Ol Yangpela i Laik Save
Wai Na Mi Mekim Dispela Tok?
Dispela atikol bai helpim yu long skelim
BILONG WANEM sampela taim yu mekim tok i no stret
WANEM SAMTING yu ken mekim taim yu no bosim maus
OLSEM WANEM yu inap bosim maus
“Planti taim mi inap bosim gut maus bilong mi, tasol sampela taim mi mekim tok i no stret na bihain mi sem nogut tru!”—Chase
“Sampela taim mi kamapim ol tok em ol narapela i tingting long en, tasol em ol tok i no stret long kamapim . . . Aiyo!”—Allie
BILONG WANEM I HATWOK LONG BOSIM MAUS
Skripsa bilong tingim: “Sapos man i no popaia long tok em i mekim, orait dispela man i gutpela olgeta.” (Jems 3:2) Wanem poin bilong dispela tok? I no gat wanpela man inap bosim gut maus bilong em long olgeta taim. Planti i gat wankain tingting olsem Annette,a em i tok: “Maus bilong mi i save autim hariap tru tingting i stap long het bilong mi.”
Tru stori: “Mi laik givim sampela klos bilong mi long ol narapela na wanpela pren i tok em i laik kisim. Mi no tingting gut na mi tok, ‘Mi no ting ol dispela klos bai fitim yu.’ Em i tok, ‘Wanem? Yu ting mi pat, a?’”—Corrine.
Bilong kliagut long as na sampela taim yu no inap bosim gut maus, traim mekim dispela.
● Luksave long ol samting yu no strong long en.
․․․․․ Mi save mekim tok hariap taim mi belhat
․․․․․ Mi no save tingting gut paslain long mi toktok
․․․․․ Mi save toktok, tasol mi no putim yau long tok bilong narapela
․․․․․ Narapela samting
Eksampel: “Mi save tok pilai tumas, na sampela taim ol narapela i save kisim tingting kranki long tok mi mekim.”—Alexis.
● Yu hatwok long bosim maus taim yu toktok wantaim husat?
․․․․․ Papa o mama
․․․․․ Brata o susa
․․․․․ Wanpela pren
․․․․․ Narapela man
Eksampel: Christine i gat 20 krismas, i tok: “Em i isi tru long mekim sampela tok i bagarapim bel bilong lain mi laikim tumas. Ating em bikos taim mi stap wantaim ol, mi no wari long wanpela samting na nau mi no tingim gut ol tok mi mekim.”
WANEM SAMTING YU KEN MEKIM TAIM YU NO BOSIM MAUS
Skripsa bilong tingim: “Wok strong long mekim ol samting i save kamapim bel isi.” (Rom 14:19) Wanpela rot bilong mekim olsem, em pasin bilong tok sori.
Tru stori: “Mama i dai taim mi gat 10-pela mun na papa i no bin lukautim mi liklik, olsem na anti na ankol i mekim bikpela long mi. Wanpela de, taim mi gat 10 o 11 krismas, mi pilim wanpis tru na kros long mama i bin dai, na mi laik sutim tok long wanpela. So taim anti i askim mi long helpim em long mekim wanpela wok, mi kirap bikmaus na bihain mi tok, ‘Mi heitim yu’ na ‘Yu no mama tru bilong mi.’ Pes bilong anti i soim olsem em i kirap nogut tru na bel hevi. Em i go long betrum na pasim dua, na mi inap harim em i krai. Bel bilong mi i bagarap stret. Anti i bin mekim olgeta samting bilong lukautim mi gut, na mi mekim pasin nogut tru long em. Ankol i toktok wantaim mi long samting i bin kamap, na em i soim sampela skripsa long mi long pasin bilong bosim maus. Bihain, mi tok sori long anti. Mi luksave olsem mi mekim rong.”—Karen.
Raitim daunbilo wanpela as na i hatwok long yu long tok sori.
․․․․․
Bilong wanem pasin bilong tok sori bai mekim yu pilim gutpela?
․․․․․
Givim tingting: Tingim ol stiatok i stap long Sindaun 11:2 na Matyu 5:23, 24.
I gutpela moa long yu bosim gut maus na bihain bai yu no gat wok long tok sori. Olsem wanem yu inap mekim olsem?
OLSEM WANEM YU INAP BOSIM GUT MAUS
Skripsa bilong tingim: ‘Putim yau kwik long harim tok, na no ken hariap long mekim toktok. Na no ken belhat hariap.’ (Jems 1:19) Daunbilo i gat sampela tok inap helpim yu long bihainim dispela skultok.
Ritim ol skripsa, na droim lain i go long tok i stret wantaim skripsa.
1 “No ken siries tumas, long dispela rot bai yu no kros hariap long tok narapela i mekim.” —Danette.
2 “Mi save go wokabaut. Dispela i opim rot long mi ken stap wanpis inap liklik taim na larim bel bilong mi i kol.”—Brielle.
3 “Taim mi yangpela, mi save ting olsem mi mas kamapim strong tingting bilong mi long olgeta samting mi no wanbel long en. Tasol nau mi save olsem mobeta mi no toktok long olgeta liklik samting.”—Celia.
4 “Sapos wanpela man i bikmaus long yu na yu no bekim tok long em, bihain em bai givap bikos yu no mekim wanpela tok. Stap isi tasol. No ken putim sampela moa paiawut long paia.”—Kerrin.
5 “Sampela taim wanpela i sikirapim bel bilong mi. Mi save tingting long ol tok mi laik mekim long dispela man. Tasol taim mi wet, mi luksave olsem ol dispela tok i no gat as bilong en. Samting mi lainim em olsem, no ken hariap long bekim tok.”—Charles.
Bilong lukim sampela atikol moa bilong “Ol Yangpela i Laik Save,” lukim Web-sait www.watchtower.org/ype
[Futnot]
a Mipela i bin senisim sampela nem long dispela stori.
[Blok/Ol Piksa long pes 27]
Allie—Paslain long mi mekim wanpela tok, mi save askim mi yet olsem: ‘Dispela tok bai kamapim gutpela samting o nogat? Tok mi kamapim bai mekim wanem long man mi toktok long em?’ Sapos yu gat tupela tingting long tok yu laik mekim, mobeta yu no mekim dispela tok.
Chase—Taim mi laik mekim sampela tok, mi save tingting long dispela tok bai mekim wanem long ol man i harim. Mi pilim olsem taim krismas bilong mi i wok long go antap, mi inap bosim gut moa maus bilong mi. Ol samting i painim yu i save givim skul long yu.
[Blok long pes 29]
TOKTOK WANTAIM PAPAMAMA BILONG YU
I no gat wanpela man i gutpela olgeta, na olsem Jems i tok, “planti taim yumi olgeta i save popaia.” Toktok wantaim papamama long ol hatwok ol i bin i gat long bosim gut maus.—Jems 3:2.
[Piksa long pes 28]
“Taim yu skwisim kolget i kam aut, yu no inap putim i go bek long tiub. Em i wankain long tok yumi mekim. Taim yumi autim pinis tok i bagarapim bel bilong narapela, yumi no inap kisim bek dispela tok.”—James.