SAPTA 2
Redi Gut Pastaim Bambai Marit i Ken Wok Gut
1, 2. (a) Olsem wanem Jisas i soim yumi olsem taim yumi laik mekim wanpela samting yumi mas tingim gut pastaim? (b) Wanem taim yumi mas strong moa long tingim gut ol samting pastaim?
SAPOS yumi laik wokim haus, pastaim yumi mas redim gut ol samting. Taim yumi no putim yet simen o pos, yumi mas baim hap graun na wokim piksa bilong haus. Tasol i gat narapela samting tu i bikpela samting. Jisas i tok: “Sapos wanpela bilong yupela i laik wokim wanpela haus bilong ol man i ken i stap na was long ol samting bilong en, orait ating em bai i sindaun pastaim na tingim gut pe bilong wokim dispela haus. Em i laik save, mani bilong en bai inap long pinisim dispela haus, o nogat.”—Luk 14:28.
2 Na i wankain tu long ol samting yumi mas mekim bambai marit bilong yumi i ken wok gut. Planti ol i save tok: “Mi laik marit.” Tasol hamas ol i save sindaun pastaim na tingim gut ol samting ol i mas lusim? Tru, Baibel i mekim ol gutpela tok long marit, tasol em i kamapim tu ol hevi bilong marit. (Sindaun 18:22; 1 Korin 7:28) Olsem na ol manmeri i tingting long marit, ol i mas i gat stretpela tingting long ol gutpela samting bilong marit na ol hevi bilong en tu.
3. Bilong wanem Baibel em inap helpim tru ol man na meri i tingting long marit? Baibel bai helpim yumi long bekim wanem 3-pela askim?
3 Baibel inap helpim ol long mekim olsem. As bilong marit, em God Jehova, em i bin kamapim ol tok bilong Baibel long marit. (Efesus 3:14, 15; 2 Timoti 3:16) Orait nau yumi ken mekim wok long ol lo i stap long dispela buk bilong bipo yet, em ol tok bilong en i stret tru bilong helpim ol manmeri bilong nau, na yumi ken skelim (1) Olsem wanem man o meri i ken save em i redi long marit? (2) Taim em i laik marit, em i mas tingting long poroman i gat wanem kain pasin? (3) Taim man na meri i tingting long marit na ol i wokabaut wantaim, olsem wanem ol i ken i stap stret?
YU REDI TRU LONG MARIT?
4. Wanem wanpela bikpela samting bilong helpim marit bilong yumi long wok gut? Bilong wanem em i bikpela samting?
4 Taim yumi wokim haus, ating yumi mas tromoi bikpela mani, tasol taim yumi wokim pinis yumi mas tromoi bikpela mani yet long lukautim gut haus na stretim ol samting bilong en na bai em i ken i stap longtaim. Na i wankain tu long marit. Taim man o meri i tingting long marit, ating em i tingim hatwok bilong ol samting bilong dispela de; tasol bilong pas gut wantaim poroman i go inap planti yia, dispela tu i gat hatwok na em i mas tingim. Bilong pas gut wantaim poroman olsem, yumi mas mekim wanem? Wanpela bikpela samting, em yumi mas givim bel tru long i stap gut long poroman. Baibel i stori long pasin bilong marit olsem: “Man i save lusim papamama na i pas wantaim meri bilong en, na tupela i kamap wanpela bodi tasol.” (Stat 2:24) Krais Jisas i kamapim wanpela as tasol bilong man o meri i ken katim marit na bihain em i ken maritim nupela poroman—em “pasin pamuk,” olsem man o meri i slip wantaim narapela i no poroman marit bilong em. (Matyu 19:9) Sapos yu tingting long marit, tingim gut ol dispela lo bilong Baibel. Sapos yu no redi yet long mekim tok promis long i stap gut long poroman bilong yu olsem, orait yu no redi yet long marit.—Lo 23:21; Saveman 5:4, 5.
5. Tru, sampela i pret long mekim tok promis long marit, tasol ol man na meri i tingting long marit, bilong wanem ol i mas ting dispela em i bikpela samting?
5 Planti manmeri ol i save pret long mekim tok promis long i stap gut long poroman bilong ol. Wanpela yangpela man i tokaut olsem: ‘Mi save olsem mitupela i mas stap gut wantaim inap long olgeta yia mitupela i stap laip, na dispela i mekim na mi pilim olsem mi kalabus stret.’ Tasol sapos yu laikim tumas dispela man o meri yu laik marit long en, i no hatwok long tok promis olsem yu bai stap gut long em. Bai yu ting em i samting bilong helpim yu long i stap bel isi na sindaun bilong yu bai i gutpela. Taim tupela marit i gat dispela strongpela tingting long bel long i stap gut long poroman, dispela bai mekim na tupela i gat laik long i stap wantaim long gutpela taim na long taim nogut tu, na narapela bai helpim na sambai long narapela, maski wanem hevi i kamap. Aposel Pol i tok, man i givim bel tru long narapela, “em i no save larim wanpela samting i daunim em,” na “long taim bilong hevi em i save sanap strong.” (1 Korin 13:4, 7) Wanpela meri i tok: ‘Tok promis bilong i stap gut long poroman marit i helpim mi long i stap bel isi. Mitupela i bin tokaut long mipela yet na long ol narapela man olsem mitupela i gat bikpela tingting long i stap gut wantaim, na dispela i mekim gut bel bilong mi.’—Saveman 4:9-12.
6. Bilong wanem i gutpela sapos yu no marit hariap taim yu yangpela yet?
6 Bilong bihainim tok promis olsem, yumi mas i gat pasin na tingting olsem bilong man i bikpela pinis. Olsem na Pol i tokim ol Kristen, i gutpela moa sapos ol i no marit hariap—ol i ken wet inap long taim ol “i no yangpela moa,” long wanem, taim man i yangpela yet, laik bilong mekim maritpasin i save kamap strong long bel, na dispela inap paulim tingting bilong em taim em i laik skelim gut ol samting. (1 Korin 7:36, NW) Taim ol yangpela i wok long i go bikpela, ol tingting na laik bilong ol i save senis hariap hariap. Planti manmeri em ol i marit taim ol i yangpela tru, ol i lukim olsem taim ol i marit inap sampela yia tasol, ol tingting na laik bilong ol, na bilong poroman bilong ol tu, i senis. Ol lain i gat wok long skelim dispela samting ol i kamapim olsem, ol yangpela i gat olsem 13 i go inap 19 krismas na ol i marit, bihain planti bilong ol bai i no stap amamas na ol bai katim marit, winim ol manmeri i marit taim ol i bikpela pinis. Olsem na yu no ken marit hariap. Sapos yu stap singel inap sampela yia olsem yangpela man o meri, dispela bai lainim yu na yu gat save long ol samting, na bai yu kisim tingting na pasin olsem bilong man o meri i bikpela pinis, na bai yu inap tru long i stap olsem gutpela poroman taim yu marit. Na sapos yu wet pastaim na yu no marit hariap, dispela inap helpim yu long save gut long ol pasin na tingting bilong yu yet—em i bikpela samting bilong helpim yu long pas gut wantaim poroman na marit i ken wok gut.
SAVE GUT LONG YU YET PASTAIM
7. Ol man na meri i tingting long marit, bilong wanem ol i mas skelim ol yet pastaim?
7 Olsem wanem? Kwiktaim yu inap kolim ol gutpela pasin yu laik bai poroman bilong yu i mas i gat? Planti ol inap mekim olsem. Tasol olsem wanem long ol gutpela pasin bilong yu yet? Yu gat wanem ol pasin em bai helpim yu bambai marit bilong yu i ken wok gut? Bai yu stap wanem kain man o meri marit? Olsem: Yu save kamapim ol popaia bilong yu na yu orait long kisim ol tok bilong helpim yu? O taim narapela i laik stretim yu, yu save sakim na mekim olsem yu no gat asua? Yu save lap na bel gut? O i olsem yu bel hevi oltaim na yu save toktok planti long ol samting? (Sindaun 8:33; 15:15) Yu mas save, marit i no inap senisim pasin bilong yu. Taim yu singel yet, sapos yu gat pasin antap, na yu save bel hevi kwik long tok o pasin ol narapela i mekim long yu, o oltaim yu save ting i no gat gutpela samting bai kamap, orait bai yu stap wankain yet taim yu marit pinis. I hatwok long lukim ol pasin bilong yumi yet olsem ol narapela i save lukim long yumi, olsem na i gutpela sapos yu go long papa o mama o wanpela pren yu bilip tru long em na askim em long kamapim sampela pasin bilong yu i no gutpela tumas, na askim em long givim sampela tok long yu bilong helpim yu long stretim. Sapos yu kisim save olsem i gat sampela pasin yu inap senisim, orait wok long senisim ol dispela pasin taim yu no marit yet.
Taim yu singel yet, wok long kisim ol gutpela pasin na save bilong mekim wok, em ol bai helpim yu taim yu marit pinis
8-10. Baibel i gat wanem ol gutpela tok bilong helpim man o meri long redi gut long marit?
8 Baibel i tokim yumi long larim spirit holi bilong God i wok insait long bel bilong yumi na kamapim ol pasin long yumi olsem ‘laikim tru ol arapela na amamas na i stap bel isi na i no belhat kwik na helpim ol man na mekim gutpela pasin long ol na wokabaut stret oltaim na i stap isi na daunim laik bilong olpela bel.’ Na Baibel i tok tu olsem “tingting bilong [yumi] i mas kamap nupela” na yumi mas “kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.” (Galesia 5:22, 23; Efesus 4:23, 24) Sapos yu bihainim ol dispela tok taim yu singel yet, i olsem yu putim mani long beng—em bai helpim yu tru long bihain, taim yu marit pinis.
9 Olsem: Sapos yu wanpela meri, lain long ‘bilasim insait bilong yu’ na yu no ken tingting tumas long skin bilong yu i naispela o nogat. (1 Pita 3:3, 4) Sapos yu gat pasin daun na stretpela tingting, dispela bai helpim yu long kisim gutpela tingting na save, “olsem naispela bilas long het bilong yu.” (Sindaun 4:9; 31:10, 30; 1 Timoti 2:9, 10) Sapos yu wanpela man, orait lain long mekim gutpela pasin long ol meri olsem yu tingim gut ol. (1 Timoti 5:1, 2) Taim yu lain long pasin bilong skelim gut ol samting yu mas mekim, na long mekim ol wok bilong yu insait long marit, yu mas lain tu long mekim pasin daun. Sapos man i mekim pasin olsem hatpela bos, dispela bai kamapim hevi insait long marit bilong em.—Sindaun 29:23; Maika 6:8; Efesus 5:28, 29.
10 Tru, i hatwok long senisim tingting bilong yu long ol dispela samting, tasol em i wanpela samting olgeta Kristen i mas wok strong long mekim. Na em bai helpim yu long kamap gutpela poroman marit.
OL PASIN YU LAIK PAINIM LONG POROMAN
11, 12. Olsem wanem man na meri inap kisim save olsem ol tingting na pasin bilong tupela i stret wantaim o nogat?
11 Long hap bilong yu, man o meri yet i save makim poroman ol i laik marit long en? Sapos olsem, orait taim yu lukim wanpela meri na em i gutpela long ai bilong yu, yu mas mekim wanem? Pastaim, askim skin bilong yu yet, ‘Mi gat tingting tru long marit?’ I no stret long giaman na mekim olsem yu laikim wanpela meri na em i ting yu gat laik tru long em. (Sindaun 13:12) Orait nau askim skin bilong yu, ‘Mi inap tru long marit?’ Sapos yu tok ‘Yes’ long tupela askim, orait ol pasin bilong ples bilong yu bai stiaim ol narapela samting bai yu mekim. Ating bai yu mekim olsem: Pastaim bai yu wok long lukim ol pasin bilong meri, na bihain bai yu go long em na yu tokim em olsem yu laik save gut long em. Sapos em i no laik, orait yu no ken wok strong long subim em. Em yet i ken skelim samting em i laik mekim, wankain olsem yu, na i stret em i ken mekim olsem. Tasol sapos em i orait long dispela tok bilong yu, yu ken makim wanpela taim bilong mekim sampela gutpela samting wantaim. Dispela bai givim rot long yu long skelim olsem, sapos yu maritim em, yu bihainim pasin bilong gutpela tingting o nogat.a Orait nau yu mas tingim wanem samting?
12 Bilong bekim dispela askim, tingim tupela kain musik, olsem wanpela piano na wanpela gita. Sapos ol i bin stretim gut krai bilong musik na em i krai gut, orait piano o gita hia inap kamapim gutpela musik tru. Tasol olsem wanem sapos ol i pilaim dispela tupela musik wantaim? Nau krai bilong tupela musik i mas stret wantaim. Na i wankain tu long yu na poroman yu laik marit long en. Ating yutupela wan wan i bin wok strong long stretim ol pasin bilong yupela olsem ol i save stretim krai bilong musik. Tasol nau yu mas tingim wanpela askim olsem: Ol tingting na pasin bilong yutupela i stret wantaim, olsem tupela musik i save krai gut wantaim?
13. Bilong wanem em i no pasin bilong gutpela tingting sapos yu laik maritim wanpela i no gat wankain bilip olsem bilong yu?
13 Em i bikpela samting long yutupela i gat ol wankain bilip na wankain lo em yupela i save bihainim. Aposel Pol i tok: “Ol haiden ol i narakain, olsem na yupela i no ken pas wantaim ol.” (2 Korin 6:14; 1 Korin 7:39) Sapos yu maritim wanpela poroman em i no gat wankain bilip long God olsem yu, dispela inap mekim na bai yupela i no stap wanbel liklik, olsem tupela musik i no krai stret wantaim. Tasol sapos yutupela wantaim i givim bel tru long God Jehova, dispela em i nambawan samting bilong mekim yupela i stap wanbel. Jehova i laik bai yu stap amamas na pas gut wantaim poroman bilong yu. Em i laik bai yu pas wantaim Em na long poroman long pasin bilong laikim tru narapela, olsem wanpela baklain ol i wokim long 3-pela rop.—Saveman 4:12.
14, 15. Sapos yutupela i gat wankain bilip, yu ting dispela tasol inap mekim na bai yutupela i stap wanbel insait long marit? Stori long dispela samting.
14 Tru, pasin bilong lotuim God wantaim i bikpela samting tru bilong helpim yutupela long i stap wanbel, tasol i gat sampela samting moa yupela i mas mekim. Bilong i stap olsem tupela musik i krai stret wantaim, yu na dispela poroman yu laik marit long en i mas i gat wankain tingting long ol samting yupela i laik mekim. Wanem ol laik bilong yupela bilong bihain? Yutupela i gat wanem tingting long kamapim ol pikinini? Wanem ol samting i olsem namba wan samting long yupela?b (Matyu 6:33) Ol marit i stap amamas na pas gut wantaim, ol i save pren gut wantaim na kisim amamas long toktok wantaim na i stap wantaim. (Sindaun 17:17) Bilong i stap olsem, tupela i mas i gat ol wankain laik. I hatwok long man i stap gutpela pren tru bilong narapela sapos tupela i no gat ol wankain laik—na i hatwok moa yet long ol marit i ken stap olsem gutpela pren tru sapos ol i no gat ol wankain laik. Tasol sapos dispela poroman yu laik marit long en i save kisim amamas long wokabaut long bus o maunten samting, na yu no save kisim amamas long en, orait yu ting dispela i makim olsem yutupela i no ken marit? Nogat. Ating i gat sampela samting em yutupela wantaim i save amamas long mekim, na ol i bikpela samting moa. Na yu inap givim amamas long poroman sapos yu bung wantaim em long mekim sampela gutpela samting em i save amamas long mekim.—Aposel 20:35.
15 Tru tumas, bilong i stap wanbel wantaim, i no olsem yutupela i mas wankain tru, nogat. Bikpela samting em yupela i mas redi long senisim sampela pasin o tingting bilong yupela. Yu no ken askim olsem, “Mitupela i save wanbel long olgeta samting?” I gutpela yu askim olsem: “Taim mitupela i no wanbel long sampela samting, wanem samting i save kamap? Mitupela inap i stap isi na toktok gut wantaim long ol dispela samting, na narapela i tingim gut narapela? O taim mipela i toktok wantaim long ol dispela samting mipela i save kros na tok pait?” (Efesus 4:29, 31) Sapos yu laik marit, was gut long man o meri i gat pasin antap na i ting ol tingting bilong em yet i stret, na em i no save orait long tingting bilong narapela sapos i no wankain olsem tingting bilong em, o oltaim em i strong long mekim laik bilong em yet, na em i save tingim rot bilong mekim olsem.
SAVE GUT LONG EM PASTAIM
16, 17. Taim man o meri i tingim wanpela poroman em i laik marit long en, i gutpela sapos em i skelim wanem ol samting bilong dispela poroman?
16 Insait long kongrigesen Kristen, taim ol i laik makim sampela man long holim bikpela wok, “pastaim [ol] i mas traim wok bilong ol.” (1 Timoti 3:10) Yu tu yu ken bihainim dispela lo. Olsem: Sapos yu wanpela meri yu ken askim olsem, “Dispela man i gat wanem kain nem namel long ol man? Husat ol pren bilong em? Em i save bosim gut skin bilong em? Em i save mekim wanem kain pasin long ol lapun? Em i gat wanem kain famili? Em i stap olsem wanem wantaim ol? Em i gat wanem tingting long mani? Em i save dring planti? Em i save belhat hariap, na paitim man? Em i holim wanem ol wok insait long kongrigesen? Em i save mekim gut ol dispela wok o nogat? Mi inap givim biknem long em?”—Wok Pris 19:32; Sindaun 22:29; 31:23; Efesus 5:3-5, 33; 1 Timoti 5:8; 6:10; Taitus 2:6, 7.
17 Sapos yu wanpela man yu ken askim olsem: “Dispela meri i save laikim tru God na daun long em? Em inap tru long lukautim gut haus? Famili bilong em bai i gat laik long mipela i mas mekim wanem? Em i gat gutpela tingting na save, na em i meri bilong wok, na em i save lukautim gut mani na i no tromoi nating? Em i save toktok long wanem ol samting? Em i save tingim tru i stap bilong ol narapela? O em i save tingim em yet tasol, na oltaim em i laik save long ol samting bilong ol narapela man? Mi inap bilip long em? Em bai daun long mi olsem bos bilong famili? O het bilong em i strong tumas na ating em i save bikhet?”—Sindaun 31:10-31; Luk 6:45; Efesus 5:22, 23; 1 Timoti 5:13; 1 Pita 4:15.
18. Sapos yu lukim sampela liklik pasin kranki bilong poroman yu laik marit long en, yu mas tingim wanem samting?
18 Yu mas save, dispela poroman em i wanpela tumbuna pikinini bilong Adam na em i gat sin long skin bilong em—em i no olsem ol man o meri em ol buk i save stori nating long ol na i mekim olsem pasin bilong ol i gutpela olgeta, nogat. Olgeta man na meri i gat sampela pasin kranki, na dispela poroman yu laik marit long en, em tu i gat sampela liklik pasin kranki em yu no ken tingim—na em tu i no ken tingim sampela liklik pasin kranki bilong yu. (Rom 3:23; Jems 3:2) Na tu, taim yu lukim pinis wanpela pasin kranki, dispela inap givim rot long yu long kamap strong long ol samting bilong spirit. Olsem: Sapos yu toktok wantaim dispela poroman yu laik marit long en na yupela i kirap na tok pait. Orait tingim dispela samting: Maski man i laikim tru meri na meri i laikim tru man, na narapela i tingim gut narapela, sampela taim ol i no wanbel long sampela samting. (Skelim wantaim Stat 30:2; Aposel 15:39.) Ating yutupela wantaim i mas “pasim belhat” bilong yupela na lain long i stap isi na stretim tok. (Sindaun 25:28) Olsem wanem? Poroman bilong yu i soim olsem em i gat laik long stretim ol pasin kranki bilong em? Na yu tu yu gat laik long mekim olsem? Yu inap lain na bai bel bilong yu i no skrap kwik long ol liklik liklik samting narapela i mekim? (Saveman 7:9) Taim yutupela i lain long stretim gut ol hevi, dispela inap helpim yupela long toktok gut wantaim na mekim tok tru tasol—em wanpela bikpela samting sapos bihain yutupela i marit.—Kolosi 3:13.
19. Sapos yu lukim sampela bikpela pasin kranki long poroman yu laik marit long en, yu ken mekim wanem bilong bihainim gutpela tingting?
19 Tasol olsem wanem sapos yu lukim sampela pasin bilong poroman na yu tingting planti long en? Yu mas tingim gut dispela samting. Maski yu laikim em tru, o yu gat bikpela laik tru long marit, yu no ken mekim olsem yu no lukim ol dispela bikpela pasin kranki. (Sindaun 22:3; Saveman 2:14) Sapos yu poroman wantaim wanpela na yu tingting planti long sampela pasin bilong em, em i pasin bilong gutpela tingting sapos yu no poroman moa wantaim em, na yu no ken mekim tok promis long maritim em.
MEKIM STRETPELA PASIN TAIM YUTUPELA I WOKABAUT WANTAIM
20. Taim man na meri i wokabaut wantaim, olsem wanem ol inap bihainim pasin i stret?
20 Olsem wanem yupela i ken bihainim pasin i stret taim yupela i wokabaut wantaim? Namba wan samting, em yupela i mas was gut long pasin bilong yupela na bai i no gat wanpela rong long en. Long hap yu stap long en, ol man i orait long man na meri singel i holim han, o kis, o narapela i holim narapela? Maski ol i no gat tok long dispela pasin, yu no ken larim poroman i mekim ol dispela samting long yu sapos yutupela i no pasim tok yet long marit. Na yupela i mas was gut, nogut yupela i kis o narapela i holim narapela, na dispela i kirapim bel bilong yupela na yupela i mekim sampela pasin i doti o mekim pasin pamuk. (Efesus 4:18, 19; skelim wantaim Song Bilong Solomon 1:2; 2:6; 8:5, 9, 10.) Bel bilong yumi i save giamanim yumi, olsem na yutupela wantaim i mas bihainim gutpela tingting na yutupela tasol i no ken i stap insait long wanpela haus, o flet, o ka, o narapela hap na dispela i givim rot long yupela long mekim pasin i no stret. (Jeremaia 17:9) Taim yu bihainim stretpela pasin, dispela i kamapim long ples klia olsem yu save bosim gut skin na yu tingting long poroman bilong yu i mas i stap gutpela, na yu putim dispela i go pas long ol laik bilong yu yet. Na bikpela samting tru, em God Jehova bai amamas long stretpela pasin yutupela i bihainim, long wanem, em i tokim ol wokman bilong em olsem ol i no ken mekim ol pasin i doti na pasin pamuk.—Galesia 5:19-21.
21. Bilong bihainim pasin i stret taim yutupela i wokabaut wantaim, ating yupela i mas mekim wanem?
21 Namba tu samting i olsem: Bilong bihainim pasin i stret taim yutupela i wokabaut wantaim, yupela i mas toktok gut wantaim na narapela i no ken giamanim narapela. Taim yutupela i tingting pinis long marit, i gat sampela samting yupela i mas toktok wantaim long en, olsem: Bai yupela i sindaun we? Bai yutupela wantaim i mekim wok mani? Yupela i laik kamapim sampela pikinini? Na sapos yu bin mekim sampela samting long bipo na em inap kamapim sampela hevi insait long marit bilong yupela, i stret yu kamapim long poroman. Sampela samting i olsem: Ating yu gat sampela bikpela dinau, o yu gat wok long helpim famili samting, o yu gat wanpela bikpela sik. Planti man i gat binatang jem HIV bilong sik AIDS na ol samting bilong dispela sik i no kamap ples klia hariap, olsem na sapos bipo wanpela i bin mekim pasin pamuk o em i bin kisim drak long rot bilong sut, i no gat rong sapos paslain long marit poroman, o papamama bilong poroman, i askim em long go lukim dokta bilong glasim blut bilong em. Sapos dokta i tok yangpela man o meri i gat jem bilong sik AIDS, i no stret sapos em i laik subim poroman long wokabaut yet wantaim em sapos nau em i no laik mekim olsem. Sapos bipo wokabaut bilong wanpela man i no stret—olsem em i bin mekim pasin pamuk o kisim drak long rot bilong sut, o olkain pasin olsem, i stret sapos em yet i go long dokta bilong glasim blut bilong em taim em i no kirap yet long poromanim wanpela meri.
TINGTING LONG TAIM BIHAIN LONG DE BILONG MARIT
22, 23. (a) Taim yu redim ol samting bilong bung bilong marit, nogut yu mekim wanem na yu lusim pasin bilong bihainim stretpela tingting? (b) Yu mas holim wanem stretpela tingting taim yu tingim ol samting bilong bung bilong marit na dispela marit yet?
22 Long ol mun klostu long de bilong marit, ating yutupela wantaim bai i gat bikpela wok long redim ol samting bilong marit. Yupela inap abrusim planti hevi sapos yupela i skelim gut ol samting bilong dispela de na mekim long skel tasol. Tru, ating planti bilaspasin samting long bung bilong marit em bai amamasim ol wanblut na ol wanples, tasol bihain long en tupela nupela marit na famili bilong tupela bai sotwin stret long bikpela wok ol i bin mekim na bikpela hap mani bilong ol i pinis. Tru, i orait long bihainim sampela pasin bilong ples yumi stap long en, tasol sapos yu strong tumas long bihainim ol dispela pasin o yu resis long winim ol narapela bung bilong marit i bin kamap long dispela hap, dispela inap mekim na yu no tingting long bikpela samting tru bilong dispela de, na ating em bai tekewe amamas yu mas kisim long dispela de. Tru, yu mas tingim ol narapela, tasol em wok bilong man bilong marit long makim wanem wanem samting bai kamap long bung bilong marit.—Jon 2:9.
23 No ken lusim tingting: Dispela bung bilong marit em bai stap inap wanpela de tasol, tasol marit bilong yu bai stap inap long olgeta yia yu stap laip. No ken tingting planti tumas long de bilong marit. Tingim God Jehova na wetim em i soim rot long yu, na tingim ol samting bilong i stap bilong yu long bihain olsem man marit o meri marit. Sapos yu mekim olsem, em nau, yu redi gut bambai marit bilong yu i ken wok gut.
a Dispela tok i bilong ol kantri em ol man i ting i orait long yangpela man na meri Kristen i wokabaut wantaim sapos narapela i gat laik long narapela.
b Long kongrigesen Kristen tu i gat sampela em ol i stap olsem arere tasol. Ol i no givim bel long mekim wok bilong God; ating ol tingting na pasin bilong dispela graun i wok long pulim ol.—Jon 17:16; Jems 4:4.