Yumi Mas Sakim Ol Traim

OLSEM WANEM? Wanpela man i bin tokim yu long mekim wanpela pasin i no stret?— Em i bin skrapim bel bilong yu long mekim olsem? O em i bin tok olsem em samting bilong amamas na i no gat rong long mekim?— Taim wanpela i mekim olsem long yumi, em i laik traim yumi.

Yumi mas mekim wanem taim wanpela i traim yumi? Yu ting yumi mas bihainim tok bilong em na mekim pasin i no stret?— God Jehova i no inap amamas long dispela. Tasol yu save husat bai amamas?— Em nau, Satan bai amamas.

Satan em i birua bilong God, na em i birua bilong yumi tu. Yumi no inap lukim em, long wanem, em i spirit. Tasol em inap lukim yumi. Wanpela taim Satan i toktok wantaim Jisas, Bikpela Tisa, na i laik traim em. Orait, yumi ken painimaut long ol samting Jisas i bin mekim, na dispela bai helpim yumi long save long stretpela pasin yumi mas mekim taim wanpela i traim yumi.

Oltaim Jisas i laik mekim laik bilong God. Em i kamapim dispela long ples klia taim em i kisim baptais long wara Jordan. Bihain tasol long Jisas i bin kisim baptais, Satan i traim em. Baibel i tok “heven i op” long Jisas. (Matyu 3:16) Dispela inap makim olsem nau Jisas i kirap tingim bek olgeta samting long i stap bilong em taim em i bin stap wantaim God long heven.

Taim em i baptais pinis, Jisas i go long ples drai nating bilong skelim long bel ol dispela samting. Em i stap 40 de na 40 nait. Insait long dispela 40 de, Jisas i no bin kaikai liklik, olsem na em i hangre nogut tru. Long dispela taim stret, Satan i traim Jisas.

Satan i tok: “Sapos i tru yu Pikinini Bilong God, orait yu tok na ol dispela ston i ken tanim na i kamap bret.” Jisas i hangre, olsem na ating long kain taim olsem bret bai swit tru long maus! Tasol yu ting Jisas inap mekim ol dispela ston i kamap bret?— Yes, em inap mekim. Bilong wanem? Long wanem, Jisas, Pikinini Bilong God, em i gat bikpela strong.

Olsem wanem? Bai yu mekim wanpela ston i kamap bret sapos Satan i bin tokim yu long mekim olsem?— Jisas i hangre. Olsem na ating i orait long em i mekim dispela samting wanpela taim tasol, a?— Jisas i save olsem i no stret long em i yusim strong bilong em long kain rot olsem. Jehova i bin givim strong long em bilong pulim ol man i go long Em, na i no bilong inapim laik bilong em yet.

Olsem na Jisas i kamapim tok bilong Baibel long Satan: ‘Ol man i no inap kisim laip long kaikai tasol. Nogat. Ol i mas bihainim olgeta tok bilong God na bai ol i kisim laip.’ Jisas i save olsem pasin bilong mekim ol samting Jehova i amamas long en i bikpela samting tru, winim pasin bilong kaikai.

Tasol Satan i traim em gen. Em i kisim Jisas i go long Jerusalem na mekim em i sanap long hap bilong tempel i antap tru. Orait nau Satan i tok: ‘Sapos yu wanpela pikinini bilong God, orait yu kalap i go daun. Long wanem, buk bilong God i tok olsem ol ensel bilong God bai was long yu na yu no inap kisim bagarap.’

Bilong wanem Satan i tok olsem?— Em i laik kirapim Jisas long mekim pasin kranki. Tasol long dispela samting tu, Jisas i no bihainim tok bilong Satan. Em i tokim Satan: “Buk bilong God i tok moa olsem, ‘Yu no ken traim strong bilong God, Bikpela bilong yu.’ ” Jisas i save olsem i no stret long traim Jehova na mekim ol samting inap bagarapim laip bilong em.

Tasol Satan i no les. Em i kisim Jisas i go long wanpela maunten i antap tru. Em i soim Jisas olgeta kingdom, o gavman bilong dispela graun wantaim ol gutpela samting bilong en. Satan i tokim Jisas: “Sapos yu brukim skru na lotu long mi, orait bai mi givim yu dispela olgeta samting.”

Tingim samting Satan i laik givim long Jisas. Yu ting olgeta dispela kingdom, o gavman, i bilong Satan?— Jisas i tok ol i bilong Satan. Sapos ol i no bilong Satan, Jisas bai tokaut stret olsem. Em nau, Satan i bos tru bilong olgeta kantri bilong dispela graun. Baibel i kolim em olsem “hetman i save bosim dispela graun.”—Jon 12:31.

Bai yu mekim wanem sapos Satan i promis long givim yu wanpela samting sapos yu lotuim em?— Jisas i save olsem i no stret long lotuim Satan, maski Em inap kisim wanem wanem samting. Olsem na Jisas i tok: ‘Satan, yu klia. Baibel i tok yu mas lotuim God Bikpela bilong yu na yu mas mekim wok bilong em wanpela tasol.’—Matyu 4:​1-10; Luk 4:​1-13.

Ol traim i save kamap long yumi tu. Yu save long sampela traim i save kamap?— Wanpela em olsem: Ating mama i wokim wanpela naispela skon o kek. Em inap tokim yu long yu no ken kaikai dispela skon o kek paslain long taim bilong kaikai. Tasol yu hangre nogut tru, olsem na yu gat laik long kaikai. Bai yu bihainim tok bilong mama?— Satan i laik bai yu sakim tok bilong mama.

Tingim Jisas. Em tu i hangre nogut tru. Tasol em i save olsem pasin bilong mekim samting God i amamas long en i bikpela samting moa, winim pasin bilong kaikai. Yu soim olsem yu gat wankain pasin olsem Jisas taim yu bihainim tok bilong mama bilong yu.

Ating sampela pikinini bai tokim yu long kisim mariwana samting. Ating ol i tokim yu olsem dispela bai mekim na yu pilim gutpela tru. Tasol ol dispela drak inap givim sik long yu na em inap kilim yu i dai. O ating wanpela i givim yu wanpela smok, em samting i gat drak long en, na kirapim yu long smok. Bai yu mekim wanem?—

Tingim Jisas. Satan i laik pulim Jisas long mekim ol samting inap bagarapim laip bilong em taim em i tokim Jisas long lusim tempel na kalap i go daun. Tasol Jisas i no mekim olsem. Bai yu mekim wanem sapos wanpela man i kirapim yu long mekim samting em inap bagarapim yu?— Jisas i no harim tok bilong Satan. Olsem na yu tu i no ken harim tok bilong man i laik pulim yu long mekim ol samting i no stret.

Ating wanpela taim ol inap askim yu long lotuim wanpela imis, em samting Baibel i tok yumi no ken mekim. (Kisim Bek 20:​4, 5) Ating em i hap bilong wanpela bikpela bung long skul. Ating ol i tokim yu olsem yu no inap i go moa long skul sapos yu no mekim dispela samting. Bai yu mekim wanem?—

Em i isi long mekim stretpela pasin taim ol arapela tu i mekim olsem. Tasol i hatwok tru long mekim olsem taim ol arapela i laik pulim yumi long mekim pasin i no stret. Ating ol bai tok olsem samting ol i mekim i no rong olgeta. Tasol bikpela askim em olsem: God i tok wanem long dispela pasin? Save bilong em i winim save bilong yumi.

Olsem na maski ol arapela i tok wanem, yumi no ken mekim ol samting em God i tok i no stret long mekim. Long dispela rot bai oltaim yumi mekim ol samting God i amamas long en, na yumi no inap amamasim Satan.