Fopela Mangi Long Babilon

KING Nebukatnesar i kisim olgeta lain Israel i gat gutpela skul i go long Babilon. Bihain em i makim ol mangi i gat gutpela skin na save, winim ol arapela. Fopela bilong ol em ol dispela mangi yu lukim long piksa. Wanpela em Daniel, na long 3-pela narapela mangi ol Babilon i givim nem long ol olsem Satrak, Mesak, na Abetnego.

Nebukatnesar i laik givim skul long ol dispela mangi na bai ol i mekim wok long haus king bilong em. Bihain long 3-pela yia em bai makim tasol ol mangi i gat bikpela save bilong helpim em long stretim ol hevi. King i laik bai skin bilong ol i kamap strongpela taim ol i wok long kisim skul. Olsem na em i tokim ol wokman bilong em long givim gutpela kaikai na wain long ol, wankain olsem em na famili bilong em i save kisim.

Lukim yangpela Daniel. Yu save em i tok wanem long namba wan ofisa bilong Nebukatnesar, em Aspenas? Daniel i tokim em olsem em i no laik kisim ol gutpela kaikai em king i salim i kam. Tasol Aspenas i tingting planti. Em i tok: ‘King i makim pinis ol kaikai na dring bilong yupela. Na sapos yupela i no kisim dispela kaikai na skin bilong yupela i no kamap gut olsem bilong ol arapela mangi, king bai kilim mi i dai.’

Olsem na Daniel i go lukim wasman em Aspenas i bin makim bilong lukautim Daniel na 3-pela pren bilong em. Em i tok: ‘Plis, mi laik bai yu traim mipela inap 10-pela de. Givim mipela ol sayor samting na wara bilong dring. Bihain yu ken skelim skin bilong mipela wantaim skin bilong ol arapela mangi em ol i kisim kaikai bilong king, na yu ken skelim skin bilong husat i gutpela moa.’

Wasman i orait long dispela samting. Na bihain long 10-pela de, skin bilong Daniel na 3-pela pren bilong em i gutpela moa, winim ol arapela mangi. Olsem na wasman i larim ol i kaikai ol sayor samting na ol i no kisim kaikai bilong king.

Bihain long 3-pela yia, ol i kisim olgeta dispela yangpela man i go long King Nebukatnesar. Em i toktok wantaim olgeta, na em i lukim olsem save bilong Daniel na 3-pela pren bilong em i winim tru save bilong ol arapela. Olsem na em i givim wok long ol long haus king. Na taim king i givim sampela askim long Daniel, Satrak, Mesak, na Abetnego, o em i kamapim sampela hevi long ol, ol inap bekim gut na stretim gut ol hevi, winim tru ol pris na saveman bilong king.