Pasin Bilong Bihainim Tok i Lukautim Yu

OLSEM WANEM? Yu laik bihainim laik bilong yu yet tasol? Sampela taim yu laik bai i no gat man i tokim yu long ol samting yu mas mekim? Yu mas tok tru, na tokim mi long tingting bilong yu.—

Tasol olsem wanem? Yu ting i gutpela long bihainim laik bilong yu yet, o i gutpela moa long bihainim tok bilong papa na mama?— God i tok yu mas bihainim tok bilong papamama bilong yu, olsem na i mas i gat gutpela as na em i tok olsem. Orait, yumi ken traim kisim save long dispela samting.

Yu gat hamas krismas?— Yu save papa bilong yu i gat hamas krismas?— Mama bilong yu, bubu meri na bubu man ol i gat hamas krismas?— Ol i bin stap laip longpela taim moa, winim yu. Man i stap laip longpela taim, em i gat bikpela haptaim moa bilong kisim save long ol samting. Long olgeta yia, em i harim, lukim, na mekim planti samting moa. Olsem na ol yangpela inap kisim save long ol samting long ol man i bikpela pinis.

Yu save long wanpela em i yangpela moa long yu?— Yu ting save bilong yu i winim save bilong em?— Bilong wanem i olsem?— Long wanem, yu bin stap laip longpela taim moa. Yu bin i gat longpela haptaim moa long kisim save long ol samting.

Husat i bin stap laip longpela taim moa, winim yu na mi na olgeta arapela man?— Em God Jehova. Save bilong em i winim save bilong yu na bilong mi. Taim em i tokim yumi long mekim wanpela samting, yumi ken bilip tru olsem em i stretpela pasin long mekim, maski em i hatwok long mekim. Yu save olsem wanpela taim Bikpela Tisa i bin hatwok long bihainim tok?—

Wanpela taim God i askim Jisas long mekim wanpela samting i hatwok tru long mekim. Olsem yumi ken lukim long piksa, Jisas i beten long dispela samting. Em i tok: “Sapos yu laik, yu ken rausim dispela kap long mi.” Dispela beten bilong Jisas i soim olsem, sampela taim i hatwok long bihainim laik bilong God. Tasol Jisas i mekim wanem tok long pinis bilong beten? Yu save?—

Long pinis bilong beten, Jisas i tok: “Yu no ken bihainim laik bilong mi. Nogat. Yu mas bihainim laik bilong yu tasol.” (Luk 22:​41, 42) Yes, em i laik bihainim laik bilong God, na laik bilong em yet, nogat. Olsem na em i mekim samting God i laik em i mas mekim, na em i no mekim ol samting em yet i ting i gutpela long mekim.

Dispela inap skulim yumi long wanem samting?— Yumi kisim save olsem i stret long bihainim tok bilong God long olgeta taim, maski i hatwok long mekim olsem. Na dispela i skulim yumi long narapela samting tu. Yu save em wanem samting?— Yumi kisim save olsem God na Jisas ol i no wankain man, olsem sampela man i tok. God Jehova i bin stap longpela taim moa na save bilong em i winim save bilong Pikinini bilong em, Jisas.

Taim yumi bihainim tok bilong God, yumi soim olsem yumi laikim em tumas. Baibel i tok: “Sapos yumi laikim tru God, orait yumi save bihainim ol lo bilong en.” (1 Jon 5:3) Em nau, yumi olgeta i mas bihainim tok bilong God. Yu laik bihainim tok bilong God, a?—

Yumi ken kisim Baibel bilong yumi na lukim samting God i tokim ol pikinini long mekim. Yumi bai ritim tok bilong Baibel long Efesus sapta 6, ves 1, 2, na 3. Em i tok: “Yupela pikinini, yupela i mas bihainim tok bilong papamama bilong yupela. Yupela olgeta i pas wantaim Bikpela, na dispela pasin em i stretpela pasin bilong yupela i mekim. Buk bilong God i tok olsem, ‘Yu mas aninit long papamama bilong yu na bihainim tok bilong ol.’ Dispela lo em i namba wan lo i gat promis i stap wantaim, em promis i tok olsem, ‘Sapos yu mekim olsem, orait olgeta wok samting yu mekim i ken kamap gutpela, na bai yu stap longpela taim long dispela graun.’ ”

Nau yu save, God Jehova yet i tokim yu long bihainim tok bilong papa na mama. Wanem mining bilong dispela tok “bihainim tok” bilong papamama? Em olsem yu mas rispektim ol. Na God i tok promis olsem sapos yu bihainim tok bilong papamama, ‘olgeta wok samting yu mekim bai kamap gutpela.’

Mi laik tokim yu long stori bilong sampela man em ol i bin abrusim bagarap, long wanem, ol i bihainim tok. Ol dispela man i bin stap bipo tru long bikpela taun Jerusalem. Planti man bilong dispela taun ol i no harim tok bilong God, olsem na Jisas i givim tok lukaut long ol olsem God bai bagarapim taun bilong ol. Na tu, Jisas i tokim ol long rot bilong abrusim bagarap, sapos ol i laikim stretpela pasin. Em i tok: ‘Taim yupela i lukim ol ami i raunim Jerusalem, orait yupela i ken save olsem taim bilong taun i mas bagarap em i klostu nau. Long dispela taim ol manmeri i stap long distrik Judia i mas ranawe i go long ples maunten.’—Luk 21:​20-22.

Olsem Jisas i bin tok, ol ami i kam long bagarapim Jerusalem. Ol ami bilong Rom i raunim taun olgeta. Bihain, wanpela samting i mekim na ol soldia i go bek. Planti man i ting olsem hevi i no inap kamap. Olsem na ol i stap yet long taun. Tasol Jisas i bin tokim ol long mekim wanem?— Sapos yu bin stap long Jerusalem, bai yu mekim wanem?— Ol man i bilip tru long Jisas, ol i lusim ples bilong ol na ol i ranawe i go long ol ples maunten i stap longwe long Jerusalem.

Inap wanpela yia olgeta, i no gat wanpela samting i kamap long Jerusalem. Long namba tu yia, i no gat samting i kamap. Na long namba tri yia, i no gat wanpela samting i kamap. Ating sampela man i bin ting olsem ol lain i lusim taun na ranawe, ol i mekim longlong pasin. Tasol long namba foa yia, ol ami bilong Rom i kam bek. Ol i banisim gen taun Jerusalem. Nau i no gat rot long ranawe. Long dispela taim ol ami i bagarapim taun. Klostu olgeta man i stap long taun ol i dai, na ol ami i kisim ol arapela i go kalabus.

Tasol olsem wanem long ol man i bin bihainim tok bilong Jisas?— Ol i stap gut. Ol i stap longwe long Jerusalem. Olsem na ol i no kisim bagarap. Pasin bilong bihainim tok i bin lukautim ol.

Sapos yu bihainim tok, yu ting dispela bai lukautim yu tu?— Ating papamama i tokim yu long yu no ken pilai long rot. Bilong wanem ol i tok olsem?— Long wanem, ka inap bamim yu. Tasol ating wanpela taim yu kisim tingting olsem: ‘Nau i no gat ka long rot. Mi no inap kisim bagarap. Ol arapela pikinini i save pilai long rot, na ol i no bin kisim bagarap.’

Planti man long Jerusalem i bin kisim kain tingting olsem. Taim ol ami bilong Rom i go bek, i luk olsem bagarap i no inap kamap. Ol arapela i stap long taun, olsem na ol tu bai stap. Ol i bin kisim tok lukaut, tasol ol i no laik bihainim. Olsem na ol i dai.

Tingim narapela samting. Sampela taim yu save pilai long masis?— Ating yu save amamas long lukim masis i lait. Tasol pasin bilong pilai long masis inap kamapim hevi. Paia inap kamap na kukim haus olgeta, na yu inap i dai!

Tingim, sapos sampela taim tasol yu bihainim tok, dispela i no inap. Tasol sapos long olgeta taim yu bihainim tok, dispela bai lukautim yu gut. Na husat i tokim yu olsem, “Yupela pikinini, yupela i mas bihainim tok bilong papamama bilong yupela”?— Em God i tokim yu. Na tingim, em i laikim yu, olsem na em i mekim dispela tok.