Stadi 17
Bilong Wanpela i Ken Stap Pren Bilong Yu, Yu Mas Stap Pren Bilong Em
Pasin bilong laikim tru narapela i as bilong man i stap pren bilong narapela. Sapos yu lain long planti samting long Jehova, dispela bai helpim yu long laikim em moa yet. Taim yu laikim tru God, laik bilong yu long mekim wok bilong em bai kamap bikpela. Dispela bai kirapim yu long kamap disaipel bilong Krais Jisas. (Matyu 28:19) Taim yu bung wantaim ol Witnes Bilong Jehova, em wanpela famili i save stap amamas, yu bai stap pren bilong God inap oltaim oltaim. Yu mas mekim wanem?
Bilong kamapim olsem yu laikim tru God yu mas bihainim ol lo bilong em. “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”—1 Jon 5:3.
Bihainim ol tok yu lainim. Jisas i mekim wanpela stori i helpim yumi long save long dispela samting. Wanpela man i gat gutpela tingting em i wokim haus bilong em antap long ples ston. Na wanpela longlong man i wokim haus bilong em antap long ples wesan. Taim bikpela win na ren i kam, dispela haus man i wokim antap long ples ston em i no bagarap, tasol haus man i wokim antap long wesan em i pundaun nogut tru. Jisas i tok ol man i harim na bihainim ol tok em i skulim ol long en ol i olsem man i gat gutpela tingting i wokim haus antap long ston. Tasol ol man i harim tok Jisas i skulim ol long en na ol i no bihainim ol i olsem dispela longlong man i wokim haus antap long wesan. Yu laik stap wanem kain man?—Matyu 7:24-27.
Dediket. Dispela i makim olsem yu mas beten long Jehova na tokim em olsem yu laik mekim laik bilong em inap oltaim oltaim. Taim yu mekim laik bilong God, dispela bai kamapim olsem yu wanpela disaipel bilong Krais Jisas.—Matyu 11:29.
Baptais. “Yu kirap na kisim baptais. Yu kolim nem bilong en, na em bai i wasim yu na rausim ol sin bilong yu.”—Aposel 22:16.
Yu mas insait tru long mekim wok bilong God. “Olgeta samting yupela i mekim, yupela i mas wok strong na mekim. I no olsem yupela i mekim wok bilong ol man. Nogat. Yupela i mekim wok bilong Bikpela.”—Kolosi 3:23.