Papamama i Stap Gut na Wok Gut Wantaim
◼ Insait long Saut Afrika i gat stretpela hap graun i antap na i kol nogut tru. Mi lukluk i go ausait long windo long ofis bilong mi, na mi lukim wanpela diwai i no gat ol lip em strongpela kolwin i wok long sakim i go i kam. Antap long diwai i gat wanpela pisin balus i stap klostu long 2-pela bebi pisin bilong hatim skin bilong ol, em 3-pela de i go pinis kiau i bruk na ol i kamap.
Paslain long pisin balus i putim ol kiau, meri pisin wantaim man bilong en i save wok wantaim long wokim haus—man i save bringim ol liklik stik i kam na meri i save wokim haus. Tupela i wokim gut haus, olsem na maski i gat strongpela win em i no sakim haus, em nau i gat ol kiau i stap insait long en. Long nait meri i save sindaun antap long ol dispela kiau, na long san man i save mekim olsem. Bihain long 2-pela wik samting, ol kiau i save bruk. Na tupela wik bihain long dispela, ol pikinini pisin bai kamap bikpela na strong inap long ol i ken flai.
Orait nau piksaim long tingting olsem yu harim naispela krai bilong ol pisin. Meri pisin em paus bilong em i pulap long kaikai bilong ol pikinini i hangre i stap, em i stap long narapela han bilong diwai na i singaut bilong makim olsem i kam pinis na em i redi long lukautim ol pikinini na man i ken i go. Maski ol pikinini pisin i lain pinis long flai, tupela papamama bai wok yet long givim kaikai long ol i go inap long taim ol yet inap long painim kaikai bilong ol.
Planti taim mi save kirap nogut long lukim pasin bilong papa na mama pisin long wok gut wantaim na lukautim gut ol pikinini bilong ol, em ol dispela pasin i stap pinis long skin bilong ol na ol pikinini tu i kisim dispela pasin. Dispela ol samting i kirapim mi long tingim tok bilong Song 86:8, em i tok: “Bikpela, i no gat wanpela god i olsem yu. . . . Na i no gat wanpela man inap mekim wankain wok olsem yu save mekim.”
Long tok bilong em, em Baibel, God Jehova i kamapim ol gutpela tok bilong soim rot long ol papamama, em ol i ken bilip tru long en, na i wankain long ol lo Jehova i bin putim long skin bilong ol pisin balus. Olsem: Baibel i kirapim ol mama long ‘laikim tru ol pikinini bilong ol.’ (Taitus 2:4) Long ol papa em i tok: “Yupela i no ken bagarapim tingting bilong ol pikinini bilong yupela na mekim ol i belhat long yupela. Nogat. Yupela i mas mekim gutpela pasin long ai bilong Bikpela, na stretim gut ol pikinini bilong yupela na skulim ol long tok bilong Bikpela.” (Efesus 6:4; 1 Timoti 5:8) Tru tumas, ol papamama em ol i save mekim ol dispela samting ol i gutpela samting tru long ai bilong God.