em long prenim dispela meri?

Olsem wanem long bihain? Em i kirap stretim ol tingting na pasin bilong em i bin stiaim em long mekim pasin pamuk? Em i tok strong olsem bai em i no mekim gen dispela pasin nogut? O em i save grisim yet ol meri na kamap olsem pren bilong ol? (Matyu 5:​27, 28) Em i gat bikpela laik tru long stretim bek marit bilong yupela? Sapos olsem, em i wok long mekim wanem samting bilong mekim olsem? Sapos bekim bilong ol dispela askim em yes, ating i gat as na yupela i ken bilip olsem yupela inap stretim bek marit bilong yupela.

Toktok Gut Wantaim

Wanpela man bilong raitim Baibel, em i tok: “Sapos man i no toktok gut wantaim ol narapela, ol samting em i laik mekim i no inap kamap gut.” (Sindaun 15:​22, NW ) Dispela tok em i stret tru taim poroman i no gat asua em i pilim olsem em i mas toktok wantaim man bilong em long pasin nogut em i bin mekim. I no gat wok long stori long olgeta liklik liklik samting i bin kamap, tasol ol i ken toktok gut wantaim na ating dispela bai kamapim long ples klia wanem samting tru i bin kamap, na pinisim ol tingting kranki. Na sapos tupela i mekim olsem, dispela inap helpim ol na ol tingting kranki na kros i stap longpela taim bai i no mekim na narapela i surik moa long narapela. Tru, ating man na meri bai hatwok long toktok long dispela hevi. Tasol planti marit i kisim save olsem em i bikpela samting long toktok gut wantaim bambai narapela i ken bilip gen long narapela.

Narapela bikpela samting bilong mekim bambai tupela marit i ken kamap wanbel gen, em ol i mas save long ol hevi insait long marit bilong ol​—⁠ol samting ating tupela wantaim i mas wok long stretim. Zelda West-Meads i tok: ‘Taim yupela i toktok pinis long dispela bikpela hevi, na taim yupela i save pinis olsem man bai no prenim moa dispela narapela meri, na yupela i no gat laik long katim marit, orait, yupela i mas skelim gut wanem samting i mekim na hevi i bin kamap insait long marit, na wok long stretim bek marit bilong yupela.’

Ating narapela i no bin tingim ol gutpela pasin bilong narapela, o yupela i no bin mekim ol wok bilong spirit. Ating yupela i no bin lusim bikpela hap taim bilong poroman gut wantaim, o narapela i no bin mekim gutpela pasin sori long narapela, o mekim sampela tok amamas, o litimapim nem bilong poroman, em ol samting poroman i laik yu mekim long em. Taim yupela i skelim gen ol samting yupela i laik mekim na ol samting i bikpela samting long yupela, dispela bai helpim yupela long pas gut wantaim na bihain dispela hevi i no ken kamap gen.

Lusim Tingting Long Rong

Maski meri i wok strong long lusim rong bilong man bilong em, ating em bai hatwok tru long mekim olsem, na em bai hatwok moa long lusim sin bilong dispela meri em man i bin pamuk wantaim em. (Efesus 4:​32) Tasol isi isi em inap lusim pasin bilong kros na bel nogut long man. Wanpela buk i tok: ‘Poroman i no gat asua, em i mas save olsem em i no ken tingting tasol long dispela hevi, nogat; nau tupela i mas kirap na wok gut wantaim. Taim ol i tok pait samting, em i bikpela samting long ol i no ken kolim gen ol rong poroman bilong ol i bin mekim bipo bilong givim strafe long em.’

Planti marit i bin kisim save olsem taim ol i wok strong long daunim ol tingting nogut bilong ol, bihain ol i no kros moa long poroman i bin bagarapim marit. Em i bikpela samting long mekim olsem bilong stretim bek marit.

Lain Long Bilip Gen Long Poroman

Wanpela meri marit i tingting planti, em i askim olsem: “Narapela inap bilip gen long narapela?” I gat as na em i tingting planti, long wanem, pasin nogut bilong man bilong em i bin bagarapim pasin bilong meri long bilip long em. I no hatwok long bagarapim wanpela gutpela plet samting, na olsem tasol i no hatwok long bagarapim pasin bilong bilip long narapela, tasol i hatwok long stretim bek ol samting i bagarap. Narapela i mas bilip long narapela na daun long em bambai marit i no ken bruk, na tupela i ken i stap amamas.

Bilong mekim olsem, narapela i mas lain long bilip gen long narapela. Poroman i gat asua, em i no ken strong na tok poroman marit i mas bilip long em, nogat; tasol em i ken helpim poroman long bilip gen long em taim em i kamapim stret ol samting em i mekim na em i no haitim wanpela samting. Baibel i tokim ol Kristen long ‘lusim pasin bilong giaman na long mekim tok tru tasol’ long ol narapela. (Efesus 4:​25) Bilong poroman bilong yu inap bilip gen long yu, Zelda West-Meads i tok, “yu ken givim pepa long em i makim ol raun bilong yu. Tokim poroman bilong yu long ol hap yu bai go long en, na long wanem taim bai yu kam bek, na yu mas i stap long ol dispela hap yu bin tokim em long en.” Sapos sampela senis i kamap long raun bilong yu, tokim poroman bilong yu long dispela samting.

Bilong poroman i ken amamas gen long em yet, ating bikpela hap taim i mas lus na em i mas wok strong bilong mekim olsem. Poroman i gat asua em i ken helpim meri bilong em long amamas gen, na tokim em planti taim olsem em i laikim em tru na em i amamas long em. Wanpela meri bilong givim tok long ol marit, em i tok: “Tingting long gutpela pasin bilong meri na long gutpela wok em i bin mekim, na givim biknem long em.” (Sindaun 31:31) Meri marit i ken tingting long ol samting em i save mekim gut bambai em i ken wok long kamapim gen pasin bilong amamas long em yet.

Bikpela Hap Taim i Mas Lus

Pasin bilong bagarapim marit i save kamapim bikpela bel hevi, olsem na yumi no ken kirap nogut long meri i tingim dispela pasin nogut inap planti yia na bel hevi tru long en. Tasol taim bel hevi i wok long pinis na tupela wantaim i gat pasin daun, na pasin bilong i no les kwik, na pasin bilong sanap strong na karim hevi, dispela bai helpim narapela long bilip na daun gen long narapela.​—⁠Rom 5:​3, 4; 1 Pita 3:​8, 9.

Wanpela buk (To Love, Honour and Betray) i tok: ‘Bikpela bel hevi em meri i kisim taim dispela hevi i nupela i go inap long sampela mun, bai em i no stap oltaim. Bel hevi bai go liklik, na bihain inap sampela de, na sampela wik, na sampela mun, na sampela yia tu bai em i no tingting moa long dispela hevi.’ Taim yupela i wok long bihainim ol lo bilong Baibel long marit bilong yupela, na askim Jehova long blesim na stiaim yupela, bai yupela i kisim “bel isi God i save givim yumi.”​—⁠Filipai 4:​4-7, 9.

Pedro i tok: “Taim mi tingting bek, dispela samting i bin painim mipela i senisim i stap bilong mipela. Sampela taim mipela i mas stretim yet wan wan samting long marit bilong mipela. Tasol dispela hevi i no bin bagarapim mipela. Mipela i marit yet, na mipela i stap amamas.”

Tasol olsem wanem sapos i no gat as na poroman i ken lusim tingting long rong bilong poroman bilong em? O olsem wanem sapos em i lusim tingting long rong bilong poroman (olsem em i no kros moa long em), tasol i gat gutpela as na em i laik katim marit olsem Baibel i tok em i ken mekim?b Pasin bilong katim marit inap putim wanem ol hevi long man na meri? Mipela i laik kirapim yu long tingim ol samting pasin bilong katim marit em inap kamapim, na tu, olsem wanem sampela i bin karim hevi bilong en.

[Ol Futnot]

[Blok long pes 6]

GUTPELA HELPIM

I gat planti samting bilong tingim, olsem na i gutpela sapos meri i askim wanpela man i gat gutpela save na tingting na i gat wok long helpim ol man i gat hevi long helpim em. Olsem: Ol Witnes Bilong Jehova ol inap askim ol elda bilong kongrigesen i gat gutpela pasin sori long helpim ol.​—⁠Jems 5:​13-​15.

Ol man bilong givim gutpela tingting long narapela, na ol pren, na ol wanblut, ol i no ken kamapim tingting bilong ol yet o tokim meri long katim marit sapos Baibel i orait long em i mekim olsem o long stap wantaim poroman bilong em, na ol i no ken tokim em olsem i no stret em i mekim olsem. Wanpela meri Kristen i katim marit, em i tok: “Strongim bel bilong mipela, na larim mipela yet i skelim wanem samting mipela i laik mekim.”

Baibel i mas i stap olsem as bilong ol tok man i givim long narapela. Wanpela meri i bin katim marit, em i tok: “Yu no ken tokim ol long ol samting ol i ken tingting long en o ol i no ken tingting long en, nogat. Larim ol i kamapim ol tingting i stap long bel bilong ol.” Pasin sori, pasin bilong laikim tru ol brata, na pasin bilong pilim tru hevi bilong narapela bai mekim gut bel bilong man, em poroman marit bilong em i no bin stap gut long em. (1 Pita 3:⁠8) Wanpela man i gat save long givim gutpela tingting long ol man i gat hevi, em i tok: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em. Tasol tok bilong man i gat gutpela tingting i save helpim ol man olsem gutpela marasin.”​—⁠Sindaun 12:⁠18.

Wanpela man marit i bin stap gut long meri bilong em, em i tok: ‘Mi laik ol narapela i pilim hevi bilong mi, na mekim sampela tok bilong mekim gut bel bilong mi, na strongim mi. Na meri bilong mi i laik tru long narapela i givim sampela tok bilong stiaim em, na tok amamas long em i wok strong long stretim pasin bilong em​—⁠olsem sampela tok i ken helpim em tru long mekim yet ol samting em i mas mekim.’

Sapos bihain long wanpela man o meri i bin tingim gut olgeta samting na beten askim Jehova long givim gutpela tingting long em, na em i laik katim marit o lusim poroman bilong em na Baibel i orait long dispela, ol narapela i no ken givim sampela tok long em long pasin i sutim bel bilong em na em i pilim olsem em i mekim rong. Nogat, ol i mas helpim em bambai bel bilong em i no kotim em long samting em i no gat asua long en.

Wanpela man i bin kisim dispela hevi, em i tok: ‘Sapos yu laik mekim gut bel bilong man i gat hevi long marit, yu no ken lusim tingting olsem bel bilong em i bagarap tru.’

[Blok long pes 7]

AS NA SAMPELA I STAP WANTAIM

Long planti ples, i gat sampela meri marit em ol i mas i stap wantaim man bilong ol maski em i bin pamuk na em i no tanim bel. Olsem: Sampela meri Kristen i stap long ol ples i gat pait o long ol hap ol man i save kisim liklik pe, tasol ol i stap wantaim man bilong ol, maski em i no wanbilip bilong meri na em i man bilong pamuk. Meri i mekim olsem, long wanem, man i save lukautim yet famili bilong em. Olsem na ol dispela meri ol i gat haus, na man bilong lukautim ol, na mani, na i stap bilong ol i gutpela liklik, long wanem, papa i stap wantaim famili​—⁠maski em i no save stap gut long meri bilong em. Maski ol i no laik i stap wantaim man bilong ol na i hatwok long mekim olsem, tasol ol i ting taim ol i stap wantaim man, dispela i helpim ol long i stap gutpela liklik na ol meri yet i no ken hatwok long lukautim famili.

Taim ol i stap olsem​—⁠sampela taim inap planti yia​—⁠sampela meri marit ol i kisim gutpela blesing taim man bilong ol i senisim pasin bilong em, na em i kamap man Kristen i gat pasin sori na em i stap gut long meri bilong em.​—⁠Skelim wantaim 1 Korin 7:​12-​16.

Olsem na ol meri i laik i stap wantaim man bilong ol​—⁠maski em i no tanim bel​—⁠ol narapela i no ken sutim tok long ol dispela meri. Samting ol i bin pasim tok long mekim i hatwok tru long ol i mekim, olsem na ol narapela i mas helpim ol na strongim bel bilong ol.

[Blok long pes 8]

ASUA BILONG HUSAT?

Tru, sampela taim pasin kranki bilong poroman i no gat asua i mekim na tupela i no pas gut wantaim, tasol Baibel i tok, “bel bilong yumi olgeta wan wan i save kirap na pulim yumi. . . . Dispela pasin bilong bel i kirap, em i olsem meri i kisim bel, na bihain em i save kamapim sin, olsem meri i karim pikinini.” (Jems 1:​14, 15) Tru, ating kain kain samting i mekim na man i mekim pasin pamuk, tasol “bel bilong man yet” i kirapim em long mekim olsem. Sapos pasin kranki bilong poroman i mekim na tupela marit i gat ol hevi, pasin bilong bagarapim marit i no rot bilong stretim ol dispela hevi, nogat.​—⁠Hibru 13:⁠4.

Taim man na meri ol i wok strong long bihainim ol lo bilong Baibel, ol inap stretim ol hevi bilong marit. Bilong mekim olsem narapela i mas ‘karim hevi na lusim sin bilong narapela.’ Na tu, ol i mas strong long kamapim ol pasin olsem pasin bilong ‘sori tru long ol arapela na mekim gut long ol. Ol i mas daunim ol yet na mekim pasin isi long ol man, na ol i no ken belhat kwik long ol man i rongim ol.’ Na bikpela samting tru, ‘ol i mas givim bel long narapela. Dispela pasin i winim tru olgeta narapela pasin.’​—⁠Kolosi 3:​12-​15.

[Piksa long pes 7]

Taim narapela i putim gut yau long tok bilong narapela, dispela i ken helpim ol long stretim bek marit bilong ol