Sapta 23
“Yupela i Mas Sanap Strong”
OL MANMERI i bilip long Jehova ol i stap amamas tru, winim olgeta narapela manmeri long nau. Ol i save Baibel tasol i gat ol gutpela tok bilong helpim ol long karim ol hevi. Ol i no pret long tingim ol samting bai kamap bihain, long wanem ol i save long ol samting God i laik mekim long dispela graun. (Jeremaia 17:7, 8; Sam 46:1, 2) Tasol, aposel Pol i tokim ol Kristen: “Yupela i mas sanap strong, olsem na yupela i ken bihainim tok bilong God. Na yupela i ken kisim gutpela samting, bipo God i tok long givim yupela.” (Hibru 10:36) Wanem samting i mekim na yumi mas sanap strong?
2 Klostu long taim Jisas i dai, Jisas i toksave long ol aposel long ol samting bai painim ol long bihain. Em i tok: “Sapos tru yupela i man bilong dispela graun, orait bai ol manmeri bilong graun ol inap laikim yupela olsem lain bilong ol yet. Tasol yupela i no man bilong dispela graun. Nogat. Mi makim yupela pinis bai yupela lusim pasin bilong dispela graun. Olsem na ol manmeri bilong graun ol i birua long yupela. Yupela i mas tingim gut dispela tok mi mekim long yupela: Wokboi em i no antap long bikpela man bilong en. Ol i bin ranim mi, olsem na bai ol i ranim yupela tu. Sapos ol i bin bihainim tok bilong mi, orait bai ol i bihainim tok bilong yupela tu. Tasol ol i no save long Papa, em i bin salim mi na mi kam. Olsem na bambai ol i ting long nem bilong mi na bai ol i mekim dispela olgeta pasin long yupela.” (Jon 15:19-21) Tru tumas, ol samting i bin kamap olsem Jisas i tok!
3 Ol man i bihainim Jisas ol i save kisim planti hevi long dispela graun, long wanem ol i stap namel long ol manmeri i sakim lotu Kristen tru. Insait bilong dispela tok Krais i olsem “Man God i Makim.” Jehova i makim Krais Jisas bilong i stap King na bosim olgeta hap bilong graun. Olsem na taim Jisas i tok, ol man bai ‘ting long nem bilong em’ na mekim nogut long ol disaipel bilong em, em i laik tok olsem ol bai kisim dispela hevi, long wanem ol i bilip long Jisas em i dispela King Jehova i makim, na ol i tingim tok bilong ol hetman bilong graun i nambatu tasol, na ol i stap gut long Kingdom bilong em na ol i no insait long ol wok politik samting bilong ol gavman bilong dispela graun. Na Jisas i tok, ol man bai mekim nogut long lain bilong em, long wanem “ol i no save long Papa, em i bin salim mi na mi kam”—ol i no laik daun long God Jehova em i King bilong heven na graun. (Skelim wantaim Eksodas 5:2.) Husat tru i kirapim ol man long mekim nogut long ol disaipel bilong Krais? Em Seten tasol.—Revelesen 2:10.
4 Jehova i kamapim Kingdom bilong em long heven long yia 1914 na putim Krais i stap King, na Krais i rausim Seten long heven. Orait, kirap long dispela taim bikpela hevi moa i painim ol Kristen tru. Em bikpela hevi moa yet, long wanem Seten wantaim ol spirit nogut i strong olgeta long mekim pait long olgeta manmeri ol i givim bel long Kingdom bilong God na Krais. Revelesen 12:17 i stori long dispela samting, olsem: “Na dispela bikpela snek [em Seten] em i belhat long dispela meri [em oganaisesen bilong God long heven i olsem meri bilong em], na em i go na i laik kirapim pait wantaim ol arapela pikinini bilong en [em hap lain bilong Krais long graun, em spirit holi i bin makim ol]. Em ol dispela manmeri i save bihainim olgeta lo bilong God, na ol i autim tok bilong Jisas.” Seten i mekim pait long ol “arapela sipsip” tu. Long kain kain pasin giaman Seten i wok long pulim o subim ol bambai ol i lusim ol lo bilong God na ol i no bihainim moa. Em i laik mekim na bai ol i no strong moa long spirit na bai em i bagarapim ol olgeta long spirit. Em i laik pasim wok bilong ol long tokaut olsem Jisas em dispela King Jehova i bin makim. Tasol ol gutpela wokboi bilong God ol i winim dispela pait bilong spirit.
OL KRISTEN I MAS MEKIM WANEM?
5 Planti bikman bilong gavman i save ol Witnes Bilong Jehova ol i man bilong bihainim lo na ol i wok long helpim ol narapela man long bihainim gutpela pasin. Tasol, olgeta gavman bilong graun ol i bilong dispela graun em Seten i bosim. (1 Jon 5:19; Revelesen 13:2) Olsem na yumi no ken kirap nogut taim sampela gavman i tambuim miting bilong ol man i lotuim God tru, na ol i tambuim ol buk na nius bilong Baibel ol i wokim, na ol i tambuim ol long autim tok bilong Kingdom bilong God; na ol i kalabusim ol tu na paitim ol. Sapos kain hevi olsem i painim yu, orait bai yu mekim wanem?
6 Ol aposel bilong Krais Jisas long bipo ol i save daun long ol bikman bilong gavman. Taim ol i mekim nogut long ol aposel, ol aposel i no bekim nogut long ol. Tasol taim ol i tambuim ol aposel long mekim wok God i bin givim long ol, ol i strong na ol i tok: “Mipela i mas bihainim tok bilong God tasol. Mipela no ken bihainim tok bilong ol man.” (Aposel 5:29; Rom 12:19; 1 Pita 3:15) Maski ol i tok long kilim i dai ol aposel, tasol ol aposel i no surik. Ol i save ol i mekim wok bilong dispela God “em i save kirapim bek ol daiman.” (2 Korin 1:9; Hibru 2:14, 15) Maski ol man i mekim nogut long ol, tasol ol i amamas, long wanem ol i save God i orait long ol, na ol i amamas long ol inap insait long wok bilong stretim bek nem bilong em, na kamapim long ples klia olsem ol i stap gut long dispela King God i bin makim. (Aposel 5:41, 42; Matyu 5:11, 12) Yu save mekim olsem? Yu kamapim long ples klia olsem yu insait long dispela lain ol i karim ol kain hevi olsem? Ebedmelek i no bin pret na surik. Nogat. Ebedmelek em i husat?
7 Ebedmelek em i wanpela Itiopia em i bilip long God na em i stap long Jerusalem paslain liklik long taim ol Babilon i bagarapim dispela taun. Em i wanpela wokboi bilong King Sedekaia. Long dispela taim bipo Jeremaia i mekim wok olsem profet bilong Jehova na em i givim tok bilong Jehova long lain Juda na long ol narapela lain i stap klostu. Em i no surik liklik long givim strongpela tok bilong God long ol. Olsem na ol i mekim nogut tru long em. Sampela hetman long Jerusalem i kirapim ol man na ol i holim Jeremaia na tromoi em insait long wanpela hulwara i drai pinis na em i go daun insait long graun malumalum. Ol i lusim em i stap bai em i dai. Ebedmelek i no bilong lain Isrel, tasol em i save Jeremaia em i profet bilong Jehova. Em i harim tok long ol samting ol i mekim long Jeremaia na kwiktaim em i go lukim king bilong askim em long helpim Jeremaia. Orait, king i tok na kwiktaim Ebedmelek i kisim 30 man na sampela strongpela rop na pipia laplap. Em i tokim Jeremaia long putim laplap aninit long sangana bilong han bilong em na bai ol rop i no ken skrapim skin bilong em, na ol i pulim em i kam antap.—Jeremaia 38:4-13.
8 Tru Ebedmelek i tingting planti long ol samting ol hetman inap mekim long em long wanem em i paulim samting nogut ol i laik mekim long Jeremaia, tasol em i givim bel long profet bilong Jehova na em i bilip long God na dispela i daunim pret bilong em. Olsem na Jehova i tokim Ebedmelek long maus bilong Jeremaia, olsem: “Mi tok pinis, mi no ken mekim gut long dispela taun, mi bai bagarapim, na nau bai mi truim dispela tok bilong mi, na long dispela taim bai yu lukim ol dispela samting i kamap. Na Jehova i tok, ‘Long dispela taim bai mi lukautim yu na yu no ken bagarap; ol i no ken putim yu long han bilong ol man yu save pret long ol. Long wanem mi bai wokim rot bilong yu ranawe, na bainat i no ken kilim yu i dai; na bai yu kisim laip bilong yu olsem prais, long wanem yu bin bilip long mi.’ Em Jehova i tok olsem.”—Jeremaia 39:16-18, NW.
9 Dispela tok promis i gutpela samting tru long ol wokboi bilong Jehova long nau! Olsem Ebedmelek, ol “arapela sipsip” i lukim pasin nogut ol man bilong graun i mekim long dispela lain bilong nau ol i olsem Jeremaia, em hap lain bilong Kingdom ol i stap yet long graun; na ol i lukim ol man i strong long pasim wok bilong dispela lain long autim tok bilong Jehova. Ol “arapela sipsip” i no surik long mekim wanem wanem samting ol inap mekim bilong lukautim na helpim dispela hap lain bilong Kingdom. Olsem na i stret tok promis Jehova i givim long Ebedmelek i strongim ol, na ol i bilip strong olsem Jehova i no ken larim ol birua i bagarapim ol—bai em i lukautim ol na taim ol manmeri bilong dispela graun i bagarap, ol yet bai abrusim bagarap na i stap long stretpela “nupela graun.”
10 Ol manmeri i bihainim Krais Jisas, i no olgeta i kisim kalabus, tasol olgeta i kisim sampela hevi long han bilong ol man i mekim nogut long ol. (2 Timoti 3:12) Planti tausen man marit na meri marit bilong lain Kristen ol i bin sanap strong, na inap planti yia ol i bin karim bikpela hevi long han bilong ol wanhaus bilong ol. Na sampela pikinini tu ol i gat laik long mekim wok bilong Jehova, olsem na papamama i bin rausim ol. (Matyu 10:36-38) Na long skul tu sampela yangpela Kristen i karim hevi; na ol Witnes i bikpela pinis, ol i save kisim hevi long ol man long ples wok bilong ol. Sampela hevi i save painim olgeta Witnes Bilong Jehova taim ol i autim tok bilong Kingdom bilong God. Tok bilong Jisas i stret long olgeta dispela manmeri, em i tok: “Yupela i stap strong, na bai yupela i kisim bek laip bilong yupela.”—Luk 21:19.
11 Na ol narapela hevi i save painim ol Witnes na i traim bel bilong ol. Bikpela sik i save painim sampela na ol i no i stap amamas moa. Na sampela i gat hevi long mani na ol i sot long kaikai samting. Na ating sampela taim sampela gutpela poroman bilong ol i mekim sampela tok i sutim bel bilong ol na i no stret, na ol i bel hevi long dispela. Seten i bin mekim wok long olgeta dispela kain samting bilong pundaunim Jop. Orait, sapos kain hevi olsem i painim yumi, bai yumi mekim wanem?—Jems 5:11.
12 Na taim yumi autim tok bilong Jehova, olsem wanem sapos i no gat planti man i laik harim? Long dispela taim tu yumi mas i stap strong na karim dispela hevi. Yumi mas tingim Noa, inap planti planti yia em i bin autim tok na lain bilong em tasol ol i harim—em meri bilong em na tripela pikinini man wantaim meri bilong ol—na ol i wok wantaim em long mekim wok bilong Jehova. Olgeta narapela man ‘ol i no tingim.’ (Matyu 24:39) Na long nau tu planti man ‘ol i no tingim.’ Tasol long sampela hap, bipo ol man i no laik harim tok bilong Kingdom, tasol nau planti tru ol i kirap lotuim God Jehova. Ol manmeri, inap planti yia ol i bin sanap strong maski ol man i no laik harim tok o ol i bin mekim nogut long ol, ol i ken amamas, long wanem nau ol i lukim planti manmeri moa yet i kam insait long lain bilong Jehova!
‘MAN I SAVE SANAP STRONG EM I KEN AMAMAS’
13 Sapos yumi laik kisim laip na i stap gutpela tru long “nupela graun,” orait yumi mas tingim gut bikpela askim olgeta man na olgeta ensel i mas tingim, em olsem: Husat i mas i stap bos bilong heven na graun? Yumi bilip tru olsem Jehova i mas i stap bos? Yumi save i gat tupela lain tasol, na yumi no ken i stap namel tasol? Sapos yumi no laik bagarap long dispela pait Seten i mekim long yumi, orait yumi mas save long dispela tupela rot bilong Seten long pundaunim yumi, olsem em i kirapim ol man long mekim nogut long yumi o em i putim planti samting long ai bilong yumi bilong pulim yumi. Long dispela tupela rot Seten i laik pundaunim yumi bambai yumi no bihainim moa tok bilong God, na yumi lusim bikpela wok bilong autim tok bilong Kingdom bilong God na Krais.—1 Pita 5:8, 9; Mak 4:17-19.
14 Na yumi mas kisim pasin bilong bilip strong long Jehova. Sapos long strong bilong yumi yet yumi laik abrusim ol samting Seten i putim bilong pundaunim yumi, yumi longlong! Tasol sapos yumi bilip tru na givim bel olgeta long Jehova, orait taim hevi na traim i painim yumi, bai yumi no lusim em—bai yumi laik i stap klostu moa long em. (Efesas 6:10, 11; Provep 3:5, 6) Jehova i no subim yumi long bihainim wanpela rot. Sapos yumi no laik bihainim dispela rot, orait em i no ken bringim yumi i go. Tasol sapos yumi laik painim rot na yumi go long Baibel, na yumi beten long Em bilong givim strong long yumi, na yumi stap klostu long oganaisesen bilong em, orait bai em i soim rot long yumi. Na long olgeta taim bai em i mekim ol samting bilong kamapim long ples klia bikpela sori bilong em i no save tekewe long yumi, na dispela bai strongim yumi.—Rom 8:38, 39.
15 Ol hevi i painim yumi na ol samting i laik pulim yumi, dispela bai traim bel bilong yumi. Yumi givim bel tru long husat? Seten i tok, yumi olgeta yumi save tingim skin bilong yumi yet tasol. Planti man i save mekim olsem. Tasol Krais Jisas i narapela kain. Yu tu yu stap narapela kain? Yu lain pinis long tingim wok bilong litimapim nem bilong Jehova i nambawan bikpela samting? Sapos olsem, orait bai yu no pret na tingting long abrusim ol hevi i traim bilip bilong yu. Nogat. Bai yu sanap strong na karim ol dispela hevi; bai yu beten askim Jehova long givim gutpela tingting long yu bambai yu ken mekim ol samting bilong litimapim nem bilong Jehova long rot bilong ol dispela hevi na traim. Samting i kamap na i traim bilip bilong yu, em i save kamapim pasin bilong sanap strong na karim hevi; sapos yu sanap strong long wanem yu laikim tumas Jehova, orait bai em i amamas long yu. “Man i save sanap strong na i karim hevi long olgeta traim, em i ken amamas. Sapos em i winim pinis olgeta traim, orait bai God i givim laip long em, olsem prais. God i tok pinis long givim dispela prais long olgeta man i save laikim em tru.”—Jems 1:2-4, 12; Rom 5:3, 4.
16 Sapos yumi kirap mekim wok bilong Jehova o yumi sanap strong long wok bilong em inap liklik taim tasol, dispela i no inap. Yumi insait long wanpela resis na ol man i ran strong i go inap long pinis bilong resis, ol tasol bai kisim prais. Olgeta man i lukluk strong long prais na ol i ran strong yet long dispela resis taim olpela pasin bilong dispela graun i pinis, orait ol i ken amamas. Gutpela samting tru i wetim ol!—Hibru 12:1-3; Matyu 24:13.
[Askim Bilong Stadi]
1. (a) Bilong wanem ol Witnes Bilong Jehova i stap amamas tru? (b) Tasol yumi olgeta i mas bihainim wanem tok i stap long Hibru 10:36?
2. Bilong wanem ol disaipel bilong Jisas i mas sanap strong?
3. (a) Olsem wanem ol disaipel bilong Jisas i kisim hevi ‘long nem bilong em’? (b) Ol man i biruaim ol Kristen, olsem wanem “ol i no save” long dispela Man em i bin salim Jisas i kam? (c) Husat tru i kirapim ol man long mekim nogut long ol disaipel bilong Krais?
4. (a) Ol samting i kamap olsem Revelesen 12:17 i tok long en na dispela i mekim wanem long yumi? (b) Seten i laik mekim wanem?
5. Sampela gavman ol i bin mekim wanem long ol Witnes Bilong Jehova?
6. (a) Yumi mas ting olsem wanem long ol bikman bilong gavman? (b) Tasol yumi tingting strong long mekim wanem? (c) Maski ol i mekim nogut long yumi, tasol olsem wanem yumi ken i stap amamas yet?
7. (a) Ebedmelek em i husat? Bilong wanem yumi ol man bilong nau i mas save long stori bilong Ebedmelek? (b) Taim Ebedmelek i harim tok olsem ol i bin tromoi Jeremaia i go daun long hulwara, Ebedmelek i mekim wanem? Bilong wanem em i mekim olsem?
8. Jehova i givim wanem gutpela tok promis long Ebedmelek? Bilong wanem Jehova i tok promis olsem long em?
9. (a) Olsem wanem ol “arapela sipsip” i kain olsem Ebedmelek? (b) Orait, tok promis Jehova i bin givim long Ebedmelek i helpim ol “arapela sipsip” olsem wanem long nau?
10. Hevi i save painim ol Kristen long wanem ol taim?
11. (a) Wanem sampela hevi moa i save traim bel bilong planti Witnes? (b) Ol dispela kain hevi i bin painim husat tu long bipo? Bilong wanem Seten i givim ol dispela hevi long em?
12. (a) Bilong wanem Noa i mas i stap strong long wok bilong em long autim tok? (b) Olsem wanem i wankain long nau?
13. (a) Yumi mas tingim wanem samting na yumi ken sanap strong? (b) Yumi mas save long wanem pasin bilong Seten long pundaunim man?
14. (a) Yumi mas kisim wanem pasin? Yumi mas bilip tru long husat? (b) Em bai helpim yumi olsem wanem?
15. (a) Yumi mas givim bel tru long husat? (b) Yumi mas ting olsem wanem long ol samting i save kamap na i traim bilip bilong yumi?
16. Yumi mas ran strong bilong kamap long wanem mak?