Taim Ol Samting Yumi Mekim i No Kamap Gutpela
Em i hap meri tru bilong singsing na taim em i gat 22 krismas samting em i gat biknem na planti mani. I no planti manmeri i kisim biknem na bikpela mani taim ol i yangpela yet olsem dispela meri. Tasol bihain, i stap bilong em i wok long go nogut. Namba wan na namba tu marit bilong em i bagarap, na em i mas i stap longtaim liklik long wanpela kain haus sik we ol i save helpim ol man i save dring oltaim na kisim drak. Sindaun bilong em i bagarap olgeta.
SORI tru, stori bilong dispela meri i no narapela kain; planti taim ol nius i save stori long ol wankain hevi i save painim ol manmeri i gat nem long singsing o spot samting. Na ol lain bilong bisnis tu, yumi ting ol samting ol i mekim i kamap gutpela, tasol planti ol i gat ol bikpela hevi long sindaun bilong ol. Wanpela nius i stori long sampela bikpela bisnisman bilong New York na i tok: “Ol i strong tumas long kisim bikpela winmani na dispela i nogutim wok mani bilong ol, brukim famili, na kirapim ol long kisim drak . . . Sampela lain bilong haus beng bilong Wall Street ol i kisim bikpela winmani long gutpela wok ol i bin mekim na ol i ting ol i win tru, tasol sampela i save wok strong tumas na bai wok bilong ol i kamap gutpela, na nau tingting na bel bilong ol i bagarap olgeta.”
Yu ting as bilong ol dispela hevi i olsem ol man i paul long painim rot bilong i stap amamas na bilong kamap gutpela long ol wok samting bilong ol? Tru, yumi mas i gat sampela mani bilong lukautim yumi yet long ol samting bilong skin. Tasol yu ting yumi mas bungim planti mani na bai yumi ken tok ol samting bilong yumi i kamap gutpela? Nogat, ol wok painimaut i no kamapim olsem. Wanpela lain long Saina i kisim save olsem, long nau pe bilong ol wokman i go bikpela inap 250 pesen, tasol nau ol i no amamas tumas long i stap bilong ol.
Olsem na gutpela wok mani, bikpela mani yumi tromoi long baim haus, ka, o hanwas, em i no makim olsem ol samting long i stap bilong man i kamap gutpela, nogat. Yumi mas tingim pasin bilong man yet, em i wanem kain man tru, na ol lo olsem stiatok em i save bihainim, na em i tingting long mekim wanem long i stap bilong em. Sampela man i gat save na strong, tasol ol i no gat stretpela pasin na ol i no gat pasin laikim na ol pren tru. Na sampela ol i gat nem na bikpela mani moa, tasol ol i save tingting, ‘Bilong wanem mi bin hatwok long mekim ol dispela samting? Mi stap bilong mekim wanem?’
I mas i gat sampela bikpela samting moa long i stap bilong man i makim olsem ol samting bilong em i kamap gutpela tru—em i mas i gat ol gutpela lo olsem stiatok bilong soim rot long em, na ol kain samting olsem. Ol man i gat ol dispela samting, ol i gat bel isi, na ol i rispek long ol yet, na ol narapela i rispek long ol. Na ol samting ol i tingting long mekim long i stap bilong ol i no bilong helpim ol yet tasol, olsem na ol i pilim olsem i gat as bilong i stap bilong ol na ol i stap belgut. Tasol sampela bai askim olsem: “Wanem ol stiatok? Na ol i bilong mekim wanem?’ Yu ting yumi yet inap painim bekim bilong ol dispela askim, o yumi mas painim long narapela hap? Ol stori i kamap bihain long dispela bai toktok long ol dispela samting.
[Blok long pes 3]
Ol I GAT TINGTING KRANKI LONG OL SAMTING I GUTPELA
Sampela saveman olsem dokta ol i lukim olsem long nau planti yangpela bilong pilai spot ol i save kisim ol strongpela drak inap bagarapim ol bambai ol i ken win long spot. Nius Education Update long Intenet i tok: “Ol i askim sampela sumatin bilong kolis: ‘Sapos yu save, long rot bilong kisim drak steroit yu bai win o yu inap insait long tim, tasol insait long 5-pela yia bai sik i painim yu, bai yu kisim ol dispela drak?’ Klostu olgeta i tok, yes, ol bai mekim. Orait taim ol i senisim askim na tok, ‘Sapos yu save olsem insait long 5-pela yia yu bai dai,’ inap 65 pesen i tok ol bai i gat laik yet long mekim.”