Tel Bilong Palai Agama

EM ISI tru long palai agama long kalap long tebol i go long wol. Tasol sapos wol i wel, lek bilong palai bai wel, tasol em bai no pundaun, em bai stap yet long wol. Olsem wanem dispela inap kamap? Tel bilong palai i helpim em.

Tingim: Taim ol agama i lusim tebol samting we i no wel na ol i kalap, pastaim ol i save taitim bodi bilong ol na putim tel i go daun. Dispela i helpim ol long kalap stret. Tasol sapos tebol samting i wel, lek bilong ol palai inap wel na ol i no kalap stret. Tasol taim ol i no pas yet long wol, ol i save tromoi tel i go antap na stretim bodi bilong ol. Ol i no save tromoi nabaut tel bilong ol, nogat, ol i save mekim long mak stret. Wanpela ripot bilong University of California, long Berkeley i tok: “Taim ol palai i kalap, oltaim ol i wok long stretim stretim tel bilong ol bambai ol inap sanap gut.” Sapos tebol samting i wel tru, ol palai i mas apim moa yet tel bilong ol na bai ol i ken kalap stret na pas gut long wol.

Ating tel bilong agama inap helpim ol ensinia long wokim ol robot kar em ol i ken yusim bilong painim ol man i abrusim bagarap long guria o narapela bikpela disasta. Saveman Thomas Libby i tok: “Ol robot i no inap muv gut olsem ol animal, so sapos samting inap mekim ol robot i wok gut moa, em bai gutpela tru.”

Yu ting wanem? Tel bilong agama i kamap nating? O wanpela i bin wokim?