2. Yu Ting Em Asua Bilong Yumi Yet Na Yumi Karim Pen Na Hevi?
Wai na Em i Bikpela Samting
Sapos bekim em yes, orait yumi inap long daunim pen na hevi.
Tingim
Ol man i mekim wanem na ol i gat asua long ol pen na hevi?
Mekim Nogut Long Meri o Pikinini.
Lain Wol Helt Oganaisesen (WHO) i tok klostu 1-pela long olgeta 4-pela 4-pela man o meri i bin karim hevi long wanpela i bin mekim nogut long ol taim ol i pikinini yet, na 1-pela long olgeta 3-pela 3-pela meri i bin karim hevi long wanpela i bin mekim nogut long ol o reipim ol (o mekim ol dispela pasin) long sampela haptaim long laip bilong ol.
Man i Kilim i Dai Narapela.
Lain Wol Helt Oganaisesen i kamapim wanpela ripot em World Health Statistics 2018 i tok: “Long 2016, long olgeta hap bilong graun, inap olsem 477,000 man i bin dai long narapela i kilim ol.” Antap long dispela namba, ol i ting i gat 180,000 manmeri i bin dai long ol woa na pait i kamap long 2016.
Hevi Bilong Helt.
Long wanpela atikol em magasin National Geographic i kamapim, man i raitim em Fran Smith i tok: “Moa long 1 bilion manmeri i save smok, na tabak em wanpela bilong fes 5-pela samting we i save kilim man: sik bilong hat, strok, olkain sik sotwin, sik bilong lang i save mekim man i sotwin, na lang kensa.”
Sindaun i No Wankain.
Saveman Jay Watts i tok: “Stap rabis, narapela narapela sindaun, luk daun long man bilong narapela lain, pasin bilong daunim ol meri, ranawe na go sindaun long narapela narapela hap na daunim kalsa bilong narapela ples, ol dispela samting i save mekim sik dipresen i go bikpela.”
KISIM SAMPELA SAVE MOA
Lukim vidio Why Did God Create the Earth? long jw.org.
Baibel i Tok
Ol man i gat bikpela asua long pen na hevi.
Planti pen na hevi i kamap long hatpela wok bos bilong ol gavman we ol i tok ol i lukautim ol man tasol ol i mekim laip bilong ol i kamap hatwok moa.
“Man i bin bosim man na i bringim hevi tasol long em.”—EKLISIASTIS 8:9.
Pen na hevi inap pinis.
Ol stiatok bilong Baibel i kirapim yumi long lukautim gut helt na stap bel isi wantaim ol narapela.
“Bel i stap isi, em i save givim laip long bodi, tasol pasin jeles i olsem sik i mekim ol bun bilong man i bagarap na i sting.”—PROVEP 14:30.
“Yupela i mas rausim olgeta pasin bilong bel nogut na kros na belhat na bikmaus na tok nogut, na olgeta kain pasin nogut.”—EFESUS 4:31.