Mi Dai Stret Long Tokim Ol Olsem “Yumi Olgeta i Stap Wantaim Gen!”

Stori bilong Abigail Austin

Em naispela de long Epril 1995, na sampela bilong mipela long kongrigesen bilong ol Witnes Bilong Jehova i pasim tok long go raun ausait long taun. Long dispela taim mi gat 9-pela krismas. Mipela olgeta i ron wantaim long ol ka bilong mipela. Bikpela susa bilong mi, Sarah, na famili pren bilong mipela, Deborah, na mi, i kalap wantaim Papa na Mama. Long rot, wantu wanpela ka i spit i kam long sait bilong rot mipela i stap long en na i bamim mipela. Mi wanpela tasol i no bin dai.

TUPELA wik bihain, mi kirap long haus sik. Bun bilong het bilong mi i bruk na ol dokta i putim ol ain bilong holim strong bun bilong het. Tasol mi kamap orait kwiktaim. Bihain, ol wanblut bilong mi i tokim mi long samting i bin kamap, tasol mi no bilipim ol. Mi wok long tingting yet olsem papamama na susa bilong mi i bin kam visitim mi long taim mi bin slip i dai na mi no lukim ol. Tasol taim mi go bek long haus, mi luksave olsem ol i no stap moa. Bel bilong mi i bagarap stret.

Wanem samting i bin helpim mi long karim dispela bikpela hevi tru?

Papamama i Bin Skulim Mi Gut Long Jehova

Mi laspela bilong 5-pela pikinini. Long taim eksiden i kamap, Sarah i gat 22 krismas, Shane, 20 krismas, Jessica, 17 krismas, na Luke, 15 krismas. Mipela i gat gutpela papamama husat i save tingim tru mipela. Papa bilong mi, Steve, i mekim wok olsem wanpela elda long West Yorkshire kongrigesen bilong ol Witnes Bilong Jehova long Shipley. Olgeta i laikim em, long wanem, em i save lusim hap taim long putim gut yau long hevi bilong ol narapela na helpim ol. Na tu, ol i save laikim mama bilong mi, Carol, em i save tingim tru ol lapun long kongrigesen. Em i save stretim rot bilong mipela ol yangpela i ken bung wantaim, na helpim mipela long painim ol gutpela pren. Olgeta i welkam long haus bilong mipela. Na tu, papamama bilong mipela i skulim mipela long mekim gutpela pasin long ol neiba na tingim tru ol.

Long olgeta Trinde apinun, mipela famili i save stadi wantaim long Baibel. Sampela taim mipela i mekim pilai bilong Baibel na bilas olsem ol man bilong bipo. Long taim mipela i liklik yet, Mama na Papa i lainim mipela long pasin bilong redim ol miting bilong kongrigesen na pasin bilong autim tok bilong Baibel long ol man bilong haus. Maski ol i gat planti wok tumas bilong lukautim mipela 5-pela pikinini, papamama i lusim taim wantaim mipela na helpim mipela long kisim pasin bilong pas gut tru wantaim Jehova.

Taim Sarah, Shane, na Jessica i pinisim skul, ol i kamap painia, olsem mekim wok Kristen bilong autim tok fultaim, na pren bilong mipela Deborah tu i mekim olsem. Mitupela Sarah i pas gut tru wantaim, em i olsem namba tu mama bilong mi. Long taim bilong ol skul holide bilong mi, mitupela i save wok wantaim bilong helpim ol narapela long kisim save long tok bilong Baibel. Mi save tingim tru ol dispela taim. Mi inap tingim bikpela amamas olgeta painia i kisim, na mi amamas long raun wantaim ol. Mi putim mak olsem taim mi pinisim skul, bai mi wok painia wantaim Sarah.

Long taim bilong holide, famili bilong mipela wantaim ol narapela long kongrigesen i save bung wantaim. Long dispela rot, ol yangpela na ol lapun i pas gut moa wantaim. Mi no bin save olsem bihain ol dispela gutpela pren bai helpim na strongim mi!

Bihain Long Eksiden

Taim mi lusim haus sik, mi go bek long haus bilong mipela. Shane na Jessica i save mekim wok mani haptaim na insait long wok autim tok fultaim, tupela i wok hat tru long lukautim mipela olgeta.

Planti wanbilip Witnes long kongrigesen bilong mipela tu i givim bikpela helpim tru long mipela! Ol i givim kaikai, klinim haus, go long stua, na wasim ol laplap bilong mipela, ol i mekim olsem i go inap long taim mipela inap lukautim mipela yet. Mipela i tenkyu tru long ol. Ol Witnes i stap long ol longwe hap tu, i salim planti presen na ol kat bilong strongim mipela, na dispela i kamapim klia bikpela pasin laikim i stap insait long oganaisesen bilong Jehova.

Bihain long wanpela yia samting, ol brata na susa bilong mi i wokim tingting olsem mi nid long stap wantaim wanpela gutpela famili. Sampela gutpela famili long kongrigesen i redi long helpim mipela, olsem na famili bilong mi i sindaun wantaim na skelim wanem samting Mama na Papa bai ting i gutpela bilong helpim mi long nau, na long sait bilong spirit long bihain. Mipela i tingim wanpela famili. Billy, em wanpela elda, na meri bilong em, Dawn, ol i bin stap gutpela pren bilong famili bilong mipela, na ol i gat wanpela pikinini gel i gat 5-pela krismas, em Lois. Ol i amamas long mi stap wantaim ol na kirap long dispela taim na i kam, ol i lukautim gut mi olsem pikinini tru bilong ol. Maski Lois i mas larim papamama bilong em i stap olsem papamama bilong mi, em i no bin bel nogut liklik long dispela, na long nau mitupela i pas gut wantaim olsem tupela susa wanblut.

Hau Mi Bin Karim Dispela Hevi

Pastaim mi tingting, bilong wanem dispela bikpela hevi i bin painim famili bilong mipela, na moa yet papamama bilong mi, na Sarah na Deborah, em ol i bin laikim tru Jehova na ol narapela man. Tasol mi tingim stori bilong Jop long Baibel, husat i bin holimpas bilip bilong em long God maski olgeta pikinini bilong em i dai. (Jop 1:​19, 22) Mi tingting, ‘Yes, Satan i bin kamapim pen na dai long dispela graun, na em bai amamas sapos dispela hevi i stopim mipela long mekim wok bilong God.’ (Stat 3:​1-6; KTH 12:⁠9) Na tu, mi tingim olsem Jehova bai kirapim bek ol man i dai pinis. (Jon 5:​28, 29) Mipela bai lukim gen famili bilong mipela wantaim Deborah long Paradais long graun! Dispela i mekim na pasin bilong mi long laikim tru Jehova i kamap strong moa.

Taim mi bungim ol man husat i bin karim ol bikpela hevi, mi sori tru long ol sapos ol i no bin harim gutpela tok promis bilong Baibel long kirap bek. Dispela i kirapim laik bilong mi long tokim ol long dispela gutpela samting mipela i wet long en, long wanem, mi save olsem Jehova na oganaisesen bilong em i bin helpim mipela long karim dispela bikpela hevi. Mi save olsem i gat gutpela samting bai kamap bihain.

Ating samting i bin painim mipela i helpim ol papamama na i kirapim ol long tingting, ‘Olsem wanem? Mipela i bin skulim gut ol pikinini bilong mipela long Jehova, na sapos sampela samting i painim mipela, ol bai mekim yet wok bilong Jehova maski mipela i no stap?’

Mi bin traim long wokabaut long pasin em Mama na Papa bai laikim sapos ol i stap laip yet. Mi save olsem ol bai laik long mi wok strong long helpim ol narapela, olsem ol yet i bin mekim. Kirap long taim mi pinisim skul na i kam, mi bin mekim wok painia, na nau Lois tu i mekim wok painia wantaim mi. Ol brata na susa bilong mi i marit pinis na ol i amamas long mekim wok bilong Jehova long kongrigesen bilong ol yet.

Mi wetim tru nupela taim em God bai kamapim na ol man i dai pinis ol bai kirap bek! Bai i no gat moa pen na dai long dispela taim. (KTH 21:​3, 4) Mi save olsem bihain mipela olgeta bai stap wantaim gen na dispela i strongim mi long mekim wok i go. Mi dai stret long holimpas Mama, Papa, Sarah, na Deborah na tokim ol olsem, “Yumi olgeta i stap wantaim gen!”

[Piksa long pes 17]

Abigail (namba tu long han kais) wantaim famili i bin adoptim em