GRAUN INAP ABRUSIM BAGARAP
WIN
YUMI nidim win, tasol i no bilong pulim tasol. Win i save lukautim graun bilong yumi na strongpela hat bilong san i no bagarapim. Sapos i no gat win, olgeta hap bilong graun bai i go kol nogut tru.
Ol Samting i Bagarapim Win
Win nogut inap bagarapim ol samting i gat laip long graun. Wol Helt Oganaisesen i tok liklik lain tasol long graun i pulim gutpela win.
Ol i tok win nogut i kamapim ol sik olsem kensa bilong lang na ol bikpela sik bilong klok. Win nogut i mekim na 7,000,000 manmeri i save dai hariap long olgeta yia.
Graun Bilong Yumi—God i Wokim Bilong Stap Oltaim
God i wokim graun bilong yumi long rot we em inap kamapim klinpela win em olgeta samting i gat laip long graun i ken kisim. Tasol dispela inap kamap sapos ol man i was gut na i no bagarapim graun, win, na wara. Skelim sampela eksampel.
Yumi save olsem ol bikbus i save kisim kabon daioksait. Tasol planti i no save olsem ol ples tais arere long nambis long hap we ol mangro i gro long en, ol i save mekim gutpela wok moa. Ol mangro i mekim bikpela wok moa bilong kisim win kabon daioksait winim ol bikbus inap 5-pela taim moa.
Sampela wok painimaut ol i mekim i no longtaim i go pinis i soim olsem sampela kain gras, kain olsem gras bilong solwara ol i kolim kelp i save kisim kabon daioksait long win, na bringim i go daun long as bilong solwara na putim long hap. Ol gras kelp i luk olsem ol lip i gat sap sap long en we ol i gat planti liklik poket we i pulap long win, dispela i mekim na em i save trip i go longwe tru. Taim em i stap longwe tru long nambis, ol dispela poket i save bruk na ol lip bilong kelp we i pulap long kabon daioksait i save sink i go daun long as bilong solwara. Na ol i save stap olsem long as bilong solwara inap planti handret yia.
Win bilong yumi inap long kamap klin gen, dispela i kamap klia long taim bilong COVID-19 lokdaun. Long 2020, taim olgeta faktori na ol kar long olgeta hap bilong graun i no ron moa na i no kamapim win nogut, wantu win i kamap klin. Long “2020 World Air Quality Report,” ol i tok olsem klostu olgeta bilong ol kantri we ol i mekim wok painimaut long en, win long ol dispela kantri i kamap klin moa bihain liklik long lokdaun i kamap long ol dispela kantri.
Ol Samting Ol Man i Mekim
Sapos ol man i yusim baisikol bilong go long wok o skul dispela bai daunim win nogut
Ol gavman i wok yet long tokim ol kampani long daunim namba bilong ol samting ol i mekim we i bagarapim win. Na tu, ol saientis i wok long painim ol nupela rot bilong rausim ol samting i wok long bagarapim win. Olsem, wanpela rot ol i kamapim em ol i yusim ol liklik binatang long tanim ol samting nogut long win i kamap samting we i no bagarapim win. Na tu, ol saveman i tokim ol manmeri long wokabaut o yusim baisikol na i no yusim kar na painim ol rot bilong yusim ol masin samting long haus we i no yusim bikpela pawa.
Sampela gavman i givim ol nupela stov long ol manmeri long kantri bilong ol, we i no kamapim bikpela smok, tasol planti i no kisim yet ol dispela stov.
Tasol ol i mas mekim sampela samting moa, olsem wanpela ripot bilong ol intenesenel kampani, na Wol Helt Oganaisesen na World Bank i kamapim.
Dispela ripot i tok olsem long 2020, inap olsem 30 pesen bilong ol manmeri long graun i save yusim ol masin samting bilong kukim kaikai we i save kamapim win nogut. Long planti hap, sampela manmeri tasol inap baim ol nupela stov o ol i mekim wok long ol narapela samting we i no yusim kol, oil, o ges.
Ol Risen Bilong Wetim Ol Gutpela Samting—Tok Baibel i Mekim
“Dispela em tok bilong God tru, Jehova, em i Krieta bilong skai na . . . Man i bin wokim graun na olgeta samting i stap long en, em Man i bin givim win bilong maus bilong em long ol manmeri i stap long en.”—Aisaia 42:5.
God i wokim win em yumi pulim na ol samting bilong klinim win, na em i gat bikpela strong na em i laikim tru ol manmeri. Olsem na i stret yumi bilip olsem em inap rausim ol samting nogut long win. Lukim atikol “God i Tok Promis Olsem Graun Bilong Yumi i No Inap Bagarap.”