Sapta 79
Wanpela Lain i Lus, Tasol Wan Wan Nogat
JISAS i toktok wantaim ol manmeri i bung ausait long haus bilong wanpela Farisi, na bihain liklik sampela man i stori long em long “ol man bilong Galili, em Pailat i bin tokim ol soldia bilong en long kilim ol i dai long taim ol i mekim ol ofa long God.” Ating ol i stori long sampela Galili, em ol soldia i bin kilim ol i dai taim ol Juda i kros long Pailat i mekim wok long mani bilong tempel bilong wokim rot bilong kisim wara i go long Jerusalem. Ating ol i tingim ol dispela Galili i man nogut, na long dispela as ol i bagarap.
Tasol Jisas i tok: “Yupela i ting ol dispela man bilong Galili i bin mekim planti sin moa i winim olgeta arapela man bilong Galili, na dispela em i as bilong dispela samting nogut i bin kamap long ol, a? Nogat tru.” Na em i tok strong long ol, olsem: “Sapos yupela i no tanim bel, orait wankain samting bai i kamap long yupela olgeta.”
Na Jisas i stori long narapela bagarap i kamap long dispela hap, ating em i bin kamap taim ol i wokim dispela rot bilong wara. Em i tok: “Na dispela 18 man, bipo longpela haus bilong Siloam i pundaun antap long ol na i kilim ol i dai, em yupela i ting rong bilong ol i winim rong bilong ol arapela man i stap long Jerusalem, a?” I no olsem ol i man nogut na ol i dai. Nogat. “Taim nogut i save painim yumi olgeta.” Orait nau Jisas i tok strong gen long ol, olsem: “Sapos yupela i no tanim bel, orait wankain samting bai i kamap long yupela olgeta.”
Nau Jisas i mekim wanpela tok piksa i stret long dispela. Em i tok: “Wanpela man i bin planim wanpela diwai fik . . . na bihain em i kam long dispela diwai bilong painim ol pikinini fik. Tasol em i no lukim wanpela i stap. Olsem na em i tokim wokman bilong gaden olsem, ‘Harim. Tripela yia nau mi kam bilong painim ol pikinini fik long dispela diwai, tasol em i no karim pikinini. Olsem na yu mas katim dispela diwai.’ ” Na wokman i bekim tok olsem, “Bai mi brukim graun long as bilong en na putim pekpek bilong bulmakau. Ating em bai inap karim kaikai long yia bihain. Na sapos nogat, orait yu ken katim.”
Inap 3-pela yia pinis Jisas i bin mekim wok bilong kirapim lain Juda long bilip long em, na sampela handet tasol i kamap disaipel bilong em, olsem kaikai i kamap long diwai. Nau long dispela namba 4 yia, em i wok strong moa long autim tok long Judia na Perea bilong kirapim ol manmeri long bilip long em. I olsem em i brukim graun long as bilong diwai na putim pekpek bilong bulmakau. Tasol ol i no bilip! Lain Juda i no laik tanim bel, olsem na ol i mas bagarap. Wan wan tasol i harim tok na tanim bel.
Bihain Jisas i autim tok long wanpela haus lotu long de Sabat. Em i lukim wanpela meri i gat spirit nogut i stap long em, na inap 18 yia olgeta, baksait bilong em i krungut na em i no inap sanap stret. Jisas i sori long em na i tok: “Meri, mi tekewe pinis sik bilong yu.” Na em i putim han antap long dispela meri, na wantu tasol meri i sanap stret na i kirap litimapim nem bilong God.
Tasol hetman bilong haus lotu i kros na i tok: “I gat 6-pela de bilong mekim wok. Sapos yupela i laikim man i tekewe sik bilong yupela, orait yupela i mas i kam long de bilong wok. Tasol maski askim man long tekewe sik bilong yupela long de Sabat.” Hetman i save Jisas i gat strong bilong oraitim sik, tasol em i kros long ol manmeri i kam askim Jisas long tekewe sik bilong ol long de Sabat.
Jisas i tok, ‘Yupela i man bilong giaman. Long de Sabat yupela olgeta i save lusim ol bulmakau na donki bilong yupela, na kisim ol i go bilong dring wara. Tasol dispela meri Juda hia, Satan i bin pasim em inap long 18 yia. Orait, sapos mi laik lusim dispela samting i bin pasim em, mi no inap mekim long de Sabat, a?’
Ol birua i harim dispela tok na ol i sem. Tasol ol manmeri i amamas long olgeta gutpela samting Jisas i mekim. Olsem na Jisas i kolim gen tupela tok piksa i olsem tok profet long Kingdom bilong God. Em i bin kolim dispela tupela tok piksa wanpela yia bipo, taim em i stap long wanpela bot na ol manmeri i sindaun long nambis na harim tok bilong em. Luk 13:1-21; Saveman 9:11; Matyu 13:31-33.
▪ Kolim tupela bagarap em Jisas na ol man i stori long en. Jisas i mekim wok long dispela tupela stori bilong lainim ol man long wanem samting?
▪ Stori bilong diwai fik i no karim kaikai, na ol samting ol i mekim bilong kirapim diwai long karim kaikai, dispela inap lainim yumi long wanem samting?
▪ Olsem wanem hetman bilong haus lotu i makim olsem em i save long strong bilong Jisas long oraitim sikman? Tasol Jisas i tok wanem bilong kamapim giaman bilong dispela man?