Bilip Bilong Sampela

Ol Hindu

i bilip olsem pen na hevi man i karim em pe bilong ol pasin em i mekim, long laip bilong em long nau o long narapela laip bilong em long bipo. Man inap kamap long wanpela hap bilong laip ol i kolim moksa—man bai i no inap dai na bon gen—em bai i no tingim ol samting bilong graun.

Ol Muslim

i bilip olsem ol pen na hevi em panismen bilong sin na samting bilong traim bilip. Saveman Sayyid Syeed, em presiden bilong Islamic Society of North America i stori olsem ol hevi i kirapim yumi long “tenkyu long God long ol blesing yumi kisim na tingim olsem yumi mas helpim ol man i nidim helpim.”

Bilip tumbuna bilong ol Juda

i kamapim olsem ol pen na hevi i kamap long pasin man yet i mekim. Sampela Juda i tok bai i gat kirap bek, na long dispela taim bai i gat stretpela kot long ol man i no mekim rong na ol i karim pen na hevi. Bilip bilong ol Juda em ol i kolim kabalistik i skulim ol man olsem, taim man i dai em i save kamap nupela gen long narapela bodi, dispela i opim rot na planti taim em inap stretim ol popaia bilong em.

Ol Buda

i bilip tu olsem man i save bon gen planti taim. Ol i tok man i mas karim pen na hevi i go inap long ol tingting, pasin, na ol laik nogut bilong em i pinis. Sapos man i kisim savetingting, mekim ol gutpela wok, na tingting bilong em i stap klin, em inap go long nevana—em hap we i no gat pen na hevi.

Ol Konfusas

i bilip olsem planti pen na hevi i kamap bikos long “ol pasin na popaia bilong ol man,” em tok A Dictionary of Comparative Religion i mekim. Bilip bilong Konfusas i kamapim olsem taim man i bihainim stretpela pasin long laip dispela inap daunim pen na hevi, planti bilong ol dispela pen na hevi em “ol spirit i gat bikpela strong i kamapim. Taim dispela samting i kamap, man i mas kisim tasol ol samting ol spirit i givim.”

Lotu bilong sampela lain

i tok pen na hevi i kamap long wok bilong ol spirit nogut. Ol i tok ol sanguma man inap kamapim ol gutpela samting o bagarap na ol i ken pinisim pen na hevi ol i kamapim long rot bilong bihainim kain kain pasin tumbuna. Olsem na ol pasin tumbuna na marasin bilong ol dokta bilong ples inap daunim wok bilong ol sanguma man taim man i sik.

Ol Kristen

i tok pen na hevi i kamap, long wanem, fes man na meri i mekim sin, olsem Buk Stat long Baibel i kamapim. Tasol planti lotu i kamapim sampela tingting bilong ol yet long dispela tok bilong Baibel. Olsem, sampela Katolik i tok taim man i karim pen na hevi em i ken tingim dispela olsem ‘ofa em i givim long God’ bilong askim em long helpim lotu o long rot bilong dispela pen na hevi em i ken kisim bek narapela man.