Sapta 24
Tok i Swit na i Pait
Driman 6—Kamapim Tok Hait 10:1–11:19
Stori: Driman long liklik buk; ol samting bilong haus bilong God; namba 7 biugel i krai
Taim bilong truim: Kirap long taim Jisas i kamap King long 1914 na i go inap long taim bilong bikpela hevi tru
1, 2. (a) Namba 2 bikpela hevi i bin mekim wanem? Namba 2 bikpela hevi bai pinis long wanem taim? (b) Nau Jon i lukim husat i lusim heven na i kam daun?
NAMBA 2 bikpela hevi i nogut tru. Em i bin putim hevi long ol lotu i gat nem Kristen na long ol bos bilong ol, em “wanpela lain” bilong dispela “tripela lain,” na hevi i kamapim klia olsem ol i dai pinis long ol samting bilong spirit. (KTH 9:15) Taim Jon i lukim namba 2 bikpela hevi ating em i bin tingting planti long namba 3 bikpela hevi bai kamapim wanem kain samting. Tasol wet pastaim! Namba 2 bikpela hevi i no pinis yet—yumi mas go moa inap long Kamapim Tok Hait 11:14. Pastaim Jon i mas lukim sampela ol samting em yet i gat wok insait long en. Em i lukim dispela bikpela samting na i tok:
2 “Orait mi lukim narapela strongpela ensel i kam daun long heven. Em i karamapim skin bilong en long klaut, na wanpela renbo i stap antap long het bilong en. Pes bilong en i lait olsem san, na tupela lek bilong en i . . . olsem paia.”—KTH 10:1.
3. (a) “Strongpela ensel” em husat? (b) Olsem wanem long renbo i stap antap long het bilong em?
3 Husat dispela “strongpela ensel”? Em i bikpela Krais Jisas tasol, na nau em i mekim narapela wok. Dispela klaut i karamapim em i makim olsem ol man i no inap lukim em. Yumi tingim narapela tok bilong Jon i toktok long Jisas na i tok: “Lukim. Em i stap namel long ol klaut na i kam, na olgeta man bai i lukim em long ai bilong ol yet. Olgeta man i bin sutim em long spia samting, ol tu bai i lukim em.” (KTH 1:7; skelim wantaim Matyu 17:2-5.) Renbo i stap antap long het bilong em, na dispela i kirapim yumi long tingim narapela driman bipo Jon i lukim, em renbo i raunim sia king bilong Jehova na “dispela renbo i lait olsem grinpela ston emeral.” (KTH 4:3; skelim wantaim Esekiel 1:28.) Dispela renbo i makim bel isi i raunim sia king bilong God. Orait, dispela renbo i stap antap long het bilong ensel hia i makim ensel em i man bilong bringim bel isi i kam, em dispela “King bilong kamapim gutpela sindaun na bel isi.”—Aisaia 9:6, 7.
4. Wanem insait bilong dispela tok olsem (a) pes bilong strongpela ensel “i lait olsem san”? na (b) lek bilong em i “olsem paia”?
4 Na pes bilong dispela strongpela ensel “i lait olsem san.” Long narapela driman bipo em Jon i lukim Jisas i stap long haus bilong God “na pes bilong en i lait tumas, olsem san i lait strong moa.” (KTH 1:16) Jisas em i dispela man i gat bikpela strong “olsem lait bilong san na em bai i mekim gut long [ol man] olsem san i save hatim skin bilong ol manmeri,” na dispela bai helpim ol man i save daun long nem bilong Jehova. (Malakai 4:2) Na i no pes tasol bilong ensel i lait. “Tupela lek bilong en i . . . olsem paia.” Em i sanap strong na dispela i makim olsem em i dispela Man Jehova “i givim . . . bikpela namba na strong bilong bosim olgeta samting long heven na long graun.”—Matyu 28:18; KTH 1:14, 15.
5. Jon i lukim wanem samting i stap long han bilong strongpela ensel?
5 Jon i stori moa na i tok: “Dispela ensel i holim wanpela liklik buk long han bilong en, na buk i op i stap. Em i putim lek i stap long han sut bilong en antap long solwara, na narapela lek em i putim antap long graun.” (KTH 10:2) Em narapela buk, a? Em tasol. Tasol dispela buk i no gat gris kandel i pasim. Yumi wantaim Jon i laik lukim sampela gutpela samting moa bai kamap, tasol pastaim yumi mas save long as bilong ol dispela samting i laik kamap.
6. (a) Lek bilong Jisas i stap long graun na solwara, na dispela i makim wanem samting? (b) Truim bilong Song 8:5-8 i bin kamap long wanem taim?
6 Yumi tingim gen Jisas. Lek bilong em i olsem paia na i stap long graun na long solwara, na dispela i makim olsem nau em i bosim ol dispela hap. Em i olsem tok profet bilong Song i tok: “Yu [Jehova] bin wokim [Jisas] na yu putim [em] i stap aninit long yu wanpela tasol. Yu bin litimapim [em] na givim [em] biknem na namba. Yu bin makim [em] bilong bosim olgeta samting yu bin wokim. Yu putim olgeta samting i stap aninit long [em]. Yes, olgeta sipsip na bulmakau na olgeta abus i stap long bus, na olgeta pisin i flai antap, na olgeta pis bilong solwara, na olgeta samting i save raun insait long solwara, olgeta i stap aninit long [em].” (Song 8:5-8; lukim tu Hibru 2:5-9.) Truim bilong dispela tok i bin kamap long 1914 taim Jisas i kamap King bilong Kingdom bilong God, na taim bilong pinis i kirap. Olsem na dispela driman hia bilong Jon em i makim ol samting i bin kamap bihain long 1914.—Song 110:1-6; Aposel 2:34-36; Daniel 12:4.
Sevenpela Klaut i Pairap
7. Strongpela ensel i singaut olsem wanem? Taim ensel i singaut strong, dispela i makim wanem samting?
7 Taim Jon i wok long tingim dispela strongpela ensel, em ensel yet i kirap toktok: “Na em [ensel] i singaut strong tru, olsem laion i singaut bikmaus. Em i singaut pinis, orait ol 7-pela klaut i pairap na ol i mekim toktok bilong ol.” (KTH 10:3) Ensel i singaut strong na bai Jon i ken harim, na dispela i makim Jisas em i “dispela Laion i bin kamap long lain Juda.” (KTH 5:5) Na Jon bai tingim Jehova tu, sampela taim em i save “singaut strong.” Em i singaut strong na dispela i makim wanpela wok i kirap bilong bungim lain Israel bilong spirit na bilong makim “De bilong [Jehova]” bai kam, em taim bilong bikpela bagarap bai kamap. (Hosea 11:10; Joel 3:14, 16; Amos 1:2; 3:7, 8) Olsem na taim dispela strongpela ensel i singaut strong olsem laion, dispela i makim ol bikpela samting i laik kamap long solwara na graun, na em i singautim 7-pela klaut long pairap na mekim tok.
8. Dispela nek bilong 7-pela klaut em i wanem samting?
8 Bipo Jon i bin harim klaut i pairap long sia king bilong Jehova. (KTH 4:5) Na long taim bilong Devit, sapos klaut i pairap ol i save tok, em nek bilong Jehova. (Song 29:3) Taim Jisas i bin stap long graun na autim tok, Jehova i tokaut long em bai litimapim nem bilong em, na planti man i harim na ol i ting klaut i pairap. (Jon 12:28, 29) Olsem na i stret yumi ken tok, dispela toktok bilong 7-pela klaut em i olsem toktok o nek bilong Jehova yet taim em i kolim ol samting em i laik mekim. Jon i tok i gat 7-pela klaut, na dispela i makim olsem Jon i harim olgeta tok long dispela samting.
9. Wanpela maus long heven i tok wanem?
9 Tasol harim! Narapela maus i toktok. Em i mekim tok na ating Jon i no klia long en: “Dispela 7-pela klaut i pairap pinis, orait mi laik raitim toktok ol i bin mekim. Tasol mi harim maus bilong wanpela man i singaut long heven olsem: ‘Dispela tok bilong ol 7-pela klaut i pairap, em yu mas pasim i stap long tingting bilong yu. Yu no ken raitim.’ ” (KTH 10:4) Jon i laik harim na raitim ol tok bilong klaut, na lain em Jon i piksa bilong ol long nau ol tu i laik harim ol samting Jehova bai mekim na bai ol i ken raitim long ol buk na nius. Tasol ol i mas wetim taim Jehova yet i makim bilong kamapim kain tok olsem.—Luk 12:42; lukim tu Daniel 12:8, 9.
Tok Hait i Pinis
10. Strongpela ensel i tok tru antap long husat? Em i tok wanem?
10 Na Jehova i gat narapela wok bilong Jon. Taim 7-pela klaut i toktok pinis, strongpela ensel i toktok gen: “Orait dispela ensel mi bin lukim em i sanap long solwara na long graun, em i litimapim han sut bilong en i go long heven, na em i tok tru antap long nem bilong God i stap laip oltaim oltaim. Em God i bin wokim heven wantaim olgeta samting i stap long en, na graun wantaim olgeta samting i stap long en, na solwara tu wantaim olgeta samting i stap long en. Na ensel i tok olsem: ‘Taim i laik pinis nau. God bai i no inap wet moa. Nogat.’ ” (KTH 10:5, 6) Strongpela ensel, em Jisas, em i tok tru antap long husat? Long Jehova tasol, em Nambawan Bikpela i gat olgeta save, em dispela God i no save dai na em i bin wokim heven na graun. (Aisaia 45:12, 18) Ensel i mekim dispela tok tru antap na bai Jon i ken save, God i no ken wet moa long mekim ol samting em i tok pinis long mekim.
11, 12. (a) Wanem insait bilong dispela tok “i no inap wet moa”? (b) Jehova bai kamapim long ples klia na inapim tru wanem samting?
11 Dispela tok “wet,” long tok Grik ol i kolim khroʹnos, na insait bilong en i olsem “taim.” Sampela man i tanim dispela tok bilong ensel olsem: “I no gat taim moa.” Tasol dispela tok khroʹnos i olsem “wanpela hap taim.” I olsem Jehova i no ken lusim hap taim moa. Long Hibru 10:37 Pol i kolim tok bilong Habakuk 2:3, 4 na em i tok: “Liklik taim tasol, na dispela man i laik kam, em bai . . . i kam kwik.”
12 Lain em Jon i piksa bilong ol, long nau ol i amamas tru long dispela tok: “God bai i no inap wet moa. Nogat.” Olsem wanem na em i no inap wet moa? Jon i tokim yumi: “Taim namba 7 ensel i winim biugel, na krai bilong en i kamap, orait dispela samting God i laik mekim na tok bilong en i bin hait i stap, em bai God i mekim i kamap tru. Em dispela gutnius bipo em i bin givim long ol profet, em ol wokman bilong en.” (KTH 10:7) Nau em taim bilong Jehova long kamapim long ples klia olgeta samting bilong dispela tok hait na inapim tru; em gutpela samting tru!
13. Wanem dispela tok hait bilong God?
13 Wanem dispela tok hait? Em ol tok bilong dispela pikinini, olsem “lain,” bipo long Iden God i bin tok promis long kamapim, em Krais Jisas i namba wan long en. (Stat 3:15; 1 Timoti 3:16) Na narapela samting bilong dispela tok hait, em dispela meri i bin karim dispela Pikinini. (Aisaia 54:1; Galesia 4:26-28) Ol narapela long lain pikinini bilong dispela meri, na Kingdom tu, ol i insait long dispela tok hait. Namba wan Pikinini long dispela lain bilong meri em i stap King long dispela Kingdom. (Luk 8:10; Efesus 3:3-9; Kolosi 1:26, 27; 2:2; KTH 1:5, 6) Ol i mas autim gutpela tok bilong dispela Kingdom long olgeta hap long taim bilong pinis.—Matyu 24:14.
14. Olsem wanem Kamapim Tok Hait 11:14, 15 i toktok long namba 3 bikpela hevi na long Kingdom bilong God wantaim?
14 Tok bilong Kingdom i winim olgeta narapela gutpela tok. Tasol Kamapim Tok Hait 11:14, 15 i toktok long namba 3 bikpela hevi na long Kingdom tu wantaim. Bilong wanem? Long wanem, sampela man i laikim pasin bilong dispela graun em Satan i bosim, na taim ol i harim ol samting bilong dispela gutpela tok hait bilong God i kamap pinis—olsem Kingdom bilong God i kamap pinis na Krais i stap King—taim ol i harim olsem, ol i pilim bikpela hevi. (Lukim 2 Korin 2:16.) Ol i laikim pasin bilong dispela graun, tasol liklik taim bai dispela i kisim bagarap, olsem na ol i gat hevi taim ol i harim tok bilong Kingdom. Nek bilong 7-pela klaut i wok long krai strong moa taim bikpela De bilong Jehova i wok long kam klostu, na long dispela De Jehova bai kamapim belhat bilong em.—Sefanaia 1:14-18.
Buk i Op i Stap
15. Dispela maus long heven na strongpela ensel i givim wanem tok long Jon? Wanem samting i painim Jon?
15 Taim Jon i wetim krai bilong namba 7 biugel na laspela tok bilong tok hait bilong God, Jon i kisim narapela wok: “Na maus bilong dispela man i kamap gen long heven, na i tokim mi olsem, ‘Yu go kisim dispela buk i op i stap long han bilong ensel i sanap long solwara na long graun.’ Orait mi go long ensel na mi tokim em, ‘Yu givim dispela liklik buk long mi.’ Na em i tokim mi olsem, ‘Yu kisim na yu kaikai. Em bai i pait long bel bilong yu. Tasol long maus bilong yu em bai i swit olsem hani.’ Em i tok pinis, na mi kisim dispela liklik buk long han bilong en, na mi kaikai. Na long maus bilong mi em i swit olsem hani. Tasol taim mi kaikai pinis, em i pait long bel bilong mi. Na ol i tokim mi olsem, ‘Yu mas autim tok profet gen long ol samting bai i kamap long planti lain manmeri bilong planti kantri na bilong planti tok ples, na long planti king tu.’ ”—KTH 10:8-11.
16. (a) Samting i bin painim Esekiel, olsem wanem em i wankain olsem samting i bin painim Jon? (b) Olsem wanem buk i swit long maus bilong Jon? Tasol olsem wanem buk i pait long bel bilong em?
16 Samting i painim Jon i wankain olsem samting i bin painim Esekiel taim em i stap kalabus long Babilon. Wanpela maus i bin tokim Esekiel em i mas kaikai wanpela buk, na buk bai swit long maus bilong em. Tasol taim em i daunim pinis, dispela i givim wok long em long autim strongpela tok long lain bikhetman bilong Israel. (Esekiel 2:8–3:15) Dispela buk Krais Jisas i givim long Jon, em tu i gat tok bilong God long en olsem buk em Esekiel i bin kisim. Jon i mas autim tok “long ol samting bai kamap long planti lain manmeri bilong planti kantri na bilong planti tok ples, na long planti king tu.” Tok bilong dispela buk i swit long maus bilong Jon, long wanem, i gat tok bilong God i stap long en. (Lukim Song 119:103; Jeremaia 15:15, 16.) Tasol buk i pait long bel bilong Jon, long wanem, buk i stori long ol samting nogut bai painim ol bikhetman. Bipo i olsem tasol long Esekiel.—Song 145:20.
17. (a) Husat i tokim Jon long autim “gen” tok? Dispela tok “gen” i makim olsem Jon i mas mekim wanem? (b) Ol samting Jon i lukim long driman i makim ol samting i kamap long wanem taim?
17 Yumi save, em God Jehova na Krais Jisas tasol i tokim Jon long autim tok gen. Jon i stap kalabus long ailan Patmos, na em i bin autim tok pinis long ol samting bai painim planti lain man bilong planti kantri na planti tok ples na planti king, olsem Kamapim Tok Hait sapta 1 i go inap sapta 10 i stori long en. Tasol Jon i mas mekim “gen”; i olsem em i mas raitim na kamapim ol narapela tok bilong Kamapim Tok Hait. Jon yet i insait long ol samting bilong driman. Ol samting em i driman long en i makim ol samting i mas kamap bihain long 1914, long taim strongpela ensel i sanap i stap antap long graun na solwara. Orait, lain em Jon i piksa bilong ol long nau ol i mas ting olsem wanem long ol dispela samting?
Liklik Buk Long Nau
18. Taim de bilong Bikpela i bin kirap, dispela lain em Jon i piksa bilong ol, ol i bin mekim wanem na ol i ken save long ol tok bilong Kamapim Tok Hait?
18 Ol samting Jon i bin lukim i makim ol samting i painim dispela lain em Jon i piksa bilong ol na ol i stap taim de bilong Bikpela i kirap. Long dispela taim ol i no bin save gut long ol samting Jehova i laik mekim na long 7-pela klaut tu. Tasol ol i gat bikpela laik long save long insait bilong ol tok bilong Kamapim Tok Hait, na taim Charles Taze Russell i stap em i bin stori long planti hap bilong en. Taim em i dai pinis long 1916 ol i putim ol dispela stori long wanpela buk (The Finished Mystery). Bihain ol i save dispela buk i no kamapim gut tok bilong Kamapim Tok Hait. Hap lain bilong ol brata bilong Krais i mas wet liklik moa, inap long truim bilong ol dispela driman i kamap na bai ol i ken kisim gut save long en.
19. (a) Taim dispela lain em Jon i piksa bilong ol ol i no kamapim yet ol buk i gat ol tok bilong 7-pela klaut, God Jehova i bin givim wanem wok long ol? (b) Wanem taim ol i bin kisim dispela liklik buk i op i stap? Taim ol i kisim, ol i mas mekim wanem?
19 Taim ol i no kamapim yet ol save bilong 7-pela klaut, Jehova i bin givim wok long ol. Ol i kirap long wok strong long autim tok 40 yia paslain long 1914, na ol i mekim yet long taim bilong Namba Wan Pait, maski i hatwok. Na taim Bikman i bin kam em i lukim ol i givim kaikai long ol narapela wokboi long taim stret. (Matyu 24:45-47) Olsem na long 1919 ol yet i kisim dispela liklik buk i op—em i olsem tok ol i mas autim long ol man. Ol i mas givim tok long wanpela lain i no stap gut long God—em ol lotu i gat nem Kristen na ol i tok ol i mekim wok bilong God, tasol ol i no mekim. Na olsem Jon i bin mekim, ol i mas autim tok moa “long ol samting bai i kamap long planti lain manmeri bilong planti kantri na bilong planti tok ples, na long planti king tu.”
20. Taim Jon i kaikai buk, dispela i makim wanem samting?
20 Jon i kaikai buk, na dispela i makim olsem ol brata bilong Jisas i orait long mekim dispela wok bilong autim ol strongpela tok bilong Jehova. Ol i strong long mekim dispela wok, olsem na ol man i save ol dispela brata i man bilong autim ol tok bilong Kamapim Tok Hait. Na dispela hap bilong Baibel i olsem kaikai bilong ol tu, na i save strongim ol. Tasol dispela tok ol i mas autim i gat ol strongpela tok long kot bilong Jehova bai painim ol man, na stori bilong ol samting nogut tru olsem i stap long sapta 8 bilong Kamapim Tok Hait, na ol man i no laik harim; i olsem dispela tok i pait long maus bilong ol. Tasol ol gutpela Kristen i amamas long save long ol dispela strongpela tok bilong Jehova, na ol i amamas long save olsem Jehova i givim wok gen long ol long autim dispela tok long ol man, na dispela samting i swit long ol.—Song 19:9, 10.
21. (a) Olsem wanem dispela tok i swit long maus bilong ‘bikpela lain’? (b) Olsem wanem na dispela gutpela tok i nogut long yau bilong ol birua?
21 Bihain ol tok bilong liklik buk i swit tu long dispela “planti manmeri tru . . . bilong olgeta lain man na bilong olgeta kantri na bilong olgeta kain skin na bilong olgeta tok ples,” em ol i les long ol pasin nogut bilong ol lotu i gat nem Kristen. (KTH 7:9; Esekiel 9:4) Ol tu i wok strong long autim gutpela tok, na taim ol i stori long ol gutpela samting Jehova i mekim bilong helpim ol Kristen i gat pasin olsem bilong sipsip, ol i mekim long gutpela tok i swit long yau bilong ol dispela kain man. (Song 37:11, 29; Kolosi 4:6) Tasol ol birua ol i pilim dispela tok i nogut, long wanem, ol i insait long pasin bilong dispela graun, na ating ol i kisim amamas long ol samting bilong en, tasol Baibel i tok pasin bilong dispela graun bai pinis, olsem na ol dispela man i no laik harim dispela gutpela tok, long wanem, em i makim olsem ol bai kisim bagarap.—Filipai 1:27, 28; skelim wantaim Lo 28:15; 2 Korin 2:15, 16.
[Ol Piksa long pes 160]
Lain em Jon i piksa bilong ol, na ol poroman bilong ol, ol i autim long olgeta man dispela tok i swit na i pait tu