Sapta 11
‘Wok Long Painim Kingdom Pastaim’
WINIM 1,900 yia bipo, Jisas i stap long Galili na em i tokim ol disaipel: “Yupela i mas wok pastaim long painim kingdom bilong God wantaim stretpela pasin bilong em.” Tasol Krais i no kamap king long taim bilong ol, olsem na bilong wanem ol i mas tingim dispela Kingdom? Long wanem, long rot bilong dispela Kingdom i stap long han bilong Krais bai Jehova i stretim bek nem bilong em na kamapim laik bilong em hia long graun. Sapos man i pilim tru olsem dispela samting i bikpela samting, em bai tingim dispela Kingdom pastaim. Ol Kristen bilong pastaim i bin mekim olsem na yumi mas mekim moa yet, long wanem nau dispela Kingdom i kamap pinis. Orait, olsem wanem? I stap bilong yu i makim olsem yu tingim kingdom bilong God pastaim?—Mt. 6:33.
2 Planti man ol i save tingim ol narapela samting pastaim. Ol i wok strong long kisim mani na laplap na kaikai na ol amamas bilong skin. (Mt. 6:31, 32) Dispela pasin bilong ol i kamapim long ples klia olsem ol i save tingim skin na laik bilong ol yet tasol na God i stap namba tu. Na planti ol i no tingim God liklik. Ol i no bilip.
3 Tasol Jisas i tokim ol disaipel bilong em: “Yupela i no ken bungim gutpela gutpela samting bilong yupela hia long dispela graun,” long wanem ol dispela samting i no save stap oltaim. Em i tok ol i mas mekim wok bilong Jehova na bai ol i ‘bungim ol gutpela samting long heven.’ Ai bilong ol i mas “gutpela.” Ol i mas lukluk long wanpela samting tasol, olsem ol i mas tingting long mekim laik bilong God tasol. Jisas i tok: “Yupela i no inap holim wok bilong God na bilong mani wantaim.” Tasol olsem wanem bai ol i kisim kaikai na klos na haus? Jisas i tok, “Yupela i no ken tingting planti.” Ol i mas tingim ol pisin—God i save lukautim ol. Na ol i mas tingim ol plaua—God i save givim gutpela bilas long ol. Na Em i lukautim moa yet ol manmeri i mekim wok bilong em, a? Olsem na Jisas i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu [olsem ol samting bilong skin] long yupela.” (Mt. 6:19-34) Yu bilipim dispela tok? Ol samting yu mekim i kamapim dispela bilip bilong yu?
Nogut Yu Larim Sampela Samting i Karamapim Tok Bilong Kingdom
4 Sapos man i tingim tumas ol samting bilong skin, dispela inap bagarapim bilip bilong em. Maski em i tok em i laikim Kingdom, tasol sapos long bel bilong em em i tingim ol narapela samting pastaim, orait ol dispela samting bai “karamapim” tok bilong Kingdom. (Mt. 13:18, 19, 22) Tingim yangpela maniman em i bin tokim Jisas: “Bai mi mekim wanem na mi ken kisim laip i stap gut oltaim oltaim?” Ol tok em i mekim long Jisas i makim olsem em i save bihainim pasin i stret na mekim gut long ol man, tasol em i tingim tumas ol mani kago samting bilong em. Em i no laik lusim ol dispela samting na bihainim Krais. Olsem na em i lus long kamap king wantaim Krais long Kingdom bilong heven. I olsem Jisas i tok: “Ol man i gat planti samting ol i hatwok long i go insait long kingdom bilong God.”—Mak 10:17-23.
5 Sampela yia bihain aposel Pol i raitim pas long Timoti taim Timoti i stap long Efesas. Ol man long biktaun Efesas long bipo ol i man bilong wok bisnis na ol i gat planti samting. Pol i tokim Timoti: “Mama i karim yumi na yumi kamap long graun, long dispela taim yumi no bin karim wanpela samting i kam. Na bihain bai yumi lusim graun, long dispela taim bai yumi no inap karim samting i go. Na sapos yumi gat kaikai na laplap samting, orait yumi ken tok, ‘Em inap long mi.’ ” I stret yumi mas mekim wok na lukautim yumi yet wantaim famili bilong yumi long “kaikai na laplap samting.” Tasol yumi mas was gut, olsem Pol i tok: “Ol man i ting long kisim planti kago, ol bai i pundaun long traim, . . . Na bel bilong ol bai i kirap long planti samting nogut i save mekim ol i longlong. Na bai ol i lus na bagarap tru.” Seten i save wok hait na isi isi em i bagarapim bilip bilong man. Ating pastaim em i pulim man long liklik samting. Bihain em i pulim strong dispela man—olsem opim rot bambai dispela man inap kisim bikpela wok moa o bikpela namba samting. Nau dispela man i kisim bikpela pe moa, tasol dispela nupela wok i pulim bikpela hap taim bilong em. Pastaim em i save mekim ol wok bilong spirit long dispela hap taim bilong em, tasol nau em i mas givim dispela hap taim bilong mekim dispela wok bilong skin. Sapos yumi no was gut bai yumi kirap “laikim tumas mani,” na dispela samting bai karamapim ol bikpela samting tru yumi mas tingim, em ol samting bilong Kingdom. Olsem Pol i tok: “Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela pen moa.”—1 Ti. 6:7-10.
6 Pol i laikim tru brata Kristen bilong em, Timoti, olsem na em i tokim Timoti: “Givim baksait long ol dispela samting.” Timoti i mas “bilip” na “ran strong.” (1 Ti. 6:11, 12) Yumi mas taitim bun tru bambai yumi inap sakim pasin bilong ol man bilong dispela graun, em ol i laikim tumas mani kago. Na sapos yumi bilip na wok strong, Jehova i no ken lusim yumi. Maski pe bilong ol samting i go antap na planti man i no gat wok, tasol Jehova bai lukautim yumi long ol samting yumi mas kisim bilong i stap laip.—Hi. 13:5, 6.
Ol Disaipel Bilong Pastaim i Makim Pasin Yumi Mas Bihainim
7 Jisas i skulim gut ol aposel bilong em, na bihain em i salim ol i go long ol Isrel na autim gutpela tok, olsem: “Kingdom bilong heven em i kam klostu pinis.” Em gutpela tok tru! Krais Jisas em i king bilong dispela Kingdom na em i stap namel long ol. Ol aposel i givim bel long mekim wok bilong God, olsem na Jisas i laik kirapim ol long bilip tru olsem God bai lukautim ol. Em i tok: “Yupela i no ken kisim samting bilong wokabaut. Yupela i no ken kisim stik or brasbel o bret o mani. Na yupela i no ken kisim tupela siot.” (Mt. 10:5-10; Luk 9:1-6; 10:4-7) Jehova inap kirapim ol wantok bilong ol long helpim ol, long wanem em pasin bilong ol Isrel, ol i save mekim gut long ol man na givim kaikai samting long ol.
8 Tasol bihain, klostu long taim Jisas i dai, em i toksave long ol aposel, olsem: Bai ol wantok i no ken mekim gut long ol olsem bipo, long wanem nau bai ol hetman bilong Isrel i birua long ol. Na tu, liklik taim na ol i mas kisim tok bilong Kingdom i go long ol narapela lain. Nau ol i mas kisim “mani” na “bret” i go wantaim ol. Tasol ol i mas wok yet long tingim Kingdom bilong Jehova pastaim na stretpela pasin bilong em. Ol i mas bilip tru olsem God bai helpim ol long painim kaikai samting.—Luk 22:35-37.
9 Aposel Pol i bilipim dispela tok bilong Jisas na em i stap olsem gutpela piksa bilong yumi. Wok bilong autim tok em i namba wan samting long tingting bilong Pol. (Ap. 20:24, 25) Taim em i go long wanpela hap bilong autim tok, em i save samapim ol haus sel bilong kisim liklik wansiling na baim kaikai samting. Em i no sindaun nating na wetim ol narapela man i lukautim em long kaikai samting. Nogat. (Ap. 18:1-4; 1 Te. 2:9; 1 Ko. 9:18) Tasol taim ol i pilim tru ol gutpela wok em i mekim na ol i givim kaikai samting long em o singautim em i go i stap long haus bilong ol, em i amamas na em i tenkyu tru long ol. (Ap. 16:15, 34; Fl. 4:15-17) Ol man na meri Kristen i gat wok long lukautim famili, Pol i no tokim ol long lusim dispela wok bambai ol inap autim tok. Nogat. Em i kirapim ol long skelim gut ol wok bilong ol bambai ol inap lukautim gut olgeta wok ol i mas mekim. Em i tokim ol, ol i mas mekim wok long han bilong ol yet, na laikim tumas famili bilong ol, na hapim samting bilong ol na givim hap long narapela man. (Ef. 4:28; 2 Te. 3:7-12; Ta. 2:3-5) Na em i kirapim ol long tingim God bai helpim ol; mani kago nogat. Olgeta samting ol i mekim i mas kamapim ples klia olsem ol i save tru wanem ol samting i bikpela samting moa. Ol i mas bihainim tok bilong Jisas na painim Kingdom bilong God pastaim wantaim stretpela pasin bilong em.—Fl. 1:9-11.
Yu Mas Tingim Kingdom Pastaim
10 Olsem wanem? Yu save mekim bikpela wok bilong autim gutpela tok bilong Kingdom? Sapos i no gat samting bilong pasim yu na yu givim bel tru long Kingdom, ating yu mekim bikpela wok bilong autim tok. Jisas i no tok, ‘Yu mas tingim Kingdom taim yu no gat narapela wok.’ Na em i no tok, ‘Sapos wan wan taim yu mekim sampela tok long Kingdom, em inap.’ Na em i no tok, ‘Pastaim yu ken wok strong, tasol sapos yu pilim olsem Nupela Taim i no kamap kwik, orait, yu ken mekim liklik wok bilong Kingdom, tasol yu ken wok tu long painim gutpela sindaun olsem ol narapela man i mekim.’ Jisas i no tok olsem, a? Em i save Kingdom i bikpela samting na em i tokaut long laik bilong Papa bilong em, em i tok: “Mobeta yupela i tingting long painim kingdom bilong God.” Na Matyu i raitim dispela tok bilong Jisas, olsem: “Yupela i mas wok pastaim long painim kingdom bilong God wantaim stretpela pasin bilong em.” (Luk 12:31; Mt. 6:33) Tru yumi planti Kristen yumi mas mekim sampela wok bilong kisim kaikai samting bilong yumi yet wantaim famili bilong yumi. Tasol sapos yumi bilip tru, bai yumi tingim wok bilong Kingdom pastaim, em God i givim dispela wok long yumi. Tasol yumi no ken lusim wok bilong yumi long lukautim famili.—1 Ti. 5:8; Pro. 29:15.
11 Yumi sampela inap lusim bikpela hap taim long autim tok. Tasol Jisas i mekim tok piksa na em i tok, olgeta manmeri em bel bilong ol i olsem gutpela graun, ol bai karim kaikai. Inap hamas? Yumi olgeta i no wankain. Sampela i lapun, sampela i gat sik, sampela i gat wok long lukautim famili. Tasol sapos yumi givim bel tru long Kingdom, bai wok bilong yumi i karim kaikai.—Mt. 13:19, 23.
12 Yumi ken tingim sampela mak yumi laik winim bambai yumi ken mekim bikpela wok moa bilong autim tok. Ol yangpela i ken tingim bikpela wok yangpela Kristen Timoti i bin mekim. (Fl. 2:19-22) Taim ol i pinis long skul, gutpela sapos ol i mekim wok painia, a? Na ol narapela tu i ken tingting long mekim sampela wok moa bilong spirit.
13 Yumi no ken skelim ol narapela man na ting ol inap mekim bikpela wok moa. Nogat. Yumi mas skelim yumi yet. Bilip bilong yumi i mas kirapim yumi long skelim ol samting yumi mekim bambai yumi ken mekim wok bilong God inap tru long skel bilong yumi. (Rom 14:10-12; Ga. 6:4) Seten i tok, Jop i tingim skin bilong em yet na em i mekim wok bilong God. Na Seten i sutim wankain tok long yumi. Em i tok yumi tingim tasol ol samting bilong skin na ol samting bilong helpim sindaun bilong yumi. Tasol sapos yumi wok tru long painim kingdom pastaim, bai yumi kamapim long ples klia olsem Seten em i man bilong giaman tru. Yumi no tingim mani kago o sindaun bilong yumi i bikpela samting. Yumi tingim wok bilong God em i bikpela samting. Long ol tok na pasin bilong yumi, yumi kamapim bel bilong yumi olsem yumi givim bel tru long Jehova na yumi daun long em, em i King, na yumi laikim tumas ol narapela man.—Pro. 27:11; Jop 1:9-11; 2:4, 5.
14 Sapos yumi gat sedyul, olsem yumi makim taim bilong mekim ol wok bilong yumi, bai yumi inap mekim bikpela wok moa. Jehova yet i save “makim taim” bilong mekim ol wok bilong em, na yumi mas bihainim pasin bilong em. (Eks. 9:5; Mak 1:15; Ga. 4:4) Gutpela sapos yumi inap makim wanpela o tupela taim long olgeta wik na long dispela taim yumi makim pinis yumi go long autim tok. Planti tausen Witnes Bilong Jehova long olgeta hap ol i save mekim wok painia helpim na long olgeta de ol i wok inap tupela o tripela aua samting long autim tok. Sampela ol i save mekim dispela kain wok long olgeta taim; sampela ol i save mekim wanpela o tupela taim long yia. Na planti tausen ol i mekim wok painia regula na ol i wok inap tripela aua long olgeta de long autim tok bilong Kingdom. Na sampela ol i mekim wok painia spesel o wok misineri na ol i lusim planti aua moa long mekim wok bilong Kingdom. Yumi ken autim tok long ol haus, na long ol narapela taim tu yumi ken wok long painim rot bilong autim tok long ol man i laik harim. (Lukim Jon 4:7-15.) Yumi olgeta yumi mas tingim gut tok profet bilong Jisas, em i tok: “Bai ol i autim dispela gutnius bilong kingdom long olgeta hap . . . na bihain tasol bai las de i kamap.” Yumi mas laik long mekim dispela wok inap tru long skel bilong yumi.—Mt. 24:14; Ef. 5:15-17.
15 Maski ol Witnes i stap long wanem wanem hap, tasol ol i wok gut wantaim long mekim dispela gutpela wok. Ol i bihainim tok bilong Baibel i tok: “Yupela i mas i stap strong, na i no ken surik liklik. Hatwok yupela i save mekim long Bikpela, em bai i no lus nating. . . . oltaim yupela i mas wok strong long wok bilong Bikpela.”—1 Ko. 15:58.
Stori Gen Long Ol Dispela Tok
● Taim Jisas i tok yumi mas painim Kingdom pastaim, em i makim wanem ol samting i mas i stap namba tu?
● Yumi mas ting olsem wanem long wok bilong lukautim yumi yet na famili bilong yumi long ol samting bilong skin? God bai helpim yumi olsem wanem?
● Sapos yumi mekim liklik hap wok tasol bilong Kingdom, ating em inap o olsem wanem? Bilong wanem yu bekim tok olsem?
[Askim Bilong Stadi]
1. (a) Bilong wanem 1,900 yia bipo Jisas i tok ol disaipel i mas painim Kingdom pastaim? (b) Yumi mas givim wanem askim long yumi yet?
2. Ol manmeri i save wok strong long kisim wanem ol samting?
3. (a) Jisas i kirapim ol disaipel bilong em long bungim wanem samting? Bilong wanem ol i mas mekim olsem? (b) Bilong wanem ol i no ken tingting planti long painim kaikai na klos samting?
4. Sapos man i tingim tumas ol samting bilong skin, ating wanem samting bai kamap? Stori long dispela.
5. (a) Pol i tokim Timoti, em i mas tingim wanem ol samting em inap long em? Bilong wanem Pol i tok olsem? (b) Olsem wanem Seten i mekim wok long pasin bilong “laikim tumas mani” na bagarapim bilip bilong man?
6. (a) Sapos yumi no laik pundaun long dispela traim, yumi mas mekim wanem? (b) Tasol long nau pe bilong ol samting i go antap na planti man i no gat wok, orait yu ting bilip inap helpim yumi?
7. Taim Jisas i salim ol aposel i go autim tok long Isrel, em i givim wanem tok long ol? Olsem wanem na dispela tok i stret?
8. (a) Klostu long taim em i dai, bilong wanem em i givim narapela kain tok long ol? (b) Tasol ol i mas tingim yet wanem samting pastaim?
9. (a) Pol i mekim wanem na em i tingim Kingdom pastaim? (b) Em i kisim kaikai samting olsem wanem? (c) Em i givim wanem tok long ol narapela long dispela samting?
10. (a) Wanem insait bilong dispela tok ‘tingim Kingdom pastaim’? (b) Tasol yumi no ken lusim wanem ol wok?
11. (a) Jisas i mekim wanem tok piksa long sampela inap mekim bikpela wok bilong Kingdom na sampela inap mekim liklik wok tasol? (b) I gat wanem ol samting inap pasim man long mekim bikpela wok?
12. Ol yangpela i ken tingting long mekim wanem gutpela wok?
13. (a) Husat i mas makim ol wok yu yet yu inap mekim long autim tok? (b) Sapos yumi wok tru long painim Kingdom pastaim, dispela i kamapim ples klia wanem samting?
14. (a) Bilong wanem i gutpela sapos yu makim taim bilong autim tok? (b) Planti Witnes ol i mekim wanem bikpela wok bilong autim tok? Bilong wanem ol i mekim?
15. Taim yu tingim wok bilong yumi long autim tok, bilong wanem yu ting tok bilong 1 Korin 15:58 i stret long nau?