Rot Bilong Toktok Wantaim Tineja

HATWOK BILONG EN

Taim pikinini i liklik, em i tokim yu olgeta samting. Taim em i tineja, em i no tokim yu wanpela samting. Taim yu traim long toktok wantaim em, em i givim ol sotpela bekim o kirapim bikpela tok pait.

Yu inap lain long toktok wantaim tineja bilong yu. Tasol pastaim tingim 2-pela samting we inap mekim na dispela i hatwok.

AS NA DISPELA I KAMAP

Ol i laik bosim ol yet. Bilong kamap man i gat gutpela tingting, dispela samting i no save kamap wantu tasol; isi isi tineja i kamap man husat inap karim ol hevi bilong laip. Tru, sampela tineja i laik bosim planti samting long laip bilong ol; na sampela papamama i no givim planti fridom tumas long tineja long bosim em yet. Dispela inap kamapim kros pait na givim bikpela hevi long papamama na tineja. Brada i gat 16 krismas, em i tok: “Papamama bilong mi i laik bosim olgeta liklik samting long laip bilong mi. Sapos ol i no givim sampela fridom moa long mi taim mi gat 18 krismas, mi bai muv aut long haus!”

Wokim gut tingting. Ol liklik pikinini i save tingim ol samting olsem i stret o i no stret, tasol ol tineja inap luksave olsem planti samting long laip i no olsem. Dispela i bikpela samting long pasin bilong wokim tingting, na i helpim yangpela long kisim pasin bilong skelim gut ol samting. Tingim wanpela eksampel: Long wanpela liklik pikinini pasin fea i no hatwok, olsem: ‘Mama i brukim bisket i go 2-pela hap na givim 1-pela hap long mi na narapela hap long brata bilong mi.’ Tupela pikinini i kisim hap hap bisket na dispela em i fea. Tasol ol tineja i save olsem bilong mekim pasin fea, i no olsem olgeta taim yu mas mekim wankain pasin long olgeta man, na tu, i no fea long mekim wankain pasin long wanpela man olsem yu save mekim long narapela. Pasin bilong wokim gut tingting i helpim ol tineja long skelim ol kain samting olsem. Tasol dispela inap mekim na tineja i no wanbel wantaim tingting bilong yu.

SAMTING YU KEN MEKIM

Taim yu inap, stori wantaim. Traim long toktok wantaim long kain kain taim. Olsem, sampela papamama i luksave olsem ol tineja i redi moa long toktok taim ol i mekim sampela wok bilong haus o taim ol i raun long kar, na taim ol i stap klostu long papa o mama, tasol i no long taim we ol i lukluk stret long pes bilong papamama.—Stiatok bilong Baibel: Lo 6:6, 7.

Mekim sotpela tok. I no olsem yu mas tok pait long olgeta samting i go inap long yupela i kros, nogat. Mobeta yu kamapim tingting bilong yu, na bihain pasim maus. Bihain tineja bai kliagut long tok yu bin mekim taim em i stap wanpis na tingim tingim ol tok bilong yu. Givim taim long em long mekim olsem.—Stiatok bilong Baibel: Sindaun 1:1-4.

Putim gut yau—na redi long senisim tingting. Putim gut yau na no ken katim tok bambai yu ken save long olgeta samting long hevi bilong pikinini. Taim yu bekim tok, bihainim gutpela tingting. Sapos yu putim ol strongpela lo, tineja bai traim long sakim ol dispela lo na abrusim strafe. Buk Staying Connected to Your Teenager i tok lukaut olsem: “Dispela samting i kamap taim tineja i bihainim tupela kain pasin. Wanpela pasin em ol i tokim papamama long ol samting papamama i laik harim, tasol narapela pasin em ol i bihainim ol laik bilong ol yet taim papamama i no lukim ol.”—Stiatok bilong Baibel: Filipai 4:5.

Stap isi. Wanpela tineja, nem bilong em Kari, i tok: “Taim mi na mama i no wanbel, mama i save bel hevi long olgeta tok mi mekim. Dispela i mekim mi bel hevi na toktok bilong mipela i kamap bikpela tok pait.” No ken kros hariap, mobeta yu mekim tok i soim olsem yu pilim tingting bilong tineja. Olsem, maski long tok: “No ken wari long dispela samting!” Mobeta yu tok: “Mi ken luksave olsem yu tingting planti long dispela samting.”—Stiatok bilong Baibel: Sindaun 10:19.

Inap long mak yu ken mekim, stiaim pikinini, no ken bosim em. Save bilong tineja long wokim tingting i olsem masol we em i mas mekim samting bilong strongim. Olsem na taim tineja i gat hevi, no ken stretim hevi bilong em. Taim yu toktok wantaim em long dispela hevi, larim em yet i kamapim tingting long rot bilong stretim hevi. Bihain long yupela i bin toktok wantaim long sampela rot bilong stretim hevi, yu ken tok: “Em sampela rot. Skelim long tingting inap 1-pela o 2-pela de, na bihain yumi ken toktok wantaim long wanem rot yu laik bihainim bilong stretim hevi na as na yu laik mekim olsem.”—Stiatok bilong Baibel: Hibru 5:14.