Stadi 8

Husat Ol i Birua Bilong God?

Nambawan birua bilong God em Satan. Em i wanpela spirit na em i bin bikhet long Jehova. Satan i wok yet long birua long God na em i save kamapim ol bikpela hevi long ol man. Satan em i man nogut. Em i man bilong giaman na em i wanpela kilman.​—⁠Jon 8:⁠44.

Sampela spirit i bin bihainim Satan na ol i bikhet long God. Baibel i kolim ol olsem spirit nogut. Olsem Satan, ol dispela spirit nogut ol i birua bilong ol man. Ol i amamas long bagarapim ol man. (Matyu 9:​32, 33; 12:22) Jehova bai i bagarapim Satan na ol spirit nogut na bai ol i pinis olgeta. Ol i gat sotpela taim tasol i stap bilong givim hevi long ol man.​—⁠KTH 12:⁠12.

Sapos yu laik stap pren bilong God, orait yu no ken mekim ol samting Satan i laikim. Satan na ol spirit nogut ol i no save laikim Jehova. Ol i birua bilong God, na ol i laik yu tu i kamap wanpela birua bilong God. Yu yet i mas makim yu laik amamasim husat​—⁠Satan o Jehova. Sapos yu laik kisim laip i stap oltaim, orait yu mas mekim laik bilong God. Satan i gat planti trik na pasin bilong giamanim ol man. Em i save giamanim planti manmeri.​—⁠KTH 12:⁠9.