Tret Bilong Kina Sel Bilong Solwara

KINA SEL BILONG SOLWARA i save pas long ol ston, ol diwai, na long sait bilong sip. Tasol ol i no olsem sampela sel pis, em ol i save pas strong tru long ol samting. Ol i gat wanpela kain tret (byssus threads) we i helpim ol long hangamap o pas long ol samting. Na tu, dispela i helpim ol long muv na painim kaikai. Tasol tret bilong ol kina sel i no strong tumas na solwara inap long sakim ol. Hau ol dispela tret i helpim ol long pas strong long ol samting na ol i no kamaut?

Tingim: Wanpela hap bilong tret i strong na narapela i no strong tumas. Ol saveman i painimaut olsem 80 pesen bilong tret i strong na 20 pesen i no strong. Hap i strong i pas long ston o diwai samting, na hap i no strong tumas i pas long kina sel yet. Em risen na taim solwara i sakim ol kina sel i go i kam, ol i no inap kamaut.

Profesa Guy Genin i tok wok painimaut bilong ol kina sel “i narakain samting tru. Samting i helpim kina sel em ol tret bilong en. Gutpela disain long tret bilong ol i helpim ol long pas strong long ol samting.” Ol saientis i ting ol inap kopim dispela disain bilong joinim ol tul samting long ol bilding o long putim ol sensa masin long ol sabmarin, joinim ol masol long ol bun, na long samapim ol sua long bodi bilong man long taim ol i mekim operesen. Herbert Waite em wanpela profesa long University of California long Santa Barbara, Amerika. Em i tok: “Ol samting i stap laip long graun i gutpela tru na yumi inap lainim planti samting long ol.”

Yu ting wanem? Tret bilong kina sel i kamap long rot bilong evolusen? O wanpela i bin wokim?