3. Wai Na Ol Gutpela Man I Karim Pen Na Hevi?
Wai na Em i Bikpela Samting
Taim yumi lukim ol gutpela man i karim pen na hevi yumi pilim olsem dispela i no stret. Em risen na sampela i ting em i no bikpela samting long stap gutpela man.
Tingim
Sampela lain i bilip olsem ol man i save dai na bon gen. Ol i tok ol man i mekim gutpela pasin ol i bon gen na kisim gutpela laip, tasol ol man i mekim pasin nogut ol i bon gen na karim planti hevi. Dispela bilip i kamapim olsem, gutpela man inap karim hevi sapos em i mekim ol pasin nogut long narapela laip bilong em long bipo. Tasol . . .
Sapos man i bon gen i no inap tingim narapela laip bilong em long bipo, orait wanem risen bilong dispela pen na hevi em i karim?
Wai na yumi save wok hat long lukautim helt bilong yumi na abrusim ol eksiden sapos ol samting yumi mekim long narapela laip bilong yumi long bipo i as bilong ol samting i painim yumi long nau?
KISIM SAMPELA SAVE MOA
Lukim vidio Bilong Wanem God i Larim Pen na Hevi i Stap? long jw.org/tpi.
Baibel i Tok
Pen na hevi i no panismen i kam long God.
Planti bilong ol pen na hevi i kamap nating—planti taim, man i stap long rong ples na long rong taim.
“I no olsem oltaim ol man i save spit tru i save winim resis, o ol strongpela man i save winim pait, o ol man i gat savetingting i gat kaikai, o ol saveman i gat mani kago, o ol man i gat save, wok bilong ol i save kamap gut, long wanem, taim nogut na ol samting we man i no ting inap kamap, i save painim olgeta bilong ol.”—EKLISIASTIS 9:11.
Yumi gat sin, em wanpela as na yumi karim pen na hevi.
Planti taim ol man i yusim dispela tok sin long kolim pasin nogut wanpela i mekim. Tasol Baibel i yusim dispela tok long stori long samting olgeta man i kisim, ol gutpela man na man nogut wantaim.
“Taim mama i karim mi, mi bon wantaim sin, na taim mi stap yet long bel bilong mama, mi man bilong mekim sin.”—BUK SONG 51:5.
Sin i kamapim bikpela hevi long ol man.
Sin i no bagarapim tasol pasin pren bilong yumi wantaim Krieta bilong yumi, nogat, em i mekim na yumi no stap wanbel wantaim olgeta samting God i wokim. Dispela i kamapim bikpela pen na hevi, long ol man wan wan na olgeta man olsem wanpela lain.
“Taim mi gat laik long mekim pasin i stret, pasin nogut i stap wantaim mi.”—ROM 7:21.
“Olgeta samting God i wokim, ol i wok long krai na pilim pen wantaim.”—ROM 8:22.