Mekim Pasin Laikim

Hevi

Filings bilong bel nogut long ol man bilong narapela lain i no inap pinis hariap. Bikpela taim na strong i mas lus bilong rausim vairas, olsem tasol bikpela taim na strong i mas lus long rausim pasin bilong bel nogut long narapela lain. Yu inap mekim wanem long rausim pasin bilong bel nogut long narapela lain long bel bilong yu?

Stiatok Bilong Baibel

Ol piksa: 1. Wanpela man Esia i opim dua bilong wanpela blakskin man i karim ol kap kofi. 2. Dispela seim blakskin man i serim kofi wantaim ol wanwok bilong em, na meri India tu i stap.

“Yupela i mas werim pasin laikim olsem yupela i werim klos, long wanem, pasin laikim em i nambawan gutpela rot bilong mekim ol man i kamap wanbel.”—KOLOSI 3:14.

Dispela i makim wanem samting? Pasin bilong mekim gut long ol narapela i save bungim ol man wantaim. Taim yu mekim moa yet pasin laikim long ol narapela, isi isi pasin bilong bel nogut long ol narapela bai pinis. Taim pasin laikim bilong yu i go bikpela moa, dispela bai helpim yu long rausim long bel pasin bilong heitim ol narapela o tingting kranki long ol.

Samting Yu Ken Mekim

Ol piksa: 1. Meri India i helpim wanpela lapun meri Yurop long karim ol kaikai na wokabaut i go antap long lata. 2. Wanpela lapun meri Yurop i givim bisket long neiba bilong em, seim man Esia.

Tingim sampela rot stret bilong soim pasin laikim long ol man bilong narapela lain em ating yu bin i gat tingting kranki long ol. I no olsem yu mas mekim ol bikpela samting. Traim long mekim wanpela o sampela bilong ol dispela samting:

Mekim ol liklik samting long pasin laikim, na isi isi pasin bilong yu long bel nogut long narapela lain bai pinis

Mekim gutpela pasin long ol man bilong dispela lain, olsem opim na holim dua long ol o long bas givim sia bilong yu long wanpela bilong ol.
Traim long stori liklik wantaim ol maski ol i no save gut long tokples bilong yu.
No ken les kwik taim ol i mekim pasin em yu no kliagut long en.
Pilim bel hevi bilong ol taim ol i stori long hevi bilong ol.

Wanpela Stori Tru: Nazaré (Gini-Bisau)

“Pastaim mi bin bel nogut long ol man bilong narapela ples i kam stap long hia. Mi harim olsem planti bilong ol i save giaman na kisim helpim nating long gavman na ol i save mekim kain kain pasin raskol. Dispela i mekim na mi hatwok long laikim ol. Tasol mi no ting filings bilong mi long ol i makim pasin bilong bel nogut long narapela lain, bikos em tingting olgeta man i gat long ol dispela man bilong narapela ples.

“Tasol bihain, mi luksave olsem tingting kranki mi gat long ol, tru tru em pasin bilong bel nogut long ol man bilong narapela lain. Gutpela savetingting bilong Baibel i helpim mi long mekim moa yet pasin laikim long ol. Nau mi no save abrusim ol. Mi save tok halo long ol na toktok wantaim ol. Mi traim long kisim save long wan wan bilong ol. Nau mi gat stretpela tingting long ol, na mi amamas long stap wantaim ol.”