Gutpela Samting Tru i Wetim Ol Man i Dai Pinis
WANPELA meri i gat 25 krismas em i tok: ‘Long 1981 mama i dai long sik kensa. Long dispela taim mi gat 17 krismas na liklik brata bilong mi i gat 11-pela krismas. Mama i lusim mi na bel bilong mi i bagarap tru. Mipela i bilip olsem em i go long heven, olsem na mi laik kilim i dai skin bilong mi na bai mi ken go i stap wantaim em. Em i nambawan pren bilong mi.’
Taim dai i kisim wanpela man o meri yumi laikim em tumas, dispela i no stret liklik long yumi. Na taim dispela samting i kamap, yumi ting bai yumi no inap toktok o lap moa wantaim em o holim em, na yumi hatwok tru long karim dispela hevi. Na taim ol i tokim yumi, em i go pinis long heven, dispela i no pinisim bel hevi bilong yumi.
Tasol tok bilong Baibel i narapela kain long dispela. Olsem yumi stori pinis long en, Baibel i makim olsem klostu nau bai yu inap bung gen wantaim dispela man o meri yu laikim em tumas, tasol i no long heven—bai yu bungim em gen hia long graun, taim bel isi na stretpela pasin i stap long en. Na long dispela taim bai skin bilong ol manmeri i kamap gutpela tru, no gat sik, na ol i no ken tingting long i dai moa. Tasol ating sampela bai tok: ‘Dispela samting i no inap kamap tru.’
Olsem wanem yu inap bilip tru long dispela samting? Bilong bilip long wanpela tok promis, yu mas save tru olsem man bilong mekim dispela tok em i gat laik tru na em inap tru long truim dispela tok. Orait, husat i tok promis long ol man i dai pinis bai ol i stap laip gen?
Long yia 31 C. E. Krais Jisas i tok promis olsem: “Papa i save kirapim bek ol man i dai pinis na i givim laip long ol. Na olsem tasol Pikinini tu i save givim laip long ol man long laik bilong em yet. . . . Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:21, 28, 29) Em nau, Jisas i tok promis long planti milion manmeri i dai pinis ol bai stap laip gen long dispela graun, na ol inap i stap oltaim oltaim long gutpela ples paradais em bai kamap long graun. (Luk 23:43; Jon 3:16; 17:3; skelim Song 37:29 wantaim Matyu 5:5.) Jisas yet i bin mekim dispela tok promis, olsem na yumi ken ting em i gat laik long truim. Tasol em inap mekim tru o nogat?
Klostu tupela yia bihain long taim Jisas i mekim dispela tok, em i kamapim klia olsem em i gat laik tru long kirapim bek ol man i dai pinis, na em inap tru long mekim.
“Lasarus, Yu Kam Ausait”
Wanpela hevi i kamap. Lasarus i gat bikpela sik tru. Tupela susa bilong em, em Maria na Marta, ol i salim tok long Jisas, em i stap long hap i go bilong wara Jordan: “Bikpela, dispela man yu laikim tumas, em i gat sik.” (Jon 11:3) Ol i save Jisas i laikim tumas Lasarus, na ol i ting em bai kam hariap long lukim gutpela pren bilong em. Tasol em i no go hariap long Betani. Em i stap tupela de moa.—Jon 11:5, 6.
Bihain liklik long taim ol i salim tok long Jisas, Lasarus i dai. Jisas i save long taim em i dai, na Jisas i tingting pinis long mekim wanpela samting. Orait, Lasarus i stap 4-pela de pinis long matmat na Jisas i kamap long Betani. (Jon 11:17, 39) Olsem wanem? Jisas inap kirapim bek wanpela man i bin dai longtaim olsem?
Marta i harim tok long Jisas i wokabaut i kam, na em i ran i go bungim Jisas long rot. (Skelim wantaim Luk 10:38-42.) Jisas i sori tru long em na i tokim em: “Brata bilong yu bai i kirap bek.” Marta i kamapim bilip bilong em long ol man i dai pinis bai kirap bek bihain, na nau Jisas i tokaut long em: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip.”—Jon 11:20-25.
Orait, Jisas i kamap pinis long matmat na em i tokim ol long rausim ston i pasim ai bilong matmat. Taim em i beten pinis em i singaut strong: “Lasarus, yu kam ausait.”—Jon 11:38-43.
Olgeta manmeri i lukluk strong long matmat. Em nau, wanpela man i lusim tudak bilong hul na wokabaut i kam. Laplap i banisim lek han na pes bilong em. Nau Jisas i tok: “Lusim laplap na larim em i wokabaut.” Orait, ol i lusim olgeta laplap pinis na olaman! Em Lasarus tasol, em i bin stap 4-pela de pinis long matmat!—Jon 11:44.
Dispela Samting i Bin Kamap Tru?
Dispela stori long Jisas i bin kirapim bek Lasarus, olsem Gutnius Bilong Jon i stori long en, dispela samting i bin kamap tru. Jon i kolim olgeta liklik liklik samting i bin kamap, olsem na yumi save, em i no wanpela tok bokis samting. Sapos yumi no bilip long dispela stori, i olsem yumi no bilip long olgeta mirakel em Baibel i stori long en—wanpela mirakel, em Krais Jisas yet i bin kirap bek long matmat. Na sapos yumi no bilip long dispela mirakel, i olsem yumi sakim bilip Kristen olgeta.—1 Korin 15:13-15.
Sapos yu bilip olsem God i stap tru, bai yu no hatwok long bilip olsem ol man i dai pinis bai kirap bek. Tingim dispela samting: Taim man i laik kolim husat husat bai kisim ol samting bilong em taim em i dai pinis, em inap putim dispela tok long video-kaset. Orait, taim em i dai, ol pren na wanblut inap lukim pes bilong em long video na harim ol tok bilong em long ol i mas mekim wanem long skelim mani na haus samting bilong em. Inap wan handet yia bipo, ol man i no inap mekim kain samting olsem, a? Na long nau tu, sampela lain i stap longwe long bus samting, ol i ting pasin bilong lukim pes na harim nek bilong man long video em i wanpela mirakel stret. Orait, ol dispela lo bilong saiens em God i bin kamapim, sapos ol man inap mekim wok long en na kamapim piksa na nek bilong man long video, orait God inap mekim bikpela wok moa yet long en, a? Olsem na yumi ken ting dispela Man i bin wokim yumi em inap tru long wokim gen skin bilong yumi.
Dispela mirakel bilong Jisas long kirapim bek Lasarus, em i strongim bilip bilong ol long Jisas na long kirap bek. (Jon 11:41, 42; 12:9-11, 17-19) Na dispela i kamapim klia olsem Jehova na Jisas i gat bikpela laik tru long kirapim bek ol man i dai pinis.
‘God Bai Laik Tumas Long En’
Taim Lasarus i dai, Jisas i kamapim klia sori bilong em, na dispela i makim bikpela laik bilong em long kirapim bek ol man i dai pinis. Baibel i tok: “Jisas i lukim Maria i krai, na em i lukim ol Juda i kam wantaim Maria, ol tu i krai. Na bel bilong en i sori tru na em tu i laik krai. Na em i tok, ‘Yupela i bin putim em we?’ Na ol i tokim em, ‘Bikpela, yu kam lukim.’ Na Jisas i krai. Ol Juda i lukim na ol i tok, ‘Lukim. Em i bin laikim tru dispela man.’ ”—Jon 11:32-36.
Sori bilong Jisas i kamap klia long ol tok olsem: “bel bilong en i sori tru,” “i laik krai,” “krai.” Tok ples ol i bin raitim dispela tok long en pastaim i makim olsem, bel bilong Jisas i sori nogut tru long pren bilong em Lasarus i dai, na taim em i lukim susa bilong Lasarus i krai, aiwara i pulap long ai bilong Em na i kapsait.a
Tasol Jisas i bin kirapim bek tupela man moa. Na em i tingting pinis long kirapim bek Lasarus tu. (Jon 11:11, 23, 25) Tasol em i “krai.” Olsem na wok bilong kirapim bek man i dai pinis, Jisas i no ting em i wanpela wok tasol em i mas mekim. Nogat. Taim em i laik kirapim bek Lasarus, bel bilong em i sori tru, na dispela i kamapim klia olsem em i gat bikpela laik tru long pinisim ol hevi bilong i dai.
Jisas em i “wankain stret olsem God yet,” olsem na i stret yumi ken ting Papa bilong yumi long heven i gat wankain tingting olsem Jisas. (Hibru 1:3) Gutpela man Jop i save, Jehova yet i gat bikpela laik long kirapim bek ol man i dai pinis, olsem na Jop i tok: “Ol man i dai pinis, ol inap kisim laip gen? . . . Bai yu singautim mi, na bai mi bekim tok long yu. Bai yu gat bikpela laik tru long ol samting yu bin wokim.” (Jop 14:14, 15, NW ) Long tok Grik, dispela tok “bai yu gat bikpela laik tru,” i makim olsem dispela laik bilong God i strong tru long bel bilong em. (Stat 31:30; Song 84:2) Olsem na yumi ken ting, Jehova i amamas tru long tingim taim bilong kirapim bek ol man i dai pinis.
Orait, yu ting yumi inap bilip tru long tok promis bilong kirapim bek ol man i dai pinis? Yes, yumi inap bilip tru olsem Jehova na Jisas i gat laik tru na ol inap tru long truim dispela tok promis. Olsem na yu gat rot long bung gen wantaim famili bilong yu ol i dai pinis, em ol bai kirap bek hia long dispela graun yet, taim ol pasin nogut bilong nau i pinis!
Jehova i bin putim namba wan man na meri long wanpela naispela gaden, na em i tok promis long kamapim bek Paradais long graun taim Kingdom bilong Em long han bilong Krais i bosim graun. (Stat 2:7-9; Matyu 6:10; Luk 23:42, 43) Long dispela Paradais ol manmeri inap tingting long i stap oltaim oltaim, no gat sik moa. (KTH 21:1-4; skelim wantaim Jop 33:25; Aisaia 35:5-7.) Na pasin birua, na bel nogut long ol man bilong narapela skin, na ol pait nogut namel long ol lain, na hevi bilong mani, ol dispela samting bai pinis. Taim graun i kamap gutpela ples olsem, God Jehova long rot bilong Krais Jisas bai kirapim bek ol man i dai pinis.
Dispela meri Kristen yumi bin stori long em long kirap bilong dispela hap, nau em i wetim dispela samting. Sampela yia bihain long taim mama bilong em i dai, ol Witnes Bilong Jehova i helpim em long kisim save long Baibel. Em i tok: “Taim mi kisim save long ol man i dai pinis bai kirap bek, mi krai. Mi amamas tru long save, bai mi lukim gen mama bilong mi.”
Sapos yu tu yu gat bikpela laik long lukim gen wanpela long famili bilong yu i dai pinis, ol Witnes Bilong Jehova bai amamas long helpim yu long kisim save long olsem wanem yu inap bilip na wetim dispela samting. Yu ken i go painim ol long wanpela Haus Kingdom i stap long hap bilong yu, o lukim ol atres long pes 32 na salim pas long atres i stap klostu long hap bilong yu.
[Futnot]
a Dispela tok “bel bilong en i sori tru,” ol i kisim long wanpela tok Grik (em·bri·maʹo·mai) i makim olsem bel i pilim tru. Wanpela saveman bilong Baibel i tok: ‘Dispela i mas makim olsem bel bilong Jisas i pilim nogut tru na Em i mekim liklik singaut bilong bel sori.’ Na dispela tok “i laik krai,” ol i kisim long wanpela tok Grik (ta·rasʹso) i makim olsem bel i no stap isi. Wanpela saveman bilong wokim buk dikseneri i tok, insait bilong en i olsem ‘bel i bagarap stret na i no stap isi.’ Na dispela tok “krai,” ol i kisim long wanpela tok Grik (da·kryʹo) i makim olsem ‘aiwara i kapsait.’
Tingim Ol Dispela Askim
Taim Lasarus i dai, Jisas i mekim wanem na em i kamapim klia olsem em i gat laik tru na em inap tru long kirapim bek ol man i dai pinis?
Olsem wanem yumi ken bilip tru long stori bilong Baibel long Jisas i kirapim bek Lasarus?
Dispela stori long Jon sapta 11, olsem wanem em i kamapim klia olsem Jisas i gat bikpela laik tru long pinisim ol hevi bilong i dai?
Olsem wanem yumi ken save, Jehova i amamas tru long tingim taim bilong kirapim bek ol man i dai pinis?
[Blok long pes 28]
Ol Tok Bilong Strongim Man
Planti gutpela Kristen, taim ol i stori long olsem wanem ol i bin karim dispela kain hevi, ol i tok: “Mi laik tokim yu long wanpela tok bilong Baibel mi save laikim tru.” Sapos yu gat dispela hevi, ating ol dispela tok bai helpim yu tu.
“God . . . em i Papa bilong yumi, na em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi.”—2 Korin 1:3, 4.
“Yu save opim han bilong yu na inapim laik bilong olgeta samting i stap laip.”—Song 145:16, NW.
“Em [God] i makim pinis wanpela de . . . em bai i skelim pasin bilong olgeta manmeri bilong graun. Na em i bin makim wanpela man bilong bosim dispela kot. Dispela man i bin dai na God i kirapim em bek long matmat. Olsem na yumi ken bilip tru long God i bin givim dispela wok long em.”—Aposel 17:31.
“Mi yet mi save strongim bel bilong yupela.”—Aisaia 51:12.
“Bai mi lukautim yupela gut tru olsem mama . . . i mekim . . . bel bilong pikinini bilong en i stap isi.”—Aisaia 66:13.
“Taim mi gat hevi, mi bin kisim bel isi, long wanem, promis bilong yu i givim laip long mi. Bikpela, mi save ting long tok bipo yu bin givim mi, na dispela tok i givim strong long mi. Yu promis pinis . . . bai yu strongim bel bilong mi.”—Song 119:50, 52, 76.
“Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.”—Jon 5:28, 29.
[Piksa long pes 26]
Taim Jisas i laik kirapim bek Lasarus, bel bilong em i sori tru, na dispela i kamapim klia olsem em i gat bikpela laik tru long pinisim ol hevi bilong i dai
[Piksa long pes 31]
Ofa bilong Krais Jisas i mekim na ol man i dai pinis bai kirap bek, na dispela bai givim bikpela amamas tru long olgeta lain