Sapta 56

Wanem Samting i Save Mekim Man i Doti?

EM NAU planti man moa i bel nogut long Jisas. Planti disaipel i lusim em, na ol Juda long Judia i wok long painim rot bilong kilim em i dai, olsem ol i bin wok long mekim long Jerusalem long taim bilong Pasova long yia 31.

Nau em taim bilong Pasova bilong yia 32. Jisas i laik bihainim lo bilong God, olsem na em i go long Jerusalem long taim bilong Pasova. Tasol em i was gut, long wanem ol man i painim rot bilong kilim em i dai. Bihain em i go bek long Galili.

Ating Jisas i stap long Kaperneam na ol Farisi na saveman bilong lo i lusim Jerusalem na i kam long em. Ol i laik painim wanpela rong long em long lo bilong lotu na bai ol i ken kotim em. Ol i askim em: “Olsem wanem na ol disaipel bilong yu ol i save brukim lo ol tumbuna i bin givim long yumi? Taim ol i laik kaikai, ol i no save wasim han.” Lo bilong ol Farisi i tok man i mas wasim han i go olgeta long skru bilong han, na sapos em i no mekim ol i ting em i gat rong. Tasol lo bilong God i no tok olsem.

Jisas i no bekim dispela askim bilong ol; em i stori long ol samting nogut ol yet i mekim. Em i tokim ol: “Olsem wanem na yupela i save bihainim pasin bilong yupela yet, na yupela i brukim lo bilong God? God i tok, ‘Yu mas aninit long papamama bilong yu na bihainim tok bilong ol,’ na ‘Man i mekim tok nogut long papa o mama bilong en, em i mas i dai.’ Tasol yupela i save tok olsem, ‘Sapos wanpela man i gat mani samting bilong helpim papa o mama bilong en, tasol em i tokim tupela, “Mi makim dispela pinis bilong givim long God,” orait dispela man i no [ken] tingting long papa na mekim gut long em.’ ”

Ol Farisi i kamapim wanpela lo, olsem: Mani o graun samting man i makim pinis bilong givim long God, em i ken holim yet, tasol dispela samting em bilong haus lotu na em i no ken givim long narapela man. Olsem na sapos papamama i rabis tru na ol i askim em long givim mani samting long ol bilong helpim ol, em i ken tok, ‘Mi makim dispela pinis bilong givim long God,’ na em i abrusim wok bilong helpim papamama.

Jisas i krosim ol Farisi, na em i tok: “Yupela i save daunim tok bilong God na litimapim pasin yupela i bin kisim long ol tumbuna. Yupela i man bilong giaman. Profet Aisaia i bin makim tru pasin bilong yupela taim em i tok olsem, ‘Ol dispela lain manmeri ol i save litimapim nem bilong mi long maus bilong ol, tasol bel na tingting bilong ol i stap longwe tru long mi. Ol i save autim lo bilong ol man tasol, na tok, “Dispela em i tok bilong God.” Olsem na ol i lotu nating long mi.’ ”

Taim ol Farisi i kam givim askim long Jisas, ating ol manmeri i lusim Jisas na i go sanap longwe liklik. Tasol ol Farisi i no inap bekim tok long Jisas, olsem na Jisas i singautim ol manmeri, na em i tok: “Yupela olgeta harim tok bilong mi na tingim gut. Samting i stap ausait long wanpela man na i go insait long en, em i no inap mekim dispela man i doti. Nogat. Ol samting i stap insait long man na i kam ausait, em tasol i mekim dispela man i doti.”

Bihain ol disaipel i tokim Jisas: “Ating yu save olsem ol Farisi i harim dispela tok bilong yu na ol i bel nogut?”

Jisas i tokim ol: “Papa bilong mi i stap long heven, em i gat gaden. Na olgeta samting em yet i no bin planim, bai em i kamautim wantaim ol rop bilong ol. Yupela i no ken wari long ol dispela man. Ol i olsem ol aipas, na . . . sapos aipas i soim rot long narapela aipas, orait tupela wantaim bai i pundaun long hul.”

Jisas i kirap nogut taim Pita i tokim em long stori gut long samting i mekim man i doti. Jisas i tok: “Olsem wanem? Yupela tu i no klia yet? . . . Samting maus i autim, dispela i save kamap long tingting. Na dispela samting i save mekim man i doti. Mi tok long . . . ol samting olsem, ol tingting nogut na pasin bilong kilim man i dai na olkain pasin pamuk na pasin bilong bagarapim marit na pasin bilong stil na pasin bilong tok giaman long kot na pasin bilong tok nogut long ol arapela. . . . Tasol man i kaikai na i no wasim han pastaim, dispela pasin i no mekim em i doti.”

Jisas i no tok long yumi no ken wasim han taim yumi laik kaikai. Nogat. Pasin nogut man i mekim, dispela yet i mekim man i doti, na samting i kirapim em long mekim pasin nogut em ol tingting i stap long bel bilong em. Jisas i laik kamapim giaman bilong ol hetman bilong lotu, em ol i sakim ol lo bilong God na ol i strong long man i mas bihainim ol lo bilong man tasol. Jon 7:1; Lo 16:16; Matyu 15:​1-20; Mak 7:​1-23; Kisim Bek 20:12; 21:17; Aisaia 29:13.

▪ Nau wanem hevi i painim Jisas?

▪ Ol Farisi i sutim wanem tok long Jisas? Tasol Jisas i tok wanem bilong makim olsem ol Farisi i brukim lo bilong God?

▪ Jisas i tok wanem ol samting i save mekim man i doti?