Skul Bilong Kisim Gutpela Sindaun
“Baibel [em i ] nambawan gutpela samting bilong stiaim wokabaut bilong yumi.”—Thomas Tiplady, 1924.
MIPELA i no giaman taim mipela i tok, skul man i kisim long Baibel inap kamapim bikpela senis long laip bilong em. Long rot bilong dispela skul ol man em bel bilong ol i bagarap olgeta, ol i bin kisim save olsem laip i gat as bilong en, na ol inap wetim ol gutpela samting. Wanpela mama wanpis bilong Namibia i bin raitim pas i go long brens-ofis bilong ol Witnes Bilong Jehova long Saut Afrika na tok olsem:
“Mi gat 29 krismas, na insait long 2-pela de tasol mi ritim buk Sampela Askim Bilong ol Yangpela—Ol Gutpela Bekim. Mi pilim tru tok bilong en, long wanem, mi bel hevi tru long stap wanpis. Boipren bilong mi i bin dai taim ka i bam long rot, na nau mi wanpela tasol i stap wantaim tupela pikinini bilong mipela. Mipela i karim bikpela hevi tru. Bipo mi bin ting olsem em bai i gutpela sapos mi kilim i dai tupela pikinini na mi yet. Tasol taim mi kisim dispela buk, mi senisim tingting bilong mi. Plis helpim mi long rot bilong Baibel-stadi kos i no gat pe.”
Baibel em i wanpela buk bilong soim rot long man, em inap mekim olgeta samting long i stap bilong em i kamap gutpela—i stap bilong em wantaim famili, ol wanwok, na ol narapela manmeri bilong komiuniti. (Song 19:7; 2 Timoti 3:16) Em i givim stretpela tingting i helpim man long mekim ol samting i gutpela na abrusim ol pasin nogut. Em i wanpela buk i kamapim ol tok i stret long i stap bilong man. Taim yu ritim Baibel, yu bai luksave olsem dispela buk i gat planti stori bilong ol man i bin stap tru tru long bipo. Yu bai kisim save long ol samting i bin mekim na sampela man i stap gut na amamas, na sampela narapela man i stap nogut na bel hevi. Ol samting i gutpela long mekim na ol samting i no gutpela long mekim bai i kamap ples klia.
Skul Bilong Helpim Yu Long Nau
Baibel i tok gutpela tingting em i bikpela samting. Em i tok olsem: “Nambawan samting yu mas kisim, em i gutpela tingting.” (Sindaun 4:7) Na tu, Baibel i tokaut olsem planti taim man i sot long gutpela tingting, olsem na em i kirapim ol long mekim olsem: “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. God i save givim planti samting long olgeta man.”—Jems 1:5.
Man bilong wokim olgeta samting, em God Jehova, i givim gutpela tingting long yumi olsem wanem? Em i mekim olsem long rot bilong tok bilong em i stap long Baibel, em i kirapim yumi long ritim dispela tok. God i tok: “Pikinini, yu mas harim tok bilong mi na putim gut long tingting bilong yu. Yu mas putim yau gut long olgeta tok i save givim yu gutpela tingting . . . , bai yu save tru long pasin bilong stap aninit long Bikpela, na bai yu save gut long God. Long wanem, Bikpela yet em i as bilong gutpela tingting.” (Sindaun 2:1, 2, 5, 6) Taim yumi bihainim tok i stap long Baibel na luksave long gutpela helpim bilong en, yumi bai pilim tru olsem em i gutpela tingting i kam long God.
Olsem: Tingim hevi bilong stap rabis. Baibel i kirapim ol man long givim bel long wok, na tu, Baibel i mekim tok lukaut long ol samting i save pulim nating mani. Olsem na ol pasin nogut olsem pasin bilong smok na dring planti tumas bia samting i no stret liklik wantaim ol lo bilong Baibel.—Sindaun 6:6-11; 10:26; 23:19-21; 2 Korin 7:1.
Ol poroman inap mekim wanem long i stap bilong yumi? Baibel i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Olsem wanem? Yu bin lukim pasin bilong ol wanlain long pulim man—ol yangpela na ol lapun tu—long dring spak, kisim ol drak, na pamuk? Tru tumas, sapos yumi poroman wantaim ol lain i bihainim ol dispela kain pasin, yumi tu bai kamap kain man olsem, olsem Baibel i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.”—1 Korin 15:33.
Yumi olgeta i laik stap amamas, a? Tasol yumi ken mekim wanem bilong stap olsem? Ating yu save olsem Baibel i tok ol mani kago samting bai i no inap mekim yumi i stap amamas, tasol yumi bai kisim amamas long rot bilong stretpela tingting na pasin bilong stap gut wantaim ol narapela, na moa yet taim yumi stap gut wantaim God. (1 Timoti 6:6-10) Long tok bilong em antap long maunten, Jisas Krais i stori long ol man i stap amamas tru, em ol manmeri “i save, ol i stap rabis tru long ol samting bilong God,” na ol manmeri i “daunim nem bilong ol yet,” “laikim tumas long bihainim stretpela pasin,” “marimari,” “bel bilong ol i klin,” na “mekim dai ol kros na pait.”—Matyu 5:1-9.
Taim yu skelim gut ol samting Baibel i save skulim yumi long en, bai yu kisim save olsem wanem ol tok bilong en inap stiaim wokabaut bilong yumi. Baibel em i nambawan gutpela buk bilong givim gutpela tingting. Oltaim tok bilong en i gutpela bilong helpim yumi, na i wok gut, na i no gat wanpela taim em bai bagarapim yumi. Ol manmeri i bihainim ol tok bilong Baibel, oltaim dispela bai helpim ol.
Skul Bilong Helpim Yumi Long Bihain
Baibel i bilong helpim yumi long nau, tasol tu Baibel i helpim yumi long bilip long ol gutpela samting bai kamap bihain. Baibel i stori long wanpela bikpela senis bai kamap long dispela graun na graun bai kamap olsem gutpela ples tru bilong ol wokboi bilong God. Tingim tok i bilong mekim gut tru bel bilong man, olsem: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:3, 4; Sindaun 2:21, 22.
Tingim: Bai i no gat moa ol pikinini i sik, bikpela hangre, ol sik nogut i save pinisim olgeta strong bilong man, na bai i no gat moa ol bikpela pen! Krai bilong taim bel i bagarap, na krai bilong bikpela bel hevi bai pinis taim ol samting i kamapim ol dispela hevi i senis o i no stap moa. Ol ensel bilong God bai bagarapim ol manmeri i laik bihainim ol pasin nogut, olsem na ol stilman, ol kilman, ol man bilong giaman, na ol man i mekim ol pasin i pretim ol narapela, olgeta kain man olsem bai i no stap moa. Ol manmeri bai kisim haus bilong ol yet na stap amamas na bel isi long en.—Aisaia 25:8, 9; 33:24; 65:17-25.
Yu laikim ol dispela tok? Yu laik kisim sampela save moa long pasin bilong bihainim ol lo bilong Baibel bilong kisim sampela helpim long nau na long bihain tu? Sapos olsem, singautim ol Witnes Bilong Jehova long kam lukim yu, ol bai amamas long helpim yu na famili bilong yu long insait long “skul bilong kisim laip” ol i kamapim long olgeta hap bilong graun.