Liklik Bataflai Greater Wax Moth i Save Harim Gut Saun

LIKLIK bataflai greater wax moth inap harim ol saun i stap longwe tru winim ol arapela animal. Tasol tingim, yau bilong ol dispela bataflai i liklik tru inap olsem sais bilong het bilong pin.

Tingim: Inap planti yia, ol saientis i mekim wok painimaut long ol dispela liklik bataflai. Long nau, ol saientis long University of Strathclyde long Skotlan i yusim kain kain saun bilong testim yau bilong greater wax moth. Na ol i painimaut olsem tupela yau-dram bilong en inap long kisim gut saun, maski saun i stap longwe. Tasol ol narapela animal olsem blakbokis, ol dolfin, na tu, ol man i no inap harim saun i stap longwe tru.

Ol saveman i laik bihainim disain bilong yau-dram bilong greater wax moth long wokim ol nupela masin. Hau ol inap mekim olsem? Saveman James Windmill bilong University of Strathclyde i tok: “Yumi inap wokim ol liklik maikrofon bilong kamapim bikpela saun. Na tu, mipela inap putim ol liklik masin bilong kamapim saun long ol mobail fon na ol narapela masin samting.”

Yu ting wanem? Save bilong liklik bataflai greater wax moth long harim gut saun i kamap long rot bilong evolusen? O wanpela i bin wokim?