Stadi 24

Ol Gutpela Tok Piksa

¹ Ol tok piksa i save kirapim tingting bilong ol man na ol inap kisim gut ol bikpela tok. Tasol taim yumi mekim tok piksa insait long tok bilong yumi, dispela tok piksa i mas stret long tok yumi mekim.

² Sapos man i bihainim tingting kranki na yu kamapim wanpela gutpela tok piksa, ating yu inap stretim tingting bilong em. Olsem: Sapos man i ting God i save tromoi ol man nogut long wanpela ples paia i gat pen, yu ken mekim tok piksa olsem: Yumi ol papa long graun, taim pikinini bilong yumi i mekim pasin nogut yumi no save kukim han bilong em long paia bilong strafim em, a?

³ Yumi ken mekim tok piksa long kain kain samting, olsem: Ol wok ol man i save mekim, o pasin bilong ol, o haus o sip samting. Tasol dispela tok piksa i mas stret long ol tok yumi mekim. No ken mekim planti tok piksa.

⁴ Taim yu redim tok, sapos yu no inap tingim wanpela gutpela tok piksa, yu ken lukim ol buk bilong Sosaiti.

⁵ Taim yu mekim tok piksa, no ken kamapim ol strongpela tok; kamapim ol tok ol man bai kisim kwik. Planti taim Jisas i mekim liklik tok piksa tasol; em i no pulim i go bikpela. (Lukim Matyu 13:​31-33; 24:​32, 33.) Ol liklik tok piksa bilong Jisas i givim bikpela save long ol man. Gutpela tok piksa em ol man bai kisim kwik.

⁶ Mekim tok piksa ol man inap pilim. No ken stori nating long tok piksa; mas kamapim gut insait bilong en tu. Man bilong mekim tok i mas save gut long as bilong dispela tok piksa bambai em inap kamapim gut long ol man na ol tu i ken pilim gut.​—Mt 12:​10-12.

⁷ Tingim ol bikpela tok yu laik kamapim na tingim tok piksa i stret long dispela. Sapos yu mekim tok piksa na kamapim strong ol liklik tok, ol man bai tingim ol liklik tok na lusim tingting long ol bikpela tok. Nogut yu wok long stori long wanpela tok piksa na ol man i tingim tok piksa tasol na ol i no tingim as bilong dispela tok piksa.

⁸ Tok piksa i stret long ol man bilong harim. Devit i mekim pasin pamuk wantaim Batseba, na Natan i givim strongpela tok long em. Natan i mekim wanpela tok piksa long sipsip. Dispela tok piksa i stret long Devit, long wanem, bipo Devit em i bin lukautim ol sipsip. (2 Sml 12:​1-6) Yumi tu yumi mas tingim ol tok piksa i stret long ol man bilong harim bambai ol inap pilim gut as bilong dispela tok.

⁹ Sapos planti man bilong harim ol i lapun liklik, yumi no ken mekim ol tok piksa i stret long ol yangpela manmeri. Tingim ol samting ol man bilong harim i save gut long en na mekim tok piksa long dispela. Jisas i bin mekim olsem.

¹⁰ Sapos yu givim tok long ol meri, nogut yu stori long ol samting bilong ol man, olsem bisnis samting; mas stori long ol samting bilong haus na bai ol inap kisim save kwik long dispela samting.

¹¹ Yumi mas mekim tok piksa i stret long tingting bilong ol Kristen. Nogut yumi stori long wanpela samting nogut na bai sampela man bilong harim i kros. Tingim na skelim gut ol tok piksa yu laik mekim; em i mas stret long ol man i sindaun harim tok bilong yu.