Onest Pasin i Kamapim Gutpela Samting
“Maski man i gat planti samting, em i no kisim laip long ol dispela samting em i holim.” —Luk 12:15.
WOK mani em samting yumi mas mekim. God i givim wok long yumi long lukautim yumi yet na famili bilong yumi.—1 Timoti 5:8.
Tasol olsem wanem sapos wok bilong kisim mani na ol samting mani inap baim i kamap nambawan bikpela samting long laip bilong yumi? Ol man em ol i gat bikpela laik tru long kisim planti mani kago, em i isi moa long ol i mekim pasin giaman bilong kisim ol dispela samting. Ating ol i no luksave hariap olsem pasin giaman i mekim na ol samting long laip bilong ol i no kamap gutpela. Na tu, olsem Baibel i tok, pasin bilong laikim tumas mani i as bilong planti pen.—1 Timoti 6:9, 10.
Tingim stori bilong 4-pela man hia husat i tok sapos man i gat planti mani kago, dispela i no makim olsem ol samting em i mekim i kamap gutpela.
Amamas Long Yu Yet
“Inap sampela yia i go pinis, mi intaviuim wanpela man husat i laik baim 1 milion dola insurens. Sapos mi salim dispela insurens, kampani bai givim mi planti tausen dola olsem ekstra pe. Dispela man i tokim mi olsem bilong em i ken baim dispela insurens, mi mas givim em hap mani bilong ekstra pe mi bai kisim. Mi tokim em olsem samting em i askim mi long mekim i no stret na i brukim lo.
“Mi askim em olsem sapos em i save olsem mi no onest man, orait em bai go het na tokim mi long hamas mani em i gat, na long ol samting ol narapela i no ken save long en, ating nogat. Mi tokim em gen long samting mi no inap mekim na askim em long ringim mi sapos em i laik bai mi stretim insurens bilong em. Em i no ringim mi o kam lukim mi gen.
“Sapos mi bin orait long mekim samting dispela man i tokim mi long en, dispela bai daunim stretpela pasin bilong mi na bai mi pilim olsem mi no gutpela Kristen. Mi bai kamap wokboi nating bilong man husat i grisim mi long insait long pasin giaman.”—Don, Amerika.
Bel i Stap Isi
Olsem namba 1 atikol i kamapim, maneja bilong wanpela faktori i laik givim bikpela grismani long Danny sapos em i tok giaman long samting faktori inap mekim. Em i mekim wanem?
“Mi tok tenkyu long maneja long gutpela pasin bilong em long baim dina bilong mi, na mi givim envelop i gat mani i go bek long em. Tasol em i no givap, em i tok sapos kampani bilong mipela i orait long wok em faktori bilong em i mekim, em bai givim sampela mani moa long mi. Mi tok nogat long dispela.
“Sapos mi bin orait long kisim mani, oltaim bai mi pret olsem ol man bai painimaut dispela samting. Bihain, bos bilong mi i kisim save long samting i bin kamap. Mi amamas tru long mi no bin mekim pasin giaman. Mi tingim tok bilong Sindaun 15:27, i tok: ‘Sapos man i mangal long mani, na i mekim kain kain pasin nogut bilong kisim, orait em i mekim trabel i kamap long famili bilong en. Tasol sapos man i no larim ol arapela man i givim mani long en bilong grisim em long mekim pasin i no stret, orait em bai i stap gut.’”—Danny, Hong Kong.
Famili i Stap Amamas
“Mi gat konstraksen bisnis bilong mi yet. Na i gat planti rot bilong giamanim ol kastama o abrusim ol takis. Tasol gutpela samting i painim mi na famili bilong mi taim mi strong long bihainim onest pasin.
“Onest pasin em samting man i mas bihainim long olgeta taim, i no long ples wok o bisnis tasol. Taim yu save olsem poroman marit bilong yu i stap gut long ol lo bilong God long onest pasin, dispela i strongim pasin trast insait long famili. Poroman marit bai stap bel isi taim em i save olsem yu bihainim onest pasin long olgeta kain taim.
“Maski yu papa bilong nambawan bikpela kampani long dispela graun, mani bilong yu i no inap pinisim ol hevi bilong famili. Mi wanpela Witnes Bilong Jehova, na mi lukim olsem pasin bilong bihainim ol stiatok bilong Baibel i helpim man long balensim gut ol samting em i mas mekim. Mi gat taim long amamas wantaim famili bilong mi, mi no tingting long mekim ol samting ol man bilong dispela graun i save mekim em mani na pasin mangal i bosim ol.”—Durwin, Amerika.
Pas Gut Wantaim God
“Mi gat wok long baim ol saplai bilong kampani. Sampela taim ol selsman i save tokim mi olsem, ol bai no givim ful diskaun long kampani, na ol bai givim sampela mani long mi. Tasol dispela i olsem mi stil long kampani mi wok long en.
“Mi save kisim liklik pe tasol, na sapos mi kisim sampela ekstra mani, dispela bai helpim mi gut. Tasol mi no mekim, olsem na bel bilong mi i no gat tok na mi stap stret long ai bilong God Jehova, na i no gat wanpela samting i winim dispela. So long olgeta samting mi mekim, mi bihainim stiatok bilong Baibel i stap long Hibru 13:18, em i tok: ‘Long olgeta samting mipela i mekim, mipela i laik wokabaut stret.’”—Raquel, Filipins.
[Blok/Ol Piksa long pes 9]
Ol Stiatok Bilong Wok Bisnis i Onest
Tingting bilong ol man long stretpela pasin bilong mekim wok bisnis i no wankain long olgeta hap. Tasol ol stiatok bilong Baibel inap stiaim yumi long wokim ol disisen i stret. Daunbilo i gat 6-pela samting i insait long wok bisnis i onest:
Mekim tok tru
Stiatok: “Yupela i no ken giamanim narapela narapela.”—Kolosi 3:9.
Truim tok bilong yu
Stiatok: “‘Yes’ bilong yupela i mas minim yes tasol, na ‘Nogat’ bilong yupela i mas minim nogat tasol.”—Matyu 5:37.
Narapela i trastim yu
Stiatok: ‘Sapos yu harim tok hait, yu no ken autim dispela tok.’—Sindaun 25:9.
Mekim onest pasin
Stiatok: ‘Sapos man i laik grisim yu long mani, orait no ken kisim dispela mani. Dispela pasin i save paulim tingting bilong gutpela man.’—Kisim Bek 23:8.
Mekim pasin fea
Stiatok: “Olgeta samting yupela i laik bai ol man i mekim long yupela, yupela i mas mekim long ol.”—Matyu 7:12.
Bihainim lo
Stiatok: ‘Wanem samting yupela i mas givim long ol man, orait yupela i mas givim. Man i singaut long takis, orait givim takis long em.’—Rom 13:7.
[Blok/Ol Piksa long pes 9]
Holimpas Stretpela Pasin Insait Long Wok Bisnis
● Makim Wanem Samting i Bikpela Samting. Pasin bilong kisim planti mani kago i bikpela samting long yu, winim pasin bilong amamas long yu yet na pas gut wantaim ol man i trastim yu?
● Wokim Tingting Pastaim. Tingim ol samting inap kamap bilong traim pasin bilong yu long mekim onest pasin, na wokim tingting long samting yu bai mekim.
● Tokaut Long Tingting Bilong Yu. Taim yu kirap mekim wok bisnis wantaim narapela, long gutpela pasin tokaut long ol samting yu no inap mekim.
● Kisim Helpim Long Narapela. Taim traim i kamap o yu no save wanem pasin i stret long mekim, kisim tingting bilong wanpela husat i gat wankain tingting olsem yu long stretpela pasin.
[Piksa long pes 8]
Sapos yu bihainim onest pasin, bel bilong yu bai stap isi