Noa i Wokim Sip

NOA i gat meri na tripela pikinini man. Nem bilong tripela pikinini em Siem, Ham, na Jafet. Na ol dispela pikinini i marit pinis, olsem na i gat etpela manmeri long famili bilong Noa.

God i tokim Noa long mekim wanpela samting i narapela kain. Em i tokim em long wokim wanpela traipela sip, tasol lukluk bilong en i olsem wanpela bikpela, longpela bokis. God i tok, ‘Wokim tripela plua, wanpela daunbilo na wanpela namel na wanpela antap, na wokim sampela rum insait long en.’ Sampela rum i bilong Noa na famili bilong em, na sampela i bilong ol animal, na sampela i bilong putim kaikai bilong ol.

God i tokim Noa long wokim gut sip na bai wara i no ken i go insait. God i tok, ‘Bai mi mekim bikpela tait i kamap na bagarapim olgeta samting long graun. Olgeta man i no i stap insait long sip bai bagarap.’

Noa na ol pikinini bilong em i bihainim tok bilong Jehova na ol i kirap wokim sip. Tasol ol narapela manmeri i lap tasol. Ol i mekim yet ol pasin nogut. I no gat wanpela bilong ol i bilipim tok bilong Noa taim em i tokim ol long samting God i laik mekim.

Ol i kisim bikpela haptaim long wokim dispela sip, long wanem, em i traipela tru. Planti yia bihain, ol i pinisim dispela wok. Orait nau God i tokim Noa long kisim ol animal i go insait long sip. Long sampela kain animal God i tokim em long kisim tupela tupela, wanpela man na wanpela meri. Na long sampela kain animal, God i tokim Noa long kisim sevenpela sevenpela. Na tu, God i tokim Noa long bringim olgeta kain kain pisin. Noa i mekim olgeta samting olsem God i tokim em long mekim.

Bihain, Noa na famili bilong em i go insait long sip na God i pasim dua. Ol i wet i stap. Tingim olsem yu stap wantaim ol insait long sip na wet i stap. Olsem wanem? Bikpela tait bai kamap tru tru olsem God i tok?