Wanem Samting i Mekim Man i Stap Amamas Tru?

ATING yu mekim wanpela wok, tasol wok i no kamap gut, olsem na yu mas stretim gen ol samting. Taim yu mekim olsem, dispela bai helpim yu na yu inap save long olsem wanem yu bai mekim gut ol wok long bihain.

Tasol dispela i narapela kain liklik long ol amamas bilong sotpela taim tasol. Yu inap ting olsem ol wok yu mekim bai helpim na lukautim yu long bihain, tasol em i kranki tingting. Ating bihain bai yu luksave long dispela, tasol i hatwok long mekim ol senis.

Tingim, Krais Jisas i bin givim dispela askim olsem: “Sapos man i kisim olgeta samting bilong dispela graun, tasol em i lusim laip bilong en, orait olgeta dispela samting bai helpim em olsem wanem?” (Matyu 16:26) Dispela tok i stret long ol man husat i yusim olgeta taim na strong bilong ol long kisim planti mani bilong baim ol samting ol i laikim. Kain tingting olsem i no inap helpim man long i stap amamas tru. Saveman Tom Denham i tok: “Man i tingting long kisim gutpela wok mani na planti mani kago samting, dispela i no inap helpim em. Em i kranki tingting long ting olsem planti mani samting bai mekim man i stap amamas tru.”

Planti man long nau bai wanbel long tok bilong dispela saveman. Olsem, wanpela wok painimaut long Amerika i soim olsem taim ol man i raitim lista bilong 22 “samting i mekim man i stap amamas, pasin bilong kisim planti mani” i stap namba 20 long dispela lista. Ol samting i stap nambawan long lista em helt, gutpela pasin pren, na wok yu amamas long mekim.

I klia tru olsem planti man inap luksave long samting i mekim man i stap amamas tru na ol samting i mekim man i amamas inap sotpela taim. Tasol i hatwok long ol man long mekim ol disisen we i soim olsem ol i gat stretpela tingting long rot bilong i stap amamas tru.