Ol Yia Ol Samting i Bin Kamap

Stori: Bilong makim ol yia ol samting i bin kamap, Baibel i kolim krismas bilong sampela man, na ol yia bilong wok king bilong sampela man, na kain bikpela samting olsem. Baibel tasol i makim ol yia ol samting i bin kamap, i go bek inap long pastaim tru, olsem long taim God i bin wokim Adam. Na sampela bikpela samting bilong kamapim laik bilong God, taim ol dispela samting i no kamap yet, Baibel i bin makim stret yia em bai kamap. Long nau ol man long planti hap i mekim wok long kalenda bilong Gregori; ol i bin kirap mekim wok long en long yia 1582. Ol buk bilong graun i makim narapela narapela yia bilong ol samting bilong bipo tru i bin kamap. Tasol i gat planti samting i makim klia olsem Babilon i bin bagarap long yia 539 paslain long Krais, olsem na ol Juda i bin lusim Babilon i go bek long ples long yia 537 paslain long Krais. (Esr 1:1-3) Sapos yumi laik kaunim ol yia na yumi kirap kaunim long kain yia olsem, orait long ol kalenda bilong nau yumi inap makim stret ol yia ol samting i bin kamap, em ol samting Baibel i stori long en.

Olsem wanem? Ol saveman bilong saiens i kamapim klia olsem ol man i bin i stap long graun inap planti milion yia, na i no sampela tausen yia tasol olsem Baibel i tok?

Pasin ol i bihainim bilong save long ol yia bilong ol samting, em gutpela, tasol planti taim ol i kisim narapela narapela tingting long en. Olsem na ol i save kolim ol yia bilong wanpela samting, na bihain gen ol i senisim tingting na kolim narapela.

Wanpela nius i stori long saveman Richard Leakey, em i bin kamapim tingting bilong em long wanpela stori (The Making of Mankind) long televisen long Inglan. Em i tokaut olsem, ol man i bin kamap long graun 15 inap 20 milion yia bipo. Tasol wanpela yia bihain, long ai bilong ol saveman i bung long Royal Institution, em i tokaut olsem tingting bilong planti saveman, olsem em i bin kamapim long televisen, ‘i kranki long sampela bikpela samting.’ Em i tok, nau em i ting ol man i bin kamap longtaim bipo, tasol i no planti milion milion yia bipo olsem em i bin tok long televisen.​—⁠Buk New Scientist bilong Mas 18, 1982, p. 695.

Wan wan taim ol saveman i painim pinis nupela rot bilong kisim save long ol yia bilong ol samting. Yumi ken bilip long dispela o nogat? Wanpela bikpela buk i stori long wanpela rot olsem (thermoluminescence) na buk i tok, ‘Ol i ting tasol olsem dispela rot bai helpim ol, tasol nogat.’ (The New Encyclopædia Britannica, 1976, Macropædia, Vol. 5, p. 509) Na wanpela nius i tok, ol i bin bihainim tupela rot bilong save sampela bun i bilong hamas yia bipo​—⁠wanpela rot (amino acid racemization) i makim olsem ol i bilong 70,000 yia bipo, tasol narapela rot (radioactive dating) i makim olsem ol i bilong 8,300 o 9,000 yia tasol long bipo.​—⁠Science, Ogas 28, 1981, p. 1003.

Narapela nius i tok, saveman Robert Gentry ‘i ting olgeta yia ol i makim long rot bilong wanpela pasin (radioactive decay) i kranki tru.’ Nius i tok, save dispela man i kisim inap givim tingting long yumi olsem “ol man i bin kamap long graun sampela tausen yia tasol long bipo, i no 3.6 milion yia bipo.”​—⁠Popular Science, Novemba 1979, p. 81.

Ol saveman i ting graun yet i bin kamap longtaim bipo, winim tru ol man. Na tok bilong Baibel i no pait long dispela.

Ol yia Baibel i kolim bilong ol man paslain long Bikpela Tait, dispela i wankain olsem yumi kolim “yia” long nau?

Sapos yumi ting wanpela “yia” bilong ol long bipo i olsem wanpela mun bilong yumi, bai i olsem Enos i bin kamapim pikinini taim em i gat 7-pela krismas, na Kenan i bin kamapim pikinini taim em i gat 5-pela krismas. (Stt 5:​9, 12) Tasol ol i no inap mekim olsem, a?

Ol de na mun Baibel i kolim long stori bilong Bikpela Tait inap givim save long yumi long mun bilong ol i gat hamas de, na yia bilong ol i gat hamas mun. Sapos yumi skelim Stat 7:​11, 24 na Ge 8:​3, 4, yumi ken save, 5-pela mun (de namba 17 bilong namba 2 mun i go inap long de namba 17 bilong namba 7 mun) em inap olsem 150 de, na ol dispela mun i gat 30 de 30 de. Baibel i stori long ol samting i bin kamap long namba 10 mun na long sampela hap taim bihain long dispela i go inap long nupela yia i kamap. (Stt 8:​5, 6, 8, 10, 12-14) Dispela i makim olsem ol yia bilong ol i gat 12-pela mun bilong 30 de 30 de. Ol i save tingim wokabaut bilong mun na wokim kalenda, na sampela taim ol i stretim bambai i stret wantaim yia bilong san, olsem na Baibel i makim de stret na mun stret bilong wokim bung bilong lotu long ol taim bilong bungim kaikai long gaden. Long dispela rot, long olgeta taim ol bikpela de bilong lotu i save kamap long taim stret bilong en.​—⁠Wkp 23:⁠39.

Tasol yu mas tingim: God i bin wokim ol man bilong i stap oltaim oltaim. Em sin bilong Adam i mekim na ol man i save dai. (Stt 2:17; 3:​17-19; Ro 5:12) Skin bilong ol lain paslain long Bikpela Tait i gutpela liklik, winim bilong yumi long nau, olsem na ol i stap planti yia moa. Tasol olgeta wan wan i dai taim em i no winim yet wan tausen yia.

Bilong wanem ol Witnes Bilong Jehova i tok, Kingdom bilong God i bin kamap long yia 1914?

I gat tupela samting i makim dispela yia: (1) Ol yia Baibel i kolim na (2) ol samting i bin kamap long graun bihain long 1914 na i truim ol tok profet. Nau yumi ken stori long ol yia Baibel i kolim. Bilong save long truim bilong ol tok profet, lukim het-tok “Taim Bilong Las De.”

Kaunim Daniel 4:​1-17. Da 4 Ves 20-37 i makim olsem truim bilong dispela tok profet i bin painim Nebukatnesar. Tasol i gat bikpela truim bilong en tu. Olsem wanem yumi ken save long dispela? Da 4 Ves 3 na 17 i kamapim klia olsem dispela driman God i bin givim long King Nebukatnesar i makim Kingdom bilong God na laik bilong Em long givim dispela Kingdom long ‘wanpela man nating em yet i makim.’ Olgeta tok bilong Baibel i makim olsem Jehova i laik putim Pikinini bilong em yet, Krais Jisas, i stap king bilong mekim wok olsem maus bilong Em na bosim ol man. (Sng 2:​1-8; Dan 7:​13, 14; 1 Ko 15:​23-25; KTH 11:15; 12:10) Baibel i stori long Jisas i daunim em yet na i stap olsem “man nating.” (Fl 2:​7, 8; Mt 11:​28-30) Olsem na dispela driman i makim taim bilong Jehova i putim Pikinini bilong em yet i stap king na bosim ol man.

Tasol wanem samting i mas kamap pastaim? Dispela diwai na as bilong en i makim wok gavman, olsem wok bilong bosim ol man. Ol bikpela gavman i gat “tingting olsem ol animal” ol i mas kamap na bosim ol man. (Dan 4:16) Bai ol gavman i mekim pasin olsem bilong ol wel animal. Long taim bilong yumi, bea i makim kantri Rasia; tarangau i makim Amerika; laion i makim Inglan; traipela snek i makim Saina. Baibel tu i save stori long ol wel animal bilong makim ol gavman, na bilong makim olgeta gavman wantaim em Satan i bosim ol. (Dan 7:​2-8, 17, 23; 8:​20-22; KTH 13:​1, 2) Jisas i tok profet long taim bilong las de, olsem: “Ol man bilong ol arapela lain bai i krungutim Jerusalem, inap long taim God i bin makim.” (Lu 21:24) “Jerusalem” i makim Kingdom bilong God, long wanem, Baibel i tok i olsem ol king bilong en i sindaun long “sia king bilong God.” (1 Sto 28:​4, 5; Mt 5:​34, 35) Olsem na ol gavman bilong ol narapela lain, em ol i olsem ol wel animal, ol bai “krungutim” wok bilong Kingdom bilong God long bosim ol man, na ol yet bai bosim graun aninit long strong bilong Satan.​—⁠Skelim wantaim Luk 4:​5, 6.

God bai larim ol dispela kain gavman i bosim graun inap hamas yia, na bai em i givim Kingdom long Krais Jisas? Daniel 4:16 i tok, inap “7-pela yia.” Tasol lo bilong Baibel i olsem: Long tok profet, wanpela de i makim wanpela yia. (Ese 4:6; Nam 14:34) Orait, i gat hamas de insait long “7-pela yia”? Kamapim Tok Hait 11:​2, 3 i tok, 42 mun, em 3 na hap yia, i olsem 1,260 de. Olsem na long 7-pela yia i gat 2,520 de. Na olsem yumi tok pinis, Baibel i makim wanpela de i olsem wanpela yia, olsem na dispela 2,520 de em 2,520 yia.

Wanem taim dispela “7-pela yia” i kirap? Taim ol Babilon i rausim pinis Sedekaia long wok king long Jerusalem, em i laspela king long dispela kingdom i olsem piksa bilong Kingdom bilong God. (Ese 21:​25-27) Long kirap bilong mun Oktoba long yia 607 B.C.E (paslain long Krais), wok king bilong ol Juda i pinis olgeta. Long dispela taim ol man i kilim pinis Gedalia, em ol Babilon i bin putim em bilong lukautim kantri Juda, na liklik lain Juda i stap yet long ples ol i ranawe pinis i go long Isip. (Jeremaia, sapta 40-43) Baibel i kolim stret ol yia na i makim olsem dispela i bin kamap 70 yia paslain long yia 537 B.C.E., em yia ol Juda i bin lusim Babilon na i go bek long Jerusalem. Olsem na wok king bilong ol Juda i pinis long kirap bilong mun Oktoba, long yia 607 B.C.E.​—⁠Jer 29:10; Dan 9:2.

Orait, olsem wanem yumi save, dispela hap taim i pinis long 1914? Em i kirap long namba wan wik bilong Oktoba, 607 B.C.E., olsem na 2,520 yia bihain long dispela, em namba wan wik bilong Oktoba, long yia 1914, olsem blok long pes 343 i makim.

Wanem samting i bin kamap long dispela taim? Jehova i givim wok bilong bosim ol man long Pikinini bilong em yet, Krais Jisas, em i kisim pinis biknem long heven.​—⁠Dan 7:​13, 14.

BILONG SAVE LONG DISPELA “7-PELA YIA”

“7-pela yia” = 7 X 360 = 2,520 yia

Wanpela “yia” long Baibel = 12 X 30 de = 360. (KTH 11:​2, 3; 12:​6, 14)

Long truim bilong dispela “7-pela yia,” wanpela de i makim wanpela yia. (Ese 4:6; Nam 14:34)

Kirap bilong mun Oktoba, 607 B.C.E., i go inap Disemba 31, 607 B.C.E. = 1/4 yia (3 mun)

Janueri 1, 606 B.C.E., i go inap Disemba 31, 1 B.C.E. = 606 yia

Janueri 1, 1 C.E., i go inap Disemba 31, 1913 = 1,913 yia

Janueri 1, 1914, i go inap long kirap bilong Oktoba, 1914 = 3/4 yia (9 mun)

Olgeta: 2,520 yia

Orait, bilong wanem pasin nogut i pulap yet long graun? Krais i kamap king pinis long heven na em i rausim Satan wantaim ol spirit nogut i kam daun long graun. (KTH 12:12) Krais i stap King, tasol em i no kirap wantu tasol na pinisim olgeta lain i no laik daun long wok king bilong Jehova na long em yet, em i Man bilong kisim bek ol. Olsem em i tok profet pinis, pastaim i gat wok bilong autim tok bilong Kingdom long olgeta hap bilong graun. (Mt 24:14) Em i stap King na em i bosim wok bilong tilim ol manmeri bilong olgeta lain​—⁠ol stretpela man bai kisim laip i stap oltaim, na ol man nogut bai pinis olgeta. (Mt 25:​31-46) Na ol hevi i olsem mak bilong “taim bilong las de” i mas i stap. Hap bilong “Taim Bilong Las De” i kamapim klia olsem ol dispela hevi i kirap long kamap long yia 1914. Ol manmeri i bin stap long 1914, sampela bai stap yet na bai olgeta narapela samting Jisas i bin tok profet long en i mas kamap, wantaim ‘taim bilong bikpela hevi tru,’ na bai pasin nogut bilong nau i pinis.​—⁠Mt 24:​21, 22, 34.

Wanem taim pasin nogut bilong nau bai pinis?

Jisas i tok: “I no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save.” Tasol em i tok tu: “Taim ol manmeri bilong dispela taim [taim mak bilong “taim bilong las de” i kirap long kamap] i no i dai yet, dispela olgeta samting bai i kamap.”​—⁠Mt 24:​36, 34.

Kamapim Tok Hait sapta 12 i stori long ol samting i kamap taim Kingdom bilong God na Krais i kamap pinis long heven long 1914, na bihain ves 12 i tok: “Bikpela hevi i laik kamap long [graun]. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”