Kolim Klia Tok

BILONG yu ken toktok gut wantaim narapela, yu mas kolim klia ol tok yu mekim. Ating ol tok yu laik mekim em i gutpela tok o em i bikpela tok man i mas harim, tasol ol man i no inap kisim gut dispela tok sapos ol tok yu kolim i no klia tumas.

Sapos ol man i no kisim gut ol tok, orait dispela tok i no inap kirapim ol long mekim samting. Maski man i gat strongpela nek na ol man inap harim nek bilong em, sapos em i no kolim klia ol tok em i mekim, orait tok bilong em i no inap kirapim ol man long mekim wanpela samting. I olsem em i mekim wanpela tok ples ol man i no save long en. (Jer. 5:15) Baibel i tok: “Sapos biugel i no krai stret, husat bai i redi long pait? Yupela tu i olsem tasol. Sapos yupela i mekim tok long narapela tok ples ol man i no save long en, olsem wanem bai ol i save as bilong dispela tok? Tok bilong yupela bai i lus nating.”​—1 Ko. 14:​8, 9.

Wanem Samting i Mekim na Tok i No Krai Stret? Ating yu no opim tumas maus bilong yu. Taim ol masol bilong wasket i tait na maus i op liklik tasol, dispela bai mekim na tok bilong man i no klia tumas.

Tu, sapos yu toktok hariap dispela inap mekim na i hatwok long kisim gut tok bilong yu. Dispela i wankain olsem taim yu pilaim hariap wanpela kaset i gat toktok bilong man i stap long en. Ol tok i stap, tasol yu no inap kisim gut.

Sampela taim maus o nek bilong man i gat sampela kain bagarap long en na man i no inap kolim klia ol tok. Tasol maski yu gat kain hevi olsem, sapos yu wok long bihainim ol tok bilong dispela stadi, dispela bai helpim yu.

Tasol planti taim i gat narapela as na tok bilong man i no klia tumas, olsem em i save skruim ol tok wantaim olsem wanpela tok tasol. Sampela taim ol i kalapim hap bilong wanpela tok o ol i no kolim laspela hap bilong sampela tok. Taim man i no kolim gut olgeta wan wan tok na i olsem em i skruim ol tok wantaim, dispela i mekim na ol man inap kisim sampela hap tok tasol na sampela nogat. Taim man i no kolim klia ol tok, dispela inap bagarapim wok tisa bilong em.

Pasin Bilong Kolim Klia Ol Tok. Bilong kolim klia ol tok yu mas save gut long ol tok bilong tok ples bilong yu. Long klostu olgeta tok ples ol wan wan tok i gat tupela o tripela hap bilong en. Ol wan wan hap i gat wanpela o sampela leta bilong en na yu mas kolim ol dispela leta wantaim. Long ol kain tok ples olsem bai yu kolim ol wan wan hap bilong dispela tok, tasol sampela hap bai yu kolim strong moa. Sapos yu laik bai tok bilong yu i kamap klia moa, orait taim yu toktok, toktok isi isi na kolim stret olgeta hap bilong ol wan wan tok. Pastaim krai bilong dispela bai i narapela kain long yau bilong yu, tasol taim yu mekim mekim, toktok bilong yu bai krai gut gen. Bilong toktok i ken ron gut, sampela tok yu mas skruim wantaim narapela tok, no gat malolo namel long en, tasol sapos dispela i mekim na ol man i no klia long ol tok bilong yu, orait yu no ken mekim olsem.

Samting bilong was gut long en: Bilong mekim pasin bilong yu long kolim gut ol tok i kamap gutpela, yu ken mekim traim planti taim long kolim na ritim ol tok long pasin bilong kolim stret tru olgeta wan wan tok. Tasol no ken larim dispela i kamap olsem pasin bilong yu long toktok. Krai bilong en bai i no gutpela tumas long yau bilong ol man.

Sapos toktok yu mekim i krai olsem samting i pas long maus bilong yu, orait lain long apim het na bai wasket bilong yu i no ken i stap klostu long bros bilong yu. Taim yu ritim Baibel, holim buk antap na bai yu no gat wok long apim na daunim het taim yu ritim Baibel na bihain lukluk long ol man​—yu apim na daunim ai tasol. Long dispela rot ol tok yu mekim i no inap pas long nek, em bai kamap klia.

Pasin bilong i stap isi inap helpim toktok bilong yu i kamap gutpela. Taim man i pret, ol masol bilong pes na bilong waitlewa i tait na dispela inap bagarapim pasin bilong em long mekim toktok. Kain hevi o pret olsem em inap mekim na tingting na maus na pasin bilong yu long pulim win i no wok gut wantaim​—em ol dispela samting i mas wok gut wantaim.

Ol masol bilong wasket i mas i stap isi bambai ol i redi long bihainim tok em kru i givim long ol. Maus tu i mas i stap isi bilong mekim wok bilong en long helpim tok i bin kirap insait long nek na bai em i kamap klia. Sapos wasket na maus i no stap isi na ol i tait, orait yu no inap opim stret maus, na krai bilong toktok bai kam ausait namel long ol tit. Dispela bai mekim na ol man i no inap harim klia ol tok bilong yu. Tru yu laik bai ol masol long wasket na maus i ken i stap isi, tasol no ken bihainim les pasin long mekim toktok. Yu mas kolim stret olgeta hap bilong olgeta tok bambai tok bilong yu i klia.

Taim yu skelim pasin bilong yu long toktok, ating bai yu save olsem pasin bilong ritim ol tok long maus inap helpim yu. Skelim gut pasin bilong yu long mekim wok long ol hap bodi bilong yu em yu save yusim bilong mekim toktok. Olsem wanem? Yu save opim maus bikpela inap long toktok bilong yu i ken kamap klia na i no pas insait long maus? Taim yu toktok yu no mekim wok long tang tasol. Nek, wasket, maus, ol masol bilong pes na ol masol bilong nek ol i save helpim dispela wok. Olsem wanem? Taim yu toktok, pes bilong yu i no save meknais liklik? Sapos olsem, ating toktok bilong yu bai i no klia tumas.

Sapos yu gat wanpela redio kaset, orait rekodim nek bilong yu long kaset taim yu mekim tok long pasin bilong yu yet, kain olsem yu bai mekim taim yu toktok wantaim narapela long taim bilong autim tok. Mekim toktok olsem yu toktok wantaim narapela man na rekodim sampela minit bilong en. Taim yu harim dispela kaset yu inap kisim save long sampela hevi bilong yu long kolim klia sampela tok. Putim gut yau bilong skelim olsem sampela toktok bilong yu i no klia, o maus i hevi, o yu sotim sampela tok, na traim painimaut wanem as na yu mekim olsem. Ating yu inap stretim dispela hevi sapos yu bihainim dispela tok yumi kolim pinis.

Olsem wanem? Maus bilong yu i hevi na yu no inap toktok gut? Wok long opim maus i go bikpela liklik winim bipo, na traim kolim gut olgeta hap bilong olgeta wan wan tok. Pulim planti win insait long waitlewa bilong yu, na toktok isi isi. Dispela pasin i bin helpim toktok bilong sampela i kamap klia moa. Taim yu kolim ol tok i gat krai bilong leta s yu no ken larim tang bilong yu i pas long tit i stap long fran bilong maus bilong yu. Tru hevi bilong yu i no inap pinis olgeta, tasol no ken bel hevi. Tingim: Jehova i bin makim Moses, em wanpela man ating maus bilong em i hevi na em i no inap toktok gut, bilong givim ol bikpela tok long lain Israel na long king bilong Isip. (Kis. 4:​10-12) Sapos yu gat laik, em bai mekim wok long yu tu, na em bai mekim wok autim tok bilong yu i karim kaikai.