Sapta 18

Jehova i Promis Long Givim Gutpela Prais Long Daniel

1, 2. (a) Bilong winim resis, man i mas i gat wanem kain pasin? (b) Olsem wanem aposel Pol i kamapim olsem pasin bilong stap gut long wok bilong Jehova i wankain olsem man i ran long resis?

WANPELA man i ran long resis em i kam klostu long pinis bilong resis. Maski em i sotwin pinis, em inap lukim mak bilong pinis bilong resis, olsem na em i givim olgeta strong bilong em long pinisim dispela laspela hap bilong resis. Em i taitim tru ol masol bilong em na em i pinisim resis! Pes bilong em i makim olsem em i amamas long hatwok bilong em i pinis na em i winim resis. Pasin bilong stap strong na karim hevi i go inap long pinis, em i kamapim gutpela samting.

² Long pinis bilong Daniel sapta 12, yumi lukim olsem Daniel i kamap klostu long pinis bilong “resis” bilong em yet​—em i mekim wok bilong Jehova i go inap long em i dai. Aposel Pol i stori pinis long sampela wokboi bilong Jehova em ol i stap olsem gutpela piksa long pasin bilong bilip, na nau em i tok: “Ol dispela manmeri bilong bipo ol i sanap na raunim yumi i stap olsem bikpela klaut, na ol i soim yumi pasin bilong bilip. Olsem na yumi mas lusim olgeta kain samting i mekim yumi i no inap ran strong, na olgeta sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi.”​—Hibru 12:​1, 2.

3. (a) Wanem samting i kirapim Daniel long “strongim bel na ran strong”? (b) Ensel bilong Jehova i bin tokim Daniel long wanem 3-pela narapela samting?

³ Daniel em i wanpela bilong ‘ol dispela manmeri i stap olsem bikpela klaut.’ Tru tumas, em i bin “strongim bel na ran strong,” na em i mekim olsem, long wanem, em i laikim tumas God. Jehova i bin kamapim planti tok profet long Daniel i stori long ol samting bai painim ol bikpela gavman long bihain, tasol nau Em i salim sampela tok long Daniel stret bilong strongim em: “Orait yu yet, yu mas i go inap long pinis; na bai yu malolo, tasol yu bai sanap long pinis bilong ol de bilong kisim ol samting God i bin makim bilong yu.” (Daniel 12:​13, NW ) Ensel bilong Jehova i tokim Daniel long 3-pela narapela samting: (1) Daniel i mas “i go inap long pinis,” (2) bai em i “malolo,” na (3) bihain em bai “sanap” gen. Olsem wanem ol dispela tok inap kirapim ol Kristen long nau long sanap strong i go inap long pinis bilong dispela resis bilong laip?

“GO INAP LONG PINIS”

4. Wanem insait bilong dispela tok bilong ensel bilong Jehova olsem “yu mas i go inap long pinis”? Olsem wanem dispela inap givim hatwok long Daniel?

⁴ Wanem insait bilong dispela tok ensel i givim long Daniel, olsem: “Yu mas i go inap long pinis”? Pinis bilong wanem samting? Daniel i gat klostu 100 krismas na i no longtaim na em bai dai, olsem na ating ensel i tok long indai bilong Daniel.a Ensel i kirapim Daniel long stap gut long God i go inap long taim em i dai. Tasol bilong mekim olsem, em bai hatwok. Daniel i bin i stap na lukim Babilon i pundaun na liklik hap lain bilong ol Juda i bin stap kalabus ol i lusim Babilon na go bek long Juda na Jerusalem. Yumi ken ting dispela i givim bikpela amamas long Daniel. Tasol i luk olsem em yet i no bin i go bek wantaim ol. Ating em i lapun tru na em i no gat bikpela strong. O nogut Jehova i gat laik long em i stap yet long Babilon. Tasol taim Daniel i lukim ol wantok i lusim Babilon, yumi inap ting em i bel hevi liklik na em i gat laik long i go bek wantaim ol.

5. Olsem wanem yumi save Daniel i bin stap strong i go inap long pinis?

⁵ Daniel i kisim strong long gutpela tok ensel i mekim: “Yu mas i go inap long pinis.” Dispela inap kirapim yumi long tingim tok Jisas Krais i bin mekim siks handet yia bihain: “Ol manmeri i stap strong inap long las de, God bai i kisim bek ol.” (Matyu 24:13) Yumi save, Daniel i bin mekim olsem. Em i stap strong i go inap long pinis bilong resis bilong kisim laip. Ating dispela em i wanpela as na Baibel i mekim gutpela tok long em long bihain. (Hibru 11:​32, 33) Wanem samting i mekim na Daniel i bin stap strong i go inap long pinis? Stori bilong ol samting em i bin mekim bai helpim yumi long bekim dispela askim.

STAP STRONG OLSEM WANPELA SUMATIN BILONG BAIBEL

6. Olsem wanem yumi save, Daniel i save givim bel long stadi long Tok Bilong God?

⁶ Bilong em i ken stap strong i go inap long pinis, Daniel i wok long stadi na tingim tingim ol gutpela promis bilong God. Yumi save, Daniel i strong long skelim Tok Bilong God. Sapos nogat, olsem wanem em inap save long promis Jehova i givim long Jeremaia olsem ol Juda bai stap kalabus inap 70 yia? Daniel yet i tok: “Mi wok long ritim ol buk bilong God.” (Daniel 9:2; Jeremaia 25:​11, 12) Yes, Daniel i ritim ol buk bilong Baibel i stap long taim bilong em. Yumi save, Daniel i bin lusim planti aua long ritim na tingim tingim long bel ol rait bilong Moses, Devit, Solomon, Aisaia, Jeremaia, na Esekiel.

7. Olsem wanem taim bilong yumi i winim taim bilong Daniel long mekim stadi long Baibel?

⁷ Bilong kisim pasin bilong stap strong, yumi mas givim bel long stadi gut long Tok Bilong God. (Rom 15:​4-6; 1 Timoti 4:15) Na yumi gat Baibel olgeta, em i stori long olsem wanem sampela tok profet bilong Daniel i kamap tru sampela handet yia bihain. Na tu, yumi stap long “taim bilong pinis” em Daniel 12:4 i tok profet long en, na dispela em i wanpela blesing yumi kisim. Long nau, God i mekim gut long ol Kristen em i bin makim, na Em i givim ol gutpela save na tingting long samting bilong spirit, na ol i stap olsem lait bilong tok i tru long dispela taim bilong tudak. Olsem na planti strongpela tok profet bilong Buk Daniel, em sampela bilong ol em Daniel yet i no klia long en, ol i bikpela samting bilong helpim yumi long nau. Olsem na yumi mas stadi long Baibel long olgeta de, na no ken kisim tingting olsem ol dispela samting i no bikpela samting. Dispela bai helpim yumi long stap strong.

DANIEL I SAVE BETEN OLTAIM

8. Daniel i mekim wanem na em i stap olsem gutpela piksa long pasin bilong beten?

⁸ Beten i helpim Daniel long stap strong i go inap long pinis. Long olgeta de em i beten long God Jehova na long bel em i bilip strong. Em i save Jehova em i man bilong “harim beten.” (Song 65:2; skelim wantaim Hibru 11:6.) Wanpela taim bel bilong Daniel i bagarap, long wanem, ol Israel i bihainim pasin bikhet, na em i autim bel hevi bilong em long Jehova. (Daniel 9:​4-19) Na taim Darius i bin putim wanpela lo i tok inap 30 de ol man i mas prea long em wanpela tasol, na ol narapela God nogat, dispela i no pasim Daniel long beten long God Jehova. (Daniel 6:10) Taim yumi tingim dispela lapun man i stap gut long God na em i no laik lusim dispela gutpela pasin bilong beten, maski ol i tromoi em long hul bilong ol laion, bel bilong yumi i pilim tru dispela samting em i mekim, a? Yumi save tru olsem Daniel i stap gut long God i go inap long taim em i dai, na em i save beten strong long Jehova long olgeta de.

9. Bilong wanem yumi no ken kisim tingting olsem beten em i liklik samting?

⁹ I no hatwok long beten. Yumi inap beten long olgeta taim, na long olgeta hap. Yumi ken mekim long maus o long tingting. Yumi no ken kisim tingting olsem beten em i liklik samting. Baibel i tok pasin bilong beten inap helpim yumi long stap strong na no ken les, na i helpim yumi long tingim ol samting bilong spirit. (Luk 18:1; Rom 12:12; Efesus 6:18; Kolosi 4:2) Yumi inap toktok wantaim nambawan bikpela Man long olgeta taim, na em i save harim! Tingim taim Daniel i beten, na Jehova i salim wanpela ensel long helpim em. Ensel i kamkamap long Daniel taim em i beten i stap! (Daniel 9:​20, 21) Long nau ol ensel i no save kam lukim ol man, tasol pasin bilong Jehova i no senis. (Malakai 3:6) Em bai harim beten bilong yumi olsem em i bin harim beten bilong Daniel. Na tu, taim yumi beten, yumi save go klostu moa long Jehova na pas gut wantaim em, na dispela i helpim yumi long stap strong inap long pinis, olsem Daniel i bin mekim.

STAP STRONG OLSEM TISA BILONG BAIBEL

10. Bilong wanem Daniel i pilim olsem pasin bilong skulim ol manmeri long Baibel em i bikpela samting?

¹⁰ Daniel i mas “i go inap long pinis” long narapela samting tu. Em i mas stap strong olsem tisa bilong tok i tru. Em i no lusim tingting olsem em i wanpela bilong ol manmeri God i bin makim bilong em yet, olsem Baibel i tok: “Yupela i witnes bilong mi. Mi bin makim yupela bilong i stap wokman bilong mi.” (Aisaia 43:10) Daniel i bin wok strong tru bilong inapim dispela wok God i givim long em. Yumi ken ting wanpela wok em i mekim em bilong skulim ol wantok ol i stap kalabus long Babilon. Yumi no save tumas long ol samting em i bin mekim wantaim ol narapela Juda, tasol yumi save long sampela samting em i bin mekim wantaim 3-pela “pren bilong em,” Hanania, Misael, na Asaria. (Daniel 1:7; 2:​13, 17, 18) Ol i stap gutpela pren na ating dispela i bin helpim ol long stap strong. (Sindaun 17:17) Jehova i bin givim gutpela save na tingting long Daniel, olsem na em inap skulim ol long planti samting. (Daniel 1:17) Tasol em i gat ol narapela wok tisa bilong mekim.

11. (a) Olsem wanem wok bilong Daniel i narapela kain? (b) Daniel i mekim gut dispela wok bilong em o nogat?

¹¹ Daniel i mekim bikpela wok long autim tok long ol bikman bilong ol narapela kantri, winim ol narapela profet. Maski planti taim em i mas givim tok long ol em ol i no inap laikim, em i no mekim olsem ol dispela bikman i samting nogut tru o ol i samting nating long ai bilong em. Em i mekim gutpela tok long ol i soim olsem em i rispektim ol. I gat sampela man olsem ol dispela bikman ol i bin jeles long Daniel na ol i stretim tok long painim rot bilong kilim em i dai. Tasol sampela bikman ol i save rispek long em. Jehova i bin helpim Daniel long kamapim insait bilong ol tok hait, em ol king na ol saveman i no inap kamapim, olsem na dispela profet i bin kisim biknem na namba. (Daniel 2:​47, 48; 5:29) Tru, taim em i go lapun, em i no inap mekim bikpela wok olsem em i bin mekim taim em i yangpela. Tasol yumi save em i stap gut long God i go inap long taim em i dai na em i wok strong tru long autim tok long dispela God bilong em em i laikim tumas.

12. (a) Yumi ol Kristen i mekim wanem wok bilong skulim ol man? (b) Olsem wanem yumi ken bihainim tok bilong Pol olsem ‘bihainim gutpela tingting na mekim ol stretpela pasin long ol man i stap ausait’?

¹² Long kongrigesen Kristen bilong nau yumi inap painim ol gutpela poroman ol bai helpim yumi long stap strong, olsem Daniel na 3-pela pren bilong em i bin mekim, narapela i helpim narapela. Na tu, namel long yumi, narapela i save skulim narapela na “strongim bel bilong yumi olgeta wantaim.” (Rom 1:​11, 12) Wankain olsem Daniel, yumi gat wok long autim tok long ol man i no bilip. (Matyu 24:14; 28:​19, 20) Olsem na yumi mas lain gut moa yet long pasin bilong skulim man bambai yumi ken “autim stret tok tru bilong God” taim yumi toktok wantaim ol man long Jehova. (2 Timoti 2:15) Na tu, bai yumi kisim helpim sapos yumi bihainim dispela tok bilong Pol: “Taim yupela i stap wantaim ol man i stap ausait long sios, yupela i mas bihainim gutpela tingting na mekim ol stretpela pasin.” (Kolosi 4:5) Yumi mas i gat stretpela tingting long ol man i no wanbilip bilong yumi. Yumi no kisim tingting olsem ol kain man olsem ol i samting nating na yumi winim ol. Nogat. (1 Pita 3:15) Yumi laik mekim ol samting i kirapim ol long i kam long tok i tru, olsem na long gutpela pasin yumi mekim gutpela wok long Baibel bambai tok bilong en i ken go daun long bel bilong ol. Taim yumi helpim wanpela man olsem, yumi save kisim bikpela amamas! Kain amamas olsem i save strongim yumi long i stap strong i go inap long pinis, olsem Daniel i mekim.

“BAI YU MALOLO”

13, 14. Bilong wanem planti man bilong Babilon i pret nogut tru long i dai? Olsem wanem tingting bilong Daniel i no wankain?

¹³ Bihain nau ensel i tokim Daniel: “Bai yu malolo.” (Daniel 12:​13, NW ) Wanem mining bilong dispela tok? Daniel i save, indai bai painim em long bihain. Kirap long taim bilong Adam i kam inap nau ol man bilong graun i no inap abrusim i dai. Olsem na i stret Baibel i kolim dai olsem wanpela “birua.” (1 Korin 15:26) Tasol tingting bilong Daniel long i dai em i narapela kain olgeta long tingting bilong ol Babilon. Lotu bilong ol i gat samting olsem 4,000 god, na ol i save pret tru long i dai. Ol i bilip olsem ol man em ol i no bin amamas taim ol i stap laip o ol man i mekim nogut tru long ol na ol i dai, ol bai kamap ol spirit nogut i laik pretim na mekim nogut long ol man i stap laip. Na tu ol Babilon i bilip long wanpela ples ol daiman i save go long en, na i gat ol tambaran nogut long dispela hap, sampela i luk olsem ol man na sampela olsem ol animal.

¹⁴ Tasol Daniel i no bilip olsem. Planti handet yia paslain long taim bilong Daniel, God i kirapim King Solomon long tok: “Ol man i dai pinis, ol i no inap save long wanpela samting.” (Saveman 9:5) Na man bilong raitim Song i tok: “Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.” (Song 146:4) Olsem na Daniel i save, tok bilong ensel bai kamap tru. Indai i olsem malolo. No gat tingting, no gat bel hevi long ol samting yu bin mekim o yu no bin mekim, no gat pen, no gat ol tambaran nogut. Jisas i mekim kain tok olsem taim Lasarus i dai. Em i tok: “Pren bilong yumi Lasarus i slip.”​—Jon 11:11.

15. Olsem wanem de man i dai i winim de mama i bin karim em?

¹⁵ I gat narapela as na Daniel i no pret long i dai. Baibel i tok: “Gutpela nem i winim gutpela wel, na de man i dai em i winim de mama i karim em.” (Saveman 7:​1, NW ) Tasol de man i dai, em i taim bilong bel hevi, na olsem wanem dispela de inap winim de mama i karim em, em taim bilong amamas? Bikpela tok hia em dispela tok “nem.” “Gutpela wel” i gat bikpela pe bilong en. Susa bilong Lasarus, em Maria, i bin welim lek bilong Jisas long sanda i gat bikpela pe tru bilong en, olsem pe bilong wanpela man i wok mani inap wanpela yia olgeta! (Jon 12:​1-7) Olsem wanem wanpela nem bai i gat bikpela pe bilong en olsem? Long Saveman 7:​1, Baibel Grik Septuagint i tok, “gutnem.” I no nem yet i gat bikpela pe bilong en, nogat, em ol samting dispela nem i makim. Taim mama i karim pikinini, pikinini i no gat nem liklik​—em i no bin mekim ol samting i makim em i wanem kain man, na em i no bin mekim ol gutpela wok, na ol man i no inap tingim ol samting em i bin mekim na ol gutpela pasin bilong em. Tasol taim man i dai, nem bilong em i makim olgeta dispela samting. Na sapos em i gat gutnem long ai bilong God, orait dispela i gat bikpela pe tru, winim olgeta mani samting man inap kisim.

16. (a) Daniel i mekim wanem bilong kisim gutnem long ai bilong God? (b) Olsem wanem Daniel inap save olsem em i gat gutnem long ai bilong Jehova na em inap stap bel isi na i dai?

¹⁶ Long olgeta taim Daniel i wok strong tru bambai em i ken kisim gutnem long ai bilong God, na Jehova i no lusim tingting long ol dispela samting. Em i lukluk long Daniel na em i skelim tingting i stap long bel bilong em. God i mekim wankain pasin long King Devit, em i bin singsing olsem: “Bikpela, yu skelim pinis bel bilong mi, na yu save tru long mi. Yu save long olgeta samting mi save mekim. Yu stap longwe, tasol yu save long olgeta tingting bilong mi.” (Song 139:​1, 2) Tru, Daniel i no gutpela olgeta. Em i tumbuna pikinini bilong sinman Adam na em i insait long wanpela lain ol i sinman. (Rom 3:23) Tasol Daniel i tanim bel long ol rong em i mekim na em i wok strong long wokabaut stret wantaim God bilong em. Olsem na dispela gutpela profet inap bilip strong olsem Jehova bai lusim ol rong bilong em na i no inap bel nogut long em. (Song 103:​10-14; Aisaia 1:18) Jehova i save tingim ol gutpela wok ol wokboi i stap gut long em ol i save mekim. (Hibru 6:10) Olsem na long tupela taim ensel bilong Jehova i bin tokim Daniel olsem, “God i laikim yu tumas.” (Daniel 10:​11, 19) Dispela i makim olsem God i laikim em tru. Daniel i save tru olsem em i gat gutnem long ai bilong Jehova, olsem na em inap i stap bel isi na i dai.

17. Bilong wanem em i bikpela samting long kisim gutnem long ai bilong Jehova long nau?

¹⁷ Yumi wan wan i ken askim yumi yet, ‘Mi bin kisim gutnem long ai bilong Jehova?’ Yumi stap long taim nogut. Yumi no save wanem taim indai inap painim yumi. (Saveman 9:11) Olsem na em i bikpela samting long yumi olgeta wan wan i mas pasim tok long bel long kisim gutnem long ai bilong God long nau, no ken wet. Sapos yumi mekim olsem, i no gat as na bai yumi pret long i dai. Indai i olsem malolo​—olsem slip. Na olsem man i slip, bihain i gat taim bilong kirap!

“BAI YU SANAP”

18, 19. (a) Wanem insait bilong dispela tok, bihain Daniel bai “sanap”? (b) Olsem wanem Daniel i gat save long dispela bilip bilong kirap bek?

¹⁸ Long pinis bilong Buk Daniel God i mekim wanpela naispela promis, i winim planti ol narapela promis God i bin mekim long wanpela man. Ensel i tokim Daniel: “Yu bai sanap long pinis bilong ol de bilong kisim ol samting God i bin makim bilong yu.” Wanem insait bilong dispela tok bilong ensel? Yumi stori pinis olsem dispela “malolo” i makim indai, olsem na dispela promis olsem Daniel bai “sanap” long bihain i mas makim olsem em bai kirap bek!b Sampela saveman i tok Daniel sapta 12 em i namba wan taim Ol Skripsa Hibru i stori long man i dai pinis bai kirap bek. (Daniel 12:2) Tasol dispela tingting bilong ol i no stret. Daniel i save gut long dispela bilip.

¹⁹ Daniel i save long tok Aisaia i bin raitim 200 yia paslain: “Ol dispela lain bilong yu i dai pinis na ol i stap long ples tudak, ol bai i kirap bek na lukim lait. Yu save givim laip long ol man i dai pinis . . . Yupela ol lain i slip long matmat, yupela kirap na amamas na singaut.” (Aisaia 26:19) Paslain tru long dispela, Jehova i bin givim strong long Elaija na Elisa long kirapim bek sampela man. (1 King 17:​17-24; 2 King 4:​32-37) Paslain moa, Hana, em mama bilong profet Samuel, i tokaut olsem Jehova inap kirapim bek ol man i stap long matmat. (1 Samuel 2:6) Na paslain long dispela, stretpela man Jop i stori long samting em i bilip na wetim, olsem: “[“Sapos wanpela man i dai, em inap kisim laip gen?,” NW ] . . . Bai mi wet i stap inap long taim yu makim bilong mi i stap long dispela ples, em i pinis. Na long dispela taim bai yu ting long yu yet yu bin wokim mi, na bai yu laikim tumas bai mi stap klostu long yu gen. Olsem na bai yu singautim mi na bai mi lusim dispela ples na kam long yu.”​—Jop 14:​14, 15.

20, 21. (a) Daniel bai insait long wanem kirap bek? (b) Ating wok bilong kirapim bek ol man long Paradais bai bihainim wanem pasin?

²⁰ Wankain olsem Jop, i gat as na Daniel inap bilip tru olsem Jehova i gat bikpela laik long kirapim em bek long bihain. Tasol taim Daniel i harim wanpela strongpela ensel i mekim tok i strongim dispela bilip bilong em, ating dispela i mekim gut tru bel bilong Daniel. Tru tumas, Daniel bai sanap long “taim ol stretpela man i kirap bek long matmat,” long Taim Bilong Wan Tausen Yia Bilong Krais i Stap King. (Luk 14:14) Olsem wanem long Daniel long dispela taim? Baibel i stori planti long dispela samting.

²¹ Jehova em “God i save mekim stret olgeta wok bilong en. Em i no save mekim ol samting i paul nabaut.” (1 Korin 14:33) Olsem na yumi save, wok bilong kirapim bek ol man long Paradais bai bihainim pasin i stret. Long dispela taim, ating Armagedon i pinis longtaim liklik. (KTH 16:​14, 16) Ol i rausim pinis olgeta samting bilong dispela taim nogut bilong nau, na ol i redim ol samting bilong helpim ol man i kirap bek. Baibel i stori long husat bai kirap bek pastaim, em i tok: “Bai yumi kirap bek na kisim laip long taim bilong yumi yet.” (1 Korin 15:23) I luk olsem long taim bilong kirapim bek “ol stretpela man na ol man nogut,” ol stretpela man bai kirap bek pastaim. (Aposel 24:15) Long dispela rot, ol bilipman bilong bipo, olsem Daniel, ol inap helpim wok bilong lukautim ol samting hia long graun, na bilong skulim ol planti bilion “man nogut” ol i kirap bek na i stap laip.​—Song 45:16.

22. Yumi ken save Daniel bai i gat laik long kisim bekim bilong wanem ol askim?

²² Bilong redi long mekim dispela bikpela wok, ating pastaim bai Daniel i gat sampela askim. Long wanem, taim em i kisim sampela tok profet em i bin tok olsem: “Mi harim dispela tok bilong em, tasol mi no klia gut.” (Daniel 12:8) Em bai amamas tru long kisim save long insait bilong ol dispela tok bilong God i bin stap hait! Em bai i gat laik long harim olgeta samting bilong Mesaia. Daniel bai amamas long kisim save long ol bikpela gavman i kamap pastaim na ol gavman i kamap bihain, kirap long taim bilong em i kam inap long taim bilong yumi, na tu, husat dispela “ol manmeri bilong God Antap Tru”​—em ol i sanap strong na mekim wok bilong ol long “taim bilong pinis,” maski ol man i mekim nogut long ol​—na long bagarap i painim olgeta gavman bilong graun long rot bilong Kingdom bilong God long han bilong Mesaia.​—Daniel 2:44; 7:22; 12:4.

I STAP BILONG DANIEL​—NA YU​—LONG PARADAIS

23, 24. (a) Olsem wanem graun Daniel bai kirap bek long en, i narapela kain long graun em i bin stap long en bipo? (b) Long Paradais bai Daniel i gat hap bilong em yet o olsem wanem? Yumi save long dispela samting olsem wanem?

²³ Daniel bai i gat laik long save long hap em i stap long en​—em i narapela kain tru long hap em i bin stap long en long bipo. Ol pait na pasin nogut bilong taim bilong em bai i pinis olgeta. Bai i no gat bel hevi, na sik, na indai. (Aisaia 25:8; 33:24) Bai i gat planti kaikai, na planti haus, na wok ol man bai amamas long mekim. (Song 72:16; Aisaia 65:​21, 22) Olgeta manmeri bai stap olsem wanpela famili i stap wanbel na amamas.

²⁴ Daniel bai i gat hap bilong em yet insait long dispela nupela taim. Ensel i bin tokim em olsem: “Yu bai sanap long pinis bilong ol de bilong kisim ol samting God i bin makim bilong yu.” Tok Hibru ol i tanim olsem “ol samting” i wankain long tok ol i mekim bilong makim wanpela hap graun.c Ating Daniel i save long tok profet bilong Esekiel i stori long tilim graun taim ol Israel i go bek long kantri bilong ol. (Esekiel 47:13–48:35) Truim bilong tok profet bilong Esekiel long Paradais i makim wanem samting? Em i makim olsem olgeta manmeri bilong Jehova bai i gat hap bilong ol, na Jehova bai tilim hap graun i go long ol na mekim long pasin i stret tasol. Daniel bai i gat hap bilong em long Paradais, tasol God i no makim wanpela hap graun tasol bilong em, nogat. Em bai insait long sampela samting Jehova bai mekim long Paradais. Daniel bai kisim tru ol samting God i promis long givim em.

25. (a) Wanem sampela samting bilong Paradais bai yu amamas long en? (b) Bilong wanem yumi ken tok, Paradais em i ples tru bilong ol manmeri bilong graun?

²⁵ Olsem wanem long samting God i makim bilong yu? Dispela ol tok promis i ken makim samting bai painim yu tu. Jehova i laik bai ol man bilong bihainim tok i ken “sanap” na kisim ol samting, olsem hap bilong ol long Paradais. Man! Bai yumi amamas long bungim Daniel wantaim ol narapela bilipman ol i bin stap long taim ol man i bin raitim Baibel. Na bai i gat planti manmeri moa em yumi no inap kaunim, ol bai kirap bek long matmat na ol i mas kisim skul bambai ol inap save long God Jehova na laikim em tru. Long tingting bilong yu, tingim olsem yu wok long lukautim dispela graun na mekim i kamap wanpela paradais i naispela tru na i no inap pinis. Na tingim tu olsem Jehova bai skulim yu, na bai yu kisim save long bihainim pasin em i bin makim bilong ol manmeri long bihainim. (Aisaia 11:9; Jon 6:45) Em nau, i gat hap bilong yu insait long Paradais. Tru, ating sampela man bai hatwok long bilipim dispela tok, tasol tingim, Jehova i bin wokim ol man long i stap long kain ples olsem. (Stat 2:​7-9) Olsem na yumi ken tok, Paradais em i ples tru bilong ol planti bilion manmeri i stap hia long graun. Em i stret ol i stap long en. Taim yumi go insait long Paradais, i olsem yumi go long ples.

26. Olsem wanem Jehova i tokaut olsem i hatwok long yumi wetim dispela taim nogut bilong nau i pinis?

²⁶ Bel bilong yumi i amamas tru taim yumi tingting long ol dispela gutpela samting. Ating yu yet i gat bikpela laik long i stap long dispela ples, a? Olsem na dispela em i as na ol Witnes Bilong Jehova i gat laik long save long wanem taim bai dispela taim nogut bilong nau i pinis! Pasin bilong wet em i hatwok. Jehova i save dispela i hatwok, olsem na em i tokim yumi long “wet liklik” long pinis i kamap, maski yumi “ting em i no inap kamap kwik.” Mining bilong dispela tok i olsem, long tingting bilong yumi yet em i no inap kamap kwik, tasol long dispela ves yet Jehova i tok: “Em bai i kamap.” (Habakuk 2:3; skelim wantaim Sindaun 13:12.) Yes, pinis bai kamap long taim stret.

27. Yu mas mekim wanem bilong sanap long ai bilong Jehova i go inap oltaim oltaim?

²⁷ Pinis i wok long kam klostu, olsem na yu mas mekim wanem? Yu mas stap gut long God na sanap strong, olsem profet Daniel i bin mekim, em dispela man Jehova i laikim tumas. Wok strong oltaim long stadi long Tok Bilong God. Beten strong. Long pasin sori bung wantaim ol wanbilip. Givim bel long skulim ol narapela long tok tru bilong Baibel. Pinis bilong dispela taim nogut i wok long kam klostu moa long olgeta de, olsem na yu mas strong long i stap olsem wokboi bilong God Antap Tru na stap gut long em, na stap olsem strongpela man bilong tokaut long ol tok bilong Baibel. Na yu mas putim yau long tok profet bilong Daniel! Na bai Bikpela King Jehova i mekim gut long yu na larim yu i sanap long ai bilong em na stap amamas i go inap oltaim oltaim!

[Ol Futnot]

YU BIN KISIM WANEM SAVE?

• Wanem samting i helpim Daniel long stap strong i go inap long pinis?

• Bilong wanem Daniel i no pret long i dai?

• Dispela promis ensel i mekim, olsem Daniel ‘bai sanap na kisim ol samting God i bin makim bilong em,’ olsem wanem em bai kamap tru?

• Olsem wanem pasin bilong putim yau long tok profet bilong Daniel i bin helpim yu yet?

[Piksa i karamapim pes olgeta long pes 307]

[Piksa long pes 318]

Yu save putim gut yau long ol tok profet bilong God olsem Daniel i bin mekim?