Hevi Long Lain Bilong Devit

TAIM Devit i kirap pinis long mekim wok king long Jerusalem, Jehova i helpim ami bilong em long daunim planti birua. Jehova i bin tok promis long givim graun Kenan long ol Israel. Na nau Jehova i helpim ol na ol i kisim dispela hap olgeta.

Devit em i gutpela king. Em i laikim tumas Jehova. Olsem na taim em i kisim pinis Jerusalem, wanpela samting em i mekim pastaim em olsem: Em i bringim bokis kontrak bilong Jehova i kam long Jerusalem. Na em i laik wokim wanpela haus lotu na putim dispela bokis kontrak long en.

Taim Devit i go lapun liklik, em i mekim wanpela bikpela rong. Devit i save olsem i no stret long kisim samting bilong narapela man. Tasol long wanpela apinun, em i stap long rup bilong haus king bilong em, na em i lukluk i go daun na i lukim wanpela naispela meri tru. Nem bilong em Batseba, na man bilong em i wanpela soldia bilong Devit, nem bilong em Uria.

Devit i laikim tumas Batseba, olsem na em i tokim sampela man long bringim Batseba i kam long haus king bilong em. Man bilong Batseba i stap long pait. Devit i slip wantaim Batseba na bihain Batseba i save olsem em i gat bel. Devit i tingting planti na em i salim tok long namba wan ofisa bilong ami, em Joap, long putim Uria i go paslain long pait na bai ol birua i kilim em i dai. Taim Uria i dai, Devit i maritim Batseba.

Jehova i kros nogut tru long Devit. Olsem na em i salim wokman bilong em, Natan, i go tokim Devit long ol sin bilong em. Yu inap lukim Natan i wok long toktok long Devit. Devit i sori tru long rong bilong em, olsem na Jehova i no kilim em i dai. Tasol Jehova i tok: ‘Yu bin mekim ol dispela pasin nogut, olsem na planti hevi bai kamap long lain bilong yu.’ Na tru tumas, planti hevi i painim Devit!

Pastaim, pikinini man bilong Batseba i dai. Na bihain namba wan pikinini man bilong Devit, em Amnon, em i slip wantaim susa bilong em Tamar. Narapela pikinini man bilong Devit, em Apsalom, em i belhat nogut tru na em i kilim i dai Amnon. Bihain, Apsalom i pulim planti manmeri long laikim em, na em i mekim em yet i kamap king. Devit i mekim pait long Apsalom, na em i win na ol i kilim i dai Apsalom. Yes, planti hevi i painim Devit.

Batseba i karim narapela pikinini man, nem bilong em Solomon. Taim Devit i lapun na sik, pikinini man bilong em Adoniya i laik mekim em yet i kamap king. Tasol Devit i tokim pris Sadok long kapsaitim wel long het bilong Solomon bilong makim olsem Solomon bai kamap king. Bihain liklik, Devit i dai taim em i gat 70 krismas. Em i bin mekim wok king inap 40 yia, na nau Solomon em i king bilong Israel.