Was Gut Long Ol Samting Yu Lukim Long Televisen
TELEVISEN i stap olsem “namba wan rot bilong kisim ol stori, na i olsem meri bilong lukautim ol pikinini, na samting i save stiaim tingting bilong planti man.” Dispela tok i stap long wanpela ripot (Not in the Public Interest—Local TV News in America) sampela lain bilong Yunaitet Stets i save skelim wok bilong TV samting ol i bin kamapim. Olsem ripot i kamapim, “rot i op long lukim TV long olgeta taim na i stap long olgeta hap . . . I olsem smok bilong wanpela sigaret i stap long win na i raunim yumi.” Maski yu yet yu no smok, pasin bilong pulim dispela win bilong smok inap bagarapim yu, na i wankain long pasin bilong i stap planti aua na lukim wanem wanem program i kamap long TV—em tu inap bagarapim yumi, na em inap bagarapim moa yet ol pikinini.
Dispela ripot i stori long samting i save kamap long TV olsem pasin raskol na pasin bilong bagarapim narapela, na ripot i tok: “Planti taim ol saveman i skelim dispela samting na ol i tok, taim ol pikinini i lukim pasin bilong bagarapim man long TV, dispela i save mekim na pikinini i no inap lain gut long ol samting, na em i no inap bosim belhat o pilim tru hevi bilong ol narapela.” Long 1992, wanpela lain (The American Medical Association) i tok olsem “pasin bilong lukim ol man i mekim nogut long ol narapela long TV em inap nogutim skin na tingting bilong ol yangpela.”
Yu ken mekim wanem na ol piksa nogut bilong TV i no inap bagarapim tingting bilong ol pikinini bilong yu? Ol man i wokim dispela ripot i kisim sampela tingting bilong ol lain i save skelim ol samting i laik nogutim skin o tingting bilong ol man, na ol i kamapim wanpela lista bilong olsem wanem yumi ken bihainim gutpela tingting taim yumi mekim wok long TV. Sampela tok bilong dispela lista i stap daunbilo.
◼ Makim ol samting yu laik lukim long TV na makim sotpela taim tasol bilong lukim. Makim taim stret bilong ol pikinini i ken lukim. No ken putim wanpela TV long rum bilong ol pikinini.
◼ Putim wanpela mep klostu long TV na taim wanpela program i stori long wanpela ples, ol i ken lukim long mep.
◼ Sindaun wantaim ol pikinini taim ol i lukim TV, bilong helpim ol long save wanem ol samting i tru, na wanem ol samting i stori nating tasol. Planti pikinini i no winim yet 10-pela krismas ol i no inap save long dispela samting.
◼ Putim TV bilong yu long wanpela hap bilong haus em bai i no ken i stap long ai bilong famili long olgeta taim. Putim long wanpela kabot i gat dua long en. Dispela bai mekim na i hatwok liklik long opim paua na skelim hariap wanem program i stap long olgeta wan wan hap.