Wing Bilong Bataflai

WING bilong bataflai i no strong tumas, olsem na sapos liklik hap das o wara i pas long wing bilong en dispela bai mekim na bataflai i hatwok long flai gut. Maski i olsem, wing bilong en i save stap klin na drai. Wanem sikret bilong bataflai?

Tingim: Ol saveman long Ohio University i stadim bataflai Giant Blue Morpho (Morpho didius) i painimaut olsem maski wing bilong bataflai inap luk smut long ai bilong man, antap bilong en i gat planti liklik grile i slip antap long narapela narapela kain olsem kapa long rup bilong haus. Na ol dispela grile i gat ol liklik liklik baret long en we i save helpim long rausim ol das o wara samting i pas long wing. Ol ensinia i laik kopim ol samting long wing bilong bataflai bilong wokim ol strongpela peint bilong penim ol masin bilong ol faktori na haus sik samting na bai das na wara i no ken bagarapim ol.

Wing bilong bataflai em wanpela eksampel long hau saiens i traim long bihainim ol disain long ol samting i gat laip. Saveman Bharat Bhushan i tok: “Ol samting i gat laip kirap long ol liklik i go inap long ol bikpela samting i gat kain kain gutpela disain, inap planti handret yia nau ol man inap lukim na bihainim long wokim ol samting.”

Yu ting wanem? Wing bilong bataflai i kamap long rot bilong evolusen? O wanpela i bin wokim?