Rot Bilong Kamapim Amamas Insait Long Marit
“Man i save . . . pas wantaim meri bilong en, na tupela i kamap wanpela bodi tasol.”—STAT 2:24.
MAN Bilong Wokim yumi, God Jehova, em i kamapim marit bilong i stap oltaim namel long man na meri. Stat 2:18, 22-24 i tok: “Bikpela i tok olsem, ‘Em i no gutpela long dispela man i stap wanpis. Mi mas mekim kamap wanpela poroman bilong helpim em.’ Orait God i wokim wanpela meri long dispela bun em i bin kisim long man, na bihain em i bringim meri i go long man. Man i lukim meri na em i tok olsem, ‘Em nau. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi. God i wokim em long bun bilong mi, olsem na bai mi kolim em “meri.” ’ Olsem na dispela pasin i kamap. Man i save lusim papamama na i pas wantaim meri bilong en, na tupela i kamap wanpela bodi tasol.”
Tru, i hatwok long mekim marit i stap strong na amamas, tasol em samting ol marit inap mekim. Planti marit i bin stap amamas wantaim inap 50, 60, o sampela yia moa. Olsem wanem ol inap stap amamas? Ol i wok strong oltaim na bai marit bilong ol i ken stap gut na ol i daunim laik bilong ol yet bilong “mekim pasin” poroman i laikim. (1 Korin 7:33, 34) Bilong mekim olsem ol i wok strong. Sapos yu redi long lusim haptaim na wok strong, yu tu inap kamapim amamas insait long marit, na marit bilong yu bai stap longpela taim.
Bihainim Gut Tok
Man bilong wokim gut ol haus bai skelim pastaim plen bilong haus na bihain em i kirap mekim wok. Na olsem tasol, yumi no inap kamapim amamas insait long marit sapos yumi no skelim gut ol tok bilong God long marit. Ol dispela tok i stap long Baibel. Aposel Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong . . . stretim wokabaut bilong yumi.”—2 Timoti 3:16.
Ol man na meri marit i ken lainim planti samting long marit long rot bilong skelim pasin Jisas i mekim long ol disaipel bilong em. Bilong wanem yumi ken tok olsem? Baibel i tok pasin i stap namel long Jisas na ol lain husat bai wok king wantaim em long heven, i wankain olsem pasin i stap namel long man na meri bilong em. (2 Korin 11:2) Jisas i stap gut long ol poroman bilong em, em i mekim olsem long taim bilong bikpela hevi tu. “Em i laikim ol moa yet i go inap long taim em i dai.” (Jon 13:1) Jisas em i wanpela lida i gat pasin sori, na oltaim em i tingim ol samting ol disaipel bilong em i no inap mekim na mak bilong strong bilong ol. I no gat wanpela taim em i strong long ol i mas mekim samting ol i no inap mekim.—Jon 16:12.
Maski Jisas i bel hevi long samting ol gutpela pren bilong em i mekim, em i mekim pasin isi long ol. Em i no krosim ol, nogat, long pasin daun na gutpela pasin em i traim long stretim ol. (Matyu 11:28-30; Mak 14:34-38; Jon 13:5-17) Olsem na sapos yu skelim gut pasin isi Jisas i mekim long ol disaipel na olsem wanem ol disaipel i soim pasin bilong ol long laikim tru Jisas, yu bai lainim ol samting i helpim yu long kamapim amamas insait long marit.—1 Pita 2:21.
As Bilong Marit i Mas Strong
Tru, ol bikpela hevi bai kamap na i laik bagarapim as bilong marit bilong yu. Dispela bai traim pasin pren i stap namel long yu na poroman bilong yu. Tasol strongpela as bilong kamapim amamas insait long marit em pasin bilong stap gut long poroman na pasin laikim. Jisas i kamapim klia olsem pasin bilong stap gut long poroman i bikpela samting, em i tok: “Samting God i pasim pinis, em man i no ken katim.” (Matyu 19:6) Dispela tok “man” inap makim man na meri bilong em, em tupela wantaim i bin tok promis long narapela i stap gut long narapela.
Sampela inap ting pasin bilong stap gut long narapela i putim hevi long ol, ol i ting ol i mas lusim planti samting bilong ol yet bilong mekim olsem. Long nau ol man i laik helpim ol yet tasol, na ol i no laik daunim laik bilong ol yet bilong ol i ken stap gut long narapela.
Wanem samting i ken helpim ol marit na narapela i ken stap gut long narapela? Aposel Pol i tok: “Yupela man, yupela i mas laikim tru ol meri bilong yupela, olsem yupela i save laikim bodi bilong yupela yet.” (Efesus 5:28, 29) Taim “God i pasim” yu wantaim poroman, dispela i makim olsem yu tingim tru i stap bilong poroman marit bilong yu olsem yu save tingim i stap bilong yu yet. Ol marit i mas senisim pasin bilong ol long tingting, olsem “bilong mi” i mas kamap “bilong yumi,” na “mi” i mas kamap “yumi.”
Taim yu winim ol bikpela hevi i kamap insait long marit, dispela bai givim savetingting long yu. Kain savetingting olsem inap kamapim amamas. Sindaun 3:13 i tok: “Man i kisim gutpela tingting na save, em i ken amamas tru.”
Wokim Long Ol Samting i No Inap Paia
Man i mas wokim gut haus bambai haus i ken stap gut na longpela taim. Olsem na mekim gut ol samting insait long marit bambai marit i ken stap strong inap longpela taim. Mekim ol samting bilong strongim marit na bai pasin bilong yu long stap gut long poroman i strong taim ol bikpela traim olsem paia i kamap. Tingim tru ol kain gutpela pasin, olsem savetingting i kam long God, pasin bilong givim ol samting, skelim gut ol samting, pret long God, pasin sori, laikim tru ol lo bilong God, na bilip tru.
Mani kago o gutpela wok mani i no as bilong stap amamas na belgut insait long marit. As bilong en em ol samting i stap long bel na tingting, na ol tok i tru bilong Baibel i strongim ol dispela samting. Dispela tok “olgeta man i mas lukaut gut long pasin ol i wokim haus long en” i stret long marit tu.—1 Korin 3:10.
Taim Ol Hevi i Kamap
Man i mas stretim ol samting long haus bambai haus inap stap strong inap longpela taim. Insait long marit, taim narapela i helpim narapela long winim ol mak na i givim biknem na rispek long narapela, dispela bai strongim marit. Pasin bilong man o meri long tingim em yet tasol i no kamap, na ol inap bosim kros bilong ol.
Sapos pasin bilong kros na bel nogut i stap longpela taim, dispela inap pinisim pasin laikim na pasin bilong mekim gut long narapela insait long marit. Aposel Pol i tokim ol man olsem: “Yupela man, yupela i mas laikim tru ol meri bilong yupela, na yupela i no ken mekim nogut bel bilong ol.” (Kolosi 3:19) Wankain stiatok i stret long ol meri marit. Taim man na meri i wok strong long tingim gut narapela, mekim gutpela pasin, na pilim tingting bilong em, tupela wantaim bai stap amamas na belgut. Taim ol marit i sakim pasin bilong kros na skrapim bel bilong narapela, dispela i helpim ol long abrusim pasin bilong tok pait taim sampela hevi i kamap. Pol i tok: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol.”—Efesus 4:32.
Olsem wanem sapos yu pilim olsem yu no inap mekim wanpela samting, o yu bel kros, o yu pilim olsem poroman i no ting yu gutpela samting tru, na dispela i skrapim bel bilong yu? Long pasin isi, kamapim klia long poroman i gat wanem as na yu bel hevi. Tasol ating i gutpela moa long larim pasin laikim i karamapim ol liklik rong.—1 Pita 4:8.
Wanpela man marit husat i bin karim planti hevi insait long 35 yia em i bin marit, em i tok maski yu kros tru long poroman bilong yu, yu “no ken tru lusim pasin bilong toktok wantaim.” Na em i tok moa, “no ken lusim pasin bilong laikim poroman.”
Yu Inap Kamapim Amamas Insait Long Marit!
Tru, em i no isi long kamapim amamas insait long marit. Tasol taim man na meri i strong long mekim ol samting na bai God i stap insait long marit bilong ol, dispela bai kamapim amamas na bel isi. Olsem na skelim gut famili bilong yu long ol samting bilong lotu; wok strong long lukautim gut marit. Na tingim, Jisas i tok man o meri i no ken tok olsem ol yet i as na ol i stap amamas. Nogat. Man i kamapim marit, God Jehova, em i As bilong dispela samting. “Samting God i pasim pinis, em man i no ken katim.”—Matyu 19:6.
NARAPELA BUK BILONG RITIM
Buk Rot Bilong Famili i Ken Stap Amamas, em ol Witnes Bilong Jehova i wokim, i kamapim ol gutpela tok bilong helpim marit i stap gut na amamas. Planti tausen marit long olgeta hap bilong graun i lukim olsem ol gutpela tok bilong en, em Baibel i as bilong en, i bin helpim marit bilong ol i kamap gutpela.—Lukim pes 32 bilong dispela nius.
[Blok long pes 9]
Wanem Samting Inap Helpim Yu Long Kamapim Amamas Insait Long Marit?
◼ Stadi oltaim long Baibel wantaim poroman marit bilong yu, na beten askim God long stiaim na helpim yupela long stretim ol hevi.—Sindaun 3:5, 6; Filipai 4:6, 7; 2 Timoti 3:16, 17.
◼ Slip wantaim poroman marit bilong yu tasol.—Sindaun 5:15-21; Hibru 13:4.
◼ Kamapim klia na stret tingting bilong yu, na long gutpela pasin toktok long ol hevi bilong yupela.—Sindaun 15:22; 20:5; 25:11.
◼ Toktok long poroman long gutpela pasin i soim olsem yu tingim em gut; no ken bikmaus, toktok planti, na sutim tok.—Sindaun 15:1; 20:3; 21:9; 31:26, 28; Efesus 4:31, 32.
◼ Long pasin daun bihainim ol tok bilong Baibel, maski yu ting olsem poroman bilong yu i no mekim olgeta samting em i mas mekim.—Rom 14:12; 1 Pita 3:1, 2.
◼ Wok strong long kamapim ol pasin em spirit holi i as bilong en na i stap long Baibel.—Galesia 5:22, 23; Kolosi 3:12-14; 1 Pita 3:3-6.
[Ol Piksa long pes 7]
Bihainim ol tok bilong God long marit i stap long Baibel
[Piksa long pes 7]
Pasin laikim na pasin bilong stap gut long poroman i mas i stap olsem as bilong marit
[Ol Piksa long pes 8]
Kamapim ol pasin bilong holi spirit em ol inap helpim yu long sakim ol bikpela traim
[Ol Piksa long pes 8]
Oltaim yu mas mekim ol samting bambai marit i ken stap gut