Taim Tineja Bilong Yu i Bagarapim Skin Bilong Em Yet

HATWOK BILONG EN

Yu painimaut olsem tineja bilong yu i mekim ol samting bilong bagarapim skin bilong em yet. Yu tingting, ‘Dispela i makim wanem samting? Ating pikinini bilong mi i laik kilim em yet i dai?’

Ating nogat. Tineja bilong yu i no gat tingting long kilim em yet i dai. Sapos tineja i save bagarapim skin bilong em, orait em i mas kisim helpim. Yu inap helpim em olsem wanem? Pastaim, tingim wanem samting i kirapim em long mekim dispela pasin.a

AS NA DISPELA SAMTING I KAMAP

Pasin bilong bagarapim skin em samting olgeta i save mekim? Tru sampela yangpela i bagarapim skin bilong ol yet bikos ol i harim olsem ol narapela i mekim. Maski i olsem, i no olgeta yangpela i bagarapim skin long dispela as. Wai na yumi tok olsem? Sampela yangpela i save hait na bagarapim skin na ol i sem tru long pasin bilong ol. Celia,b husat i gat 20 krismas i tok: “Mi no laik wanpela i save long samting mi mekim na mi save haitim gut tru ol mak bilong sua long skin bilong mi.”

Pasin bilong bagarapim skin em rot bilong kirapim ol narapela long sori long ol? Sampela i gat kain tingting olsem na ol i mekim. Tasol ol yangpela mipela i stori long ol long dispela atikol i save haitim dispela pasin bilong ol na ol i no mekim olsem bilong kirapim ol narapela long sori long ol. Maski i olsem, wanpela yangpela meri husat i save bagarapim skin bilong em yet long bipo i tok i gutpela sapos wanpela i bin luksave long ol mak long skin bilong em na helpim em hariap.

Bilong wanem ol yangpela i save bagarapim skin bilong ol yet? I gat kain kain risen na ol yangpela i bagarapim skin bilong ol yet, tasol as tru bilong en em taim yangpela i pilim bikpela bel hevi tru na i hatwok long em i tokim ol narapela long dispela samting. Long buk Cutting, saveman Steven Levenkron i tok man o meri husat i save bagarapim skin bilong em yet, em “man husat i save pilim olsem pen long skin i mekim gut bel bilong em.”

Olsem wanem sapos yu tok em asua bilong yu? No ken ting olsem yu no mekim gut wok papamama na nau tineja bilong yu i bagarapim skin bilong em yet, nogat, tingim gutpela wok papamama yu ken mekim bilong helpim em long lusim dispela pasin.

SAMTING YU KEN MEKIM

Kirapim tineja bilong yu long toktok wantaim yu long hevi bilong em. Ol dispela tok i stap daunbilo inap helpim yu.

Mekim gut bel bilong em. Sapos tineja bilong yu i tokaut long yu olsem em i save bagarapim skin bilong em yet, no ken soim olsem yu kirap nogut long dispela. Toktok isi long em na mekim gut bel bilong em.—Stiatok bilong Baibel: 1 Tesalonaika 5:14.

No ken kamapim ol askim i pretim em. Olsem, yu inap tok: “Mi save planti taim yu no amamas long yu yet. Wanem samting i save mekim yu belhat?” o “Mi inap mekim wanem bilong helpim yu taim yu tingting planti o bel hevi?” o “Yu laik mi mas mekim wanem na bai mitupela i ken stap gutpela pren?” Putim gut yau long tok bilong em na no ken katim tok.—Stiatok bilong Baibel: Jems 1:19.

Helpim tineja bilong yu long holim stretpela tingting long em yet. Planti taim kain yangpela olsem i save tingting tasol long samting em i no inap mekim gut, olsem na ating yu ken helpim tineja long luksave long ol gutpela pasin bilong em. Ating yu ken tokim em long raitim 3-pela gutpela pasin bilong em yet. Wanpela yangpela meri em Briana i tok: “Taim mi raitim ol samting mi gutpela long en, dispela i helpim mi long luksave olsem mi gat ol gutpela pasin.”c

Strongim tineja long beten long God Jehova. Baibel i tok: “God i save wari long yupela, olsem na yupela i mas putim olgeta hevi bilong yupela long han bilong em.” (1 Pita 5:7) Lorena, husat i gat 17 krismas i tok: “Taim dispela laik bilong mi long bagarapim skin i save kamap, mi save beten long Jehova na tokim em long olgeta bel hevi bilong mi. Dispela i helpim mi long traim strong long lusim dispela pasin.”—Stiatok bilong Baibel: 1 Tesalonaika 5:17.