Stadi 1

God i Laik Yu Kamap Pren Bilong Em

God i laik bai yu stap pren bilong em. Olsem wanem? Sampela taim yu bin tingting olsem yu inap kamap pren bilong dispela nambawan Man tru i winim olgeta narapela man long heven na graun? Abraham, em i bin stap long bipo tru, na ol i bin kolim em pren bilong God. (Jems 2:23) Sampela man moa em Baibel i stori long ol, ol tu i bin stap pren bilong God na God i bin mekim gut tru long ol. Long nau, sampela man bilong olgeta hap bilong graun ol i bin kamap pren bilong God. Yu tu inap kamap pren bilong God.

Pasin bilong kamap pren bilong God i winim tru pasin bilong kamap pren bilong wanpela man. God i no save lusim ol man i stap pren bilong em. (Song 18:25) Taim man i stap pren bilong God, dispela i winim tru ol mani kago bilong em. Taim wanpela maniman i dai, ol narapela i save kisim mani bilong em. Tasol ol man i stap pren bilong God ol i gat wanpela gutpela samting tru i no inap wanpela man i kisim long ol.​—⁠Matyu 6:⁠19.

Ating sampela man i laik pasim yu long kisim save long God. Ating sampela pren na famili bilong yu tu ol i laik mekim olsem. (Matyu 10:​36, 37) Sapos ol narapela i lap long yu o ol i tok long bagarapim yu, askim yu yet, ‘Mi laik amamasim husat​—⁠ol man o God?’ Tingim dispela: Sapos wanpela man i tokim yu long yu no ken kaikai moa, bai yu bihainim tok bilong em? Nogat, a? Bilong i stap laip yu mas kaikai. Tasol God inap mekim na bai yu inap i stap laip oltaim! Olsem na no ken larim wanpela man i pasim yu long lain long ol samting yu ken mekim bambai yu inap i stap pren bilong God.​—⁠Jon 17:⁠3.