Sapta 7
Ol Samting God i Mekim Bilong Kisim Bek Ol Man
1, 2. (a) Wanem samting i kamap na wanpela kepten bilong ol soldia bilong Rom i luksave long Pikinini bilong God? (b) Bilong wanem Jehova i larim Jisas i dai?
WANPELA apinun long namba wan mun bilong ol Israel klostu 2,000 yia bipo, wanpela kepten bilong ol soldia bilong Rom em i wok long lukim 3-pela man i karim bikpela pen tru na isi isi ol i dai. Em i tingim tru wanpela—em Krais Jisas. Ol i bin nilim Jisas long wanpela pos diwai. Long belo, skai i go tudak olgeta na klostu nau em taim bilong Jisas i mas i dai. Taim em i dai, graun i guria nogut tru, na kepten i tok: “Tru tumas, dispela man em i Pikinini Bilong God.”—Mak 15:39.
2 Pikinini bilong God! Kepten i tok stret. Nau tasol em i lukim nambawan bikpela samting i bin kamap long graun. Sampela taim bipo, God yet i bin tok Jisas em i Pikinini bilong em na em i laikim em tumas. (Matyu 3:17; 17:5) Bilong wanem Jehova i larim Pikinini bilong em i dai? God i mekim olsem bilong kisim bek ol man long sin na i dai.
EM I BILONG MEKIM BIKPELA WOK
3. Olsem wanem i stret God i makim dispela wanpela Pikinini bilong em bilong mekim wanpela bikpela wok bilong helpim ol man?
3 Olsem yumi lain pinis long dispela buk, Jisas i bin i stap taim em i no kam daun yet long graun. Baibel i kolim em “dispela wanpela Pikinini Bilong God,” long wanem, Jehova yet i wokim em. Bihain God i wokim ol narapela samting long rot bilong Jisas. (Jon 3:18; Kolosi 1:16) Jisas i save laikim tru ol man. (Sindaun 8:30, 31) Olsem na yumi no kirap nogut long Jehova i makim dispela wanpela Pikinini bilong em long mekim wanpela bikpela wok taim ol man i gat kot na God i tok ol i mas i dai!
4, 5. Taim Jisas i no kam daun yet long graun, Baibel i tokaut long wanem ol samting Pikinini, em Mesaia, bai mekim?
4 Taim God i kolim strafe bilong Adam na Iv na Satan long gaden Iden, em i tok long wanpela ‘pikinini’ em bai kamap Man bilong kisim bek ol man. Dispela Pikinini bai kam bilong pinisim olgeta samting nogut Satan i bin kamapim, em “dispela snek bilong bipo yet.” Dispela Pikinini bai bagarapim Satan na olgeta lain i bihainim Satan.—Stat 3:15; 1 Jon 3:8; KTH 12:9.
5 Insait long ol handet handet yia, isi isi God i givim sampela save moa long ol man long dispela Pikinini, em i Mesaia. Olsem lista long pes 37 i makim, i gat planti tok profet i kolim planti samting em bai mekim long graun, olsem ol man bai mekim nogut tru long em na em i mas karim bikpela pen na hevi bilong inapim wok God i makim bilong em.—Aisaia 53:3-5.
BILONG WANEM MESAIA I MAS DAI
6. Mesaia bai mekim wanem, olsem Daniel 9:24-26 i tok? Em bai mekim olsem wanem?
6 Tok profet long Daniel 9:24-26 i makim olsem Mesaia—em Man God i Makim—bai mekim wanpela bikpela wok. Em bai kam long graun bilong “lusim olgeta sin bilong ol manmeri na pinisim olgeta pasin nogut bilong ol, na oltaim oltaim ol manmeri bai i bihainim stretpela pasin tasol.” Mesaia bai tekewe strafe, olsem dai, long ol manmeri i stap gut long God. Tasol em bai mekim olsem wanem? Tok profet bilong Daniel i tok, bai “ol i kilim” em i dai.
7. Bilong wanem ol Juda i save kilim ol animal bilong mekim ofa? Dispela i piksa bilong wanem samting?
7 Ol Israel bilong bipo i save long dispela pasin bilong mekim ofa bilong tekewe sin. Taim ol i mekim lotu olsem God i makim long Lo em i givim long rot bilong Moses, ol i save kilim ol animal na mekim ofa. Dispela i helpim ol Israel long save, ol man i mas i gat samting bilong tekewe o karamapim sin bilong ol. Aposel Pol i tokaut klia long dispela stiatok olsem: “Sapos ol i no kilim wanpela samting i dai na mekim blut bilong en i kapsait, orait God i no save tekewe sin bilong ol manmeri.” (Hibru 9:22) Ol Kristen i no aninit long Lo Bilong Moses na ol samting Lo i tok ol i mas mekim, olsem kilim ol animal bilong mekim ofa. (Rom 10:4; Kolosi 2:16, 17) Na ol i save ol dispela kain ofa i no inap tekewe sin olgeta. Ol dispela ofa i olsem piksa bilong gutpela ofa tru bilong bihain—em ofa bilong Mesaia, o Krais. (Hibru 10:4, 10; skelim wantaim Galesia 3:24.) Tasol ating yu laik save, ‘Tru Mesaia i mas i dai bilong mekim dispela wok?’
8, 9. Adam na Iv i lus long wanem ol gutpela samting? Pasin bilong tupela i mekim wanem long ol pikinini bilong ol?
8 Tru tumas, Mesaia i mas i dai—i no gat narapela rot bilong kisim bek ol man. Bilong save gut long as bilong dispela, yumi mas tingting bek long bikpela samting tru Adam na Iv i lus long en taim ol i bikhet long God long gaden Iden. Tupela inap i stap oltaim oltaim! Ol i stap pikinini bilong God na em i stap Papa bilong ol. Tasol taim ol i sakim wok bilong Jehova long bosim ol, ol i lus olgeta long ol dispela samting na ol i bringim sin na i dai long olgeta manmeri.—Rom 5:12.
9 I olsem namba wan tumbuna papamama bilong yumi i bin tromoi nating bikpela mani tru na nau ol i gat bikpela dinau. Adam tupela Iv i putim dispela dinau i go long ol pikinini bilong ol. Taim mama i karim yumi, yumi no gutpela olgeta; yumi gat sin na yumi bilong i dai. Taim yumi gat sik o yumi mekim wanpela tok i bagarapim bel bilong man na yumi bel hevi long yumi bin mekim dispela tok, em nau, yumi pilim hevi bilong dispela dinau—em sin yumi kisim long namba wan tumbuna. (Rom 7:21-25) I gat wanpela samting tasol bilong helpim yumi—yumi mas kisim bek olgeta samting Adam i bin lusim. Tasol yumi no inap kisim laip i stap gutpela olgeta olsem pe bilong sampela wok yumi bin mekim. Yumi olgeta i sinman na yumi save mekim sin, na pe bilong yumi em dai tasol, i no laip.—Rom 6:23.
10. I mas i gat wanem samting bilong baim bek samting Adam i lusim?
10 Tasol olsem wanem? I gat wanpela samting bilong mekim ofa long en olsem bekim bilong laip Adam i lusim? Stretpela pasin bilong God i makim olsem i mas i gat bekim i wankain stret, ‘laip em i bekim bilong laip.’ (Kisim Bek 21:23) Olsem na wanpela man i mas givim laip bilong em olsem bekim bilong laip i bin lus. Tasol i no gat wanpela man bilong graun inap givim laip bilong em olsem ofa. Song 49:7, 8 i tok long yumi ol sinman olsem: “I no gat wanpela man i ken baim bek em yet [o brata bilong em] long mani. Na em i no inap givim mani long God inap long baim laip bilong en. Nogat tru. Long wanem, pe bilong baim bek man, em i antap tumas. Man i no inap baim God bai God i larim em i stap laip oltaim.” Olsem wanem? Yumi lus olgeta na i no gat wanpela rot bilong helpim yumi? Nogat, i gat wanpela rot.
11. (a) Long tok Hibru, dispela tok “pe bilong baim bek man” i makim wanem samting? (b) Husat tasol inap baim bek ol man? Olsem wanem na em wanpela tasol inap mekim?
11 Long tok Hibru, dispela tok “pe bilong baim bek man” i makim pe ol i givim bilong helpim man long lusim kalabus, na i makim pe i wankain stret. Olsem na man i gutpela olgeta em tasol inap givim laip bilong em bilong baim bek laip Adam i bin lusim na bai pe i wankain stret. Bihain long Adam, i gat wanpela man tasol i kamap long graun na em i gutpela olgeta, em Krais Jisas. Olsem na Baibel i kolim Jisas olsem “narapela Adam i kamap bihain tru.” Na Baibel i tok, em “i bin givim laip bilong em yet bilong baim bek olgeta manmeri.” (1 Korin 15:45; 1 Timoti 2:5, 6) Adam i givim i dai long yumi ol pikinini bilong em, tasol Jisas i givim laip i stap oltaim. Long 1 Korin 15:22, Baibel i stori olsem: “Olgeta man bilong lain bilong Adam ol i save dai. Na olsem tasol olgeta man bilong lain bilong Krais bai ol i kisim laip.” Olsem na i stret Jisas i gat nem olsem “Papa bilong i stap oltaim oltaim.”—Aisaia 9:6, 7.
EM I GIVIM PE OLSEM WANEM?
12. Jisas i kamap Mesaia long wanem taim? Na bihain em i mekim wanem wok?
12 Klostu long pinis bilong yia 29, Jisas i go long wanblut bilong em Jon bilong kisim baptais na givim em yet bilong mekim laik bilong God. Long dispela taim Jehova i kapsaitim spirit holi long Jisas. Long dispela rot Jisas i kamap Mesaia, o Krais, em Man God i Makim. (Matyu 3:16, 17) Nau Jisas i kirap mekim wok bilong em i go inap 3-pela yia na hap. Em i raun long olgeta hap long ples bilong em na autim tok bilong Kingdom bilong God na kisim ol gutpela disaipel. Tasol olsem ol profet i tok pinis, i no longtaim na sampela man i kirap long birua long em.—Song 118:22; Aposel 4:8-11.
13. Jisas i holimpas bilip na long dispela as ol i mekim wanem long em na bihain ol i kilim em i dai?
13 Jisas i no pret long kamapim pasin giaman bilong ol hetman bilong lotu, olsem na ol i painim rot bilong kilim em i dai. Ol i pasim tok long mekim pasin nogut tru, olsem wanpela man i kamapim em, na ol i holim em nating, na wokim kot i no stret, na sutim tok giaman long em olsem em i bikhet long gavman. Ol i paitim em, spetim em, tok bilas long em, paitim em long rop i katkatim skin bilong em. Bihain namba wan gavman Pontius Pailat bilong Rom i mekim kot long em na tok em i mas i dai long pos diwai. Ol i nilim em long pos na sanapim. Em i hangamap i stap inap sampela aua na taim em i pulim win em i pilim bikpela pen moa yet, na isi isi em i dai. Maski bikpela pen olsem i painim em, em i stap gut olgeta long God.
14. Bilong wanem God i larim Pikinini bilong em i karim pen na i dai?
14 Olsem na long Nisan 14, long yia 33, Jisas i givim laip bilong em “bilong baim bek planti manmeri.” (Mak 10:45; 1 Timoti 2:5, 6) Long heven, Jehova inap lukim dispela Pikinini em i laikim tumas em i karim bikpela pen na em i dai. Bilong wanem God i larim dispela samting nogut tru i kamap? Long wanem, em i laikim tumas ol manmeri. Jisas i tok: “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) I dai bilong Jisas i lainim yumi olsem Jehova em i God bilong mekim stretpela pasin tasol. (Lo 32:4) Ating sampela i tingting: Olsem wanem na God i no laik lusim stretpela lo bilong em olsem laip i bekim bilong laip, na maski long pe bilong stretim rong Adam i bin mekim? As bilong dispela i olsem: God i save bihainim ol lo bilong em long olgeta taim, maski dispela i givim bikpela hevi long em.
15. I no stret sapos Jehova i larim Jisas i dai na pinis olgeta, olsem na Em i mekim wanem?
15 Jehova i save mekim stretpela pasin tasol, olsem na bihain gutpela samting i mas painim Jisas. Jisas i bin i stap gut long God, olsem na i no stret sapos God i larim em i slip oltaim long matmat na em i pinis olgeta, a? Tru tumas, i no stret! Ol Skripsa Hibru i tok profet olsem God i no ken larim dispela man i bin stap gut long em i sting long matmat. (Song 16:10; Aposel 13:35) Em i slip long matmat inap olsem 3-pela de, na nau God Jehova i kirapim em bek na em i kisim laip olsem wanpela strongpela spirit.—1 Pita 3:18.
16. Taim Jisas i go bek long heven, em i mekim wanem?
16 Taim Jisas i dai, em i givim laip bilong em olsem man na em i no ken kisim bek. Taim em i kirap bek bilong kisim laip long heven, em i kamap spirit bilong givim laip long man. Na taim em i go antap long ples holi tru long heven, em i stap gen wantaim gutpela Papa bilong em na em i givim pe bilong nambawan gutpela laip bilong em long graun long Papa. (Hibru 9:23-28) Orait nau em inap mekim wok long dispela ofa bilong helpim ol manmeri i bihainim tok bilong God. Em inap helpim yu olsem wanem?
OFA BILONG KRAIS I HELPIM YU
17. Yumi mas mekim wanem na bai ofa bilong Krais inap tekewe sin bilong yumi?
17 Orait, tingim 3-pela samting ofa bilong Krais i mekim bilong helpim yu long nau. Namba wan, em i tekewe sin. Sapos yumi bilip long blut bilong Krais em i bin kapsaitim bilong “baim bek yumi,” bai “God i lusim olgeta sin bilong yumi.” (Efesus 1:7) Olsem na maski yumi bin mekim bikpela rong, yumi inap askim God long lusim rong bilong yumi long nem bilong Jisas. Sapos yumi tanim bel tru, orait Jehova bai mekim wok long dispela ofa bilong Pikinini bilong em bilong helpim yumi. God bai i lusim tingting long rong bilong yumi na mekim bel bilong yumi i stap klin na i no gat tok. Em i no ken bekim pe tru yumi mas kisim long sin bilong yumi, em dai.—Aposel 3:19; 1 Pita 3:21.
18. Olsem wanem na long rot bilong ofa bilong Krais yumi inap wetim gutpela samting i kamap?
18 Namba 2, ofa bilong Krais i as na yumi ken wetim gutpela samting i kamap bihain. Long driman aposel Jon i lukim “planti manmeri tru ol i bung i stap, na i no inap man i kaunim namba bilong ol,” em ol bai winim taim bilong bikpela hevi tru long pinis bilong dispela taim nau. Olsem wanem na ol bai abrusim bagarap taim God i bagarapim planti narapela man? Wanpela ensel i tokim Jon, ol dispela planti manmeri i bin “wasim ol klos bilong ol long blut bilong Pikinini Sipsip [Krais Jisas], na ol klos i kamap waitpela.” (KTH 7:9, 14) Sapos yumi bilip long blut bilong Krais Jisas em i bin kapsaitim na yumi bihainim ol lo bilong God, bai yumi stap klin long ai bilong God na bai yumi inap wet long kisim laip i stap oltaim.
19. Olsem wanem ofa bilong Krais i kamapim klia olsem em yet wantaim Papa bilong em i laikim yu tru?
19 Namba 3, ofa bilong Krais em i kamapim klia tru pasin bilong Jehova long laikim tru ol narapela. Indai bilong Krais i kamapim long ples klia tupela pasin bilong laikim tru ol man i winim tru olgeta narapela pasin, olsem: (1) God i laikim tru yumi na em i salim Pikinini bilong em i kam bilong i dai na helpim yumi; (2) Jisas i laikim tru yumi na em i redi long i dai bilong baim bek yumi. (Jon 15:13; Rom 5:8) Sapos yumi bilip tru, dispela pasin bilong tupela long laikim tru ol man i helpim yumi olgeta wan wan. Aposel Pol i tok: “Pikinini Bilong God em i bin laikim mi tru na em i lusim laip bilong em yet bilong helpim mi.”—Galesia 2:20; Hibru 2:9; 1 Jon 4:9, 10.
20. Bilong wanem yumi mas bilip long ofa bilong Krais?
20 Olsem na yumi mas bilip long ofa bilong Krais na bai yumi kamapim bel bilong yumi olsem yumi pilim tru gutpela pasin sori God na Krais i bin mekim. Sapos yumi mekim olsem, bai yumi inap kisim laip i stap oltaim. (Jon 3:36) Tasol wok bilong kisim bek yumi i no nambawan wok bilong Jisas taim em i kam i stap long graun na em i dai. Nogat. Nambawan as na em i kam long graun em i bilong stretim wanpela bikpela tok i bin kamap, em i karamapim heven na graun wantaim. Sapta 8 i stori olsem yumi olgeta i mas tingim dispela bikpela tok bambai yumi ken save bilong wanem God i bin larim pasin nogut na pen i stap longtaim long graun.
TRAIM SAVE BILONG YU
Bilong wanem Jisas i mas i dai bilong kisim bek ol manmeri?
Olsem wanem Jisas i givim pe bilong baim bek ol man?
Ofa bilong Krais i helpim yu olsem wanem?
[Piksa i karamapim pes olgeta long pes 67]