Rot Bilong Kamapim Pasin Rispek

HATWOK BILONG EN

Man marit i tok: “Taim mipela i marit, mi na meri bilong mi i gat narapela narapela tingting long pasin bilong soim rispek. I no olsem tingting bilong wanpela i stret na narapela nogat. Oltaim mi pilim olsem meri bilong mi i mas rispektim mi long taim em i toktok long mi.”

Meri marit i tok: “Mi go bikpela long ples we ol man i gat pasin bilong toktok bikpela, wokim pes, na katim tok taim man i toktok yet. Mipela i ting em orait long mekim olsem. Tasol pasin mipela i bihainim em narapela olgeta long ples man bilong mi i go bikpela long en.”

Pasin rispek i mas stap oltaim insait long marit. Olsem wanem yu inap soim olsem yu rispektim poroman marit bilong yu?

SAMTING YU MAS SAVE LONG EN

Ol man i laik bai ol narapela i rispektim ol. Baibel i tokim ol man marit: “Yupela olgeta wan wan i mas laikim ol meri bilong yupela olsem yupela i save laikim yupela yet. Na maritmeri i mas i gat bikpela rispek long man bilong en.” (Efesus 5:33) Em tru olsem man marit na meri marit i laik bai narapela i kamapim pasin rispek na pasin laikim, tasol man marit i save laikim moa pasin rispek. Carlosa wanpela man marit i tok: “Ol man i pilim olsem ol i gat wok long stretim ol hevi na lukautim famili bilong ol.” Taim meri i rispektim man bilong em long ol kain wok olsem, dispela i helpim tupela wantaim. Corrine em meri marit i tok: “Taim mi rispektim man bilong mi, em i save laikim mi moa yet.”

Ol meri marit i laik bai ol man i rispektim ol tu. Dispela tok i stret, long wanem, sapos man i laikim tru meri bilong em, orait em bai rispektim meri. Daniel i tok: “Mi mas rispektim tingting na laik bilong meri bilong mi. Na tu, mi mas rispektim filings bilong em. Maski mi no klia long risen na em i gat wanpela tingting, dispela i no makim olsem mi no ken pilim tingting bilong em.”

Ol manmeri i gat narapela narapela tingting long pasin rispek. Bikpela samting em poroman bilong yu i pilim olsem yu rispektim em. Long kirap bilong atikol, aninit long het tok “Hatwok Bilong En,” meri marit em yumi kamapim tok bilong en i kisim skul long dispela. Em i tok: “Maski mi pilim olsem mi rispektim man bilong mi, sapos em i pilim olsem mi no rispektim em, orait nau mi mas senisim pasin bilong mi.”

SAMTING YU KEN MEKIM

• Raitim 3-pela pasin bilong man o meri bilong yu em yu laikim. Taim yu tingim ol gutpela pasin bilong em, dispela inap helpim yu long rispektim em.

• Insait long wanpela wik, skelim toktok na pasin bilong yu, na i no bilong poroman bilong yu.

Toktok bilong yu. Wanpela wok painimaut long ol marit i tok: “Ol marit husat i save mekim ol gutpela tok long narapela narapela long taim ol i stretim hevi, ol i pas gut wantaim na stap amamas. Tasol ol marit husat i no mekim wanpela gutpela tok long taim ol i laik stretim ol hevi, planti bilong ol i divos.”b—Stiatok bilong Baibel: Sindaun 12:18.

Askim yu yet: ‘Mi save kamapim pasin rispek taim mi toktok long poroman marit bilong mi? Mi save tok amamas long ol narapela o oltaim mi skelim pasin bilong ol? Wanem krai bilong nek bilong mi taim mi laik kamapim tingting bilong mi?’ Poroman bilong yu bai wanbel long ol bekim bilong yu?—Stiatok bilong Baibel: Kolosi 3:13.

Traim dispela: Putim mak long mekim wanpela gutpela tok long poroman marit bilong yu long olgeta de. Wanpela rot: Tingim gen ol gutpela pasin bilong poroman marit bilong yu em yu laikim. Na oltaim tokim em olsem yu amamas long ol dispela pasin bilong em.—Stiatok bilong Baibel: 1 Korin 8:1.

Pasin bilong yu. Wanpela meri marit nem bilong en Alicia i tok: “Mi save lusim bikpela haptaim long mekim haus wok, na taim man bilong mi i stretim gut ol samting, o wasim ol plet kap, mi pilim olsem hatwok bilong mi i no lus nating na em i tingim mi tru.”

Askim yu yet: ‘Pasin bilong mi i soim olsem mi rispektim poroman marit bilong mi? Mi save lusim sampela haptaim long stap wantaim poroman marit na toktok wantaim em?’ Poroman bilong yu bai wanbel long ol bekim bilong yu?

Traim dispela: Raitim 3-pela rot yu laik bai poroman marit i soim rispek long yu. Poroman bilong yu i ken mekim olsem tu. Bihain, senisim ol lista na bai yutupela i ken wok long kamapim pasin rispek long ol rot poroman i laikim. Tingim olsem yu gat wok long soim rispek. Taim wanpela i go pas long mekim olsem, em isi long narapela i bihainim.